Ուշացումով մեկնարկած փողոցաշինական ծրագիրը Գյումրիում անավարտ է մնալու

Ուշացումով սկսված շինարարությունը ժամկետների մեծ շեղումներով էլ ավարտվելու է: Նման ելք է ունենալու Գյումրիի փողոցաշինական լայնածավալ այն ծրագիրը, որին քաղաքը սպասում է դեռ 2015 թվականից: Այս ընթացքում շինարարության դանդաղ ընթացքի, երբեմն նաև դադարների, ինչպես նաև նախագծային թերությունների ու անորակ շինարարության շուրջ  հնչեցին դժգոհություններ, որի հետ համաձայն չէին պատասխանատուները: Ժամանակին չարված գործի հետևանքները այժմ բացահայտ երևում են գրեթե բոլոր փողոցներում: Աշխատանքները պարզ է, որ մնալու են անավարտ՝  հաշվի առնելով  նաև Գյումրիի եղանակային պայմանները, որոնք արդեն թույլ չեն տալիս շինարարությունը  շարունակել: SHANTNEWS.am-ի  թղթակիցը ներկայացնում է Գյումրիի քանդված փողոցների վիճակն անձրևից հետո:

Անձրևը՝ վերևից, քանդելը՝ ներքևից, այս տաբերակով Գյումրիում փողոց սարքելը նորություն չէ, տարբերությունն այս անգամ աշխատանքների ու ֆինանսների ծավալներն են միայն: Փողոցաշինական մեծ ծրագիրը սկսվել է լուրջ խնդիրներով ու դեռ շարունակվում է այդպես: Նախագծի թերությունները, շինարարների սխալները, բանվորների պակասն աշխատանքները ձգձգեցին այնքան, մինչև անձրևներ սկսվեցին: Փողոցը մայթի փոխարեն է օգտագործվում, մայթն էլ՝ փողոցի, այլընտրանք անցորդներն էլ չունեն, վարորդներն էլ։

Փողոցներով երթևեկել, իսկ մայթերով քայլել քաղաքում դժվարացել է օգոստոսից, ու հենց կենտրոնական փողոցները, բացի Սայաթ -Նովայից, միաժամանակ վերածվեծին շինհրապարակների, բայց միայն քանդում էին ու մինչև հիմա նույնն է տեղի ունենում: Ամռան վերջին մեկնարկած շինարարությունը, դատելով տեմպերից, պարզ էր, որ աշնան կեսին այսպիսի իրավիճակ էր ստեղծելու: Քանդած մայթերի ու փողոցների հողային զանգվածները անձրևի հետ ցեխի հաստ շերտ են ստեղծել: Գյումրեցիներին այդպես էլ բախտ չի վիճակվում ազատվել քանդված փողոցներից:

Ամռանը չաշխատածի դիմաց շինարարը ստիպված է անձրևին գործ անել: Ու դա չի կարող լինել մեծ ծավալի, ավելի ճիշտ անում են այն, ինչ պետք է արած լինեին վաղուց: Շինարարն ասում է՝ անձրևին եզրաքարեր շարելը որակի վրա չի ազդում: Հետն էլ փողոցներից հողակույտերն են հեռացնում, պարզապես, այսպես ասած, տեղավորում են մայթերին: Անձրևը, համենայնդեպս չէր խանգարում շաղախ անելուն, գուցե օգուտ է: Իսկ Վազգեն Սարգսյան փողոցում դեռ շաբաթներ առաջ շարած եզրաքարերին փաստորեն անձրևները վնաս էին: Այսօր առավոտյան դրանք պոկվել էին: Անձրևոտ եղանակին գործ անելու բացատրություն էլ ունի շինարարը, ինչպես ամռան տաք օրերին չաշխատելու: Էլի ժամկետներից են խոսում, որոնք արդեն վաղուց խախտել են:

Սկզբում նախագծային շտկումների պատճառով դադարներով ընթացող շինարարությունը, հավանաբար, շինարարները կավարտեն միայն եզրաքարերի տեղադրումով, թեև դրանից ոչինչ չեն շահի ոչ միայն շինարարներն, այլև քաղաքի բնակիչները: Տիգրան Մեծ փողոցում աշնան կեսին դեռ մայթ են քանդում, ստորգետնյա մալուխներ են փոխում, որը դեռ օգոստոսին պետք է ավարտած լինեին: Պատվիրատուն , նախագծողն ու շինարարը ծրագրի նման ընթացք սկզբում, հավանաբար, չէին կանխատեսել: Տեխնիկական,եղանակային ու թերևս սուբյեկտիվ շատ պատճառներ աշխատեցին ի վնաս ծրագրի, որի շուրջ պատվիրատուն ասելիք արդեն չունի: Սա է քաղաքապետարանի պատասխանը SHANTNEWS.am-ի թղթակցի հարցմանը։