Սպասելիքներ չկան. միջազգային մամուլը՝ Սարգսյան-Ալիև հանդիպման մասին

Վիեննայի և Սանկտ Պետերբուրգի հանդիպումների ժամանակ ձեռք բերված պայմանավորվածությունների տակ բացակայում է միայն Բաքվի ստորագրությունը, թեև Մինսկի խմբի համանախագահները պնդում են, թե Իլհամ Ալիեվը բանավոր համաձայնել է կիրառել դրանք: «Ռեգնում» գործակալության այս հրապարակումն անդրադառնում է վերջին երկու տարիներին նախագահների մակարդակով Հայաստանի և Ադրբեջանի միջև ընթացող բանակցություններին՝ եզրակացնելով, որ Ադրբեջանը ընդառաջ չի գնում որևէ առաջարկի, որը, բացի Բաքվի շահերից, հաշվի է առնում այլ պետության, այս դեպքում՝ Հայաստանի Հանրապետության կամ Արցախի շահերը:

Հրապարակման հեղինակ Ստանիսլավ Տարասովի խոսքով՝ այսօր հայկական կողմն ընդամենը մեկ նախապայման է դնում՝ կիրառել սահմանային միջադեպերը հետաքննող մեխանիզմ՝ բանակցությունները փոխվստահության մակարդակում կազմակերպելու համար: Ադրբեջանը դեմ է:

«Այսպիսի պայմաններում որքան մոտենում էր հանդիպման օրն ու ժամը, Երևանի վրա միջազգային ճնշումները պակասեցին՝՝ փոխարենը ավելանալով Բաքվի վրա՝ թույլ չտալով մանևրել դիրքորոշման և հայտարարությունների մեջ: Ադրբեջանի իշխանությունը հասկանում է, որ տնտեսական խնդիրների, նավթային ռեսուրսների պակասի ֆոնին Ամերիկայի Միացյալ Նահանգները, հնարավոր է՝ նաև Ֆրանսիան, բիլիարդի գնդակի նման անկյուն մտցնեն Ադրբեջանին՝ ստիպելով կատարել կրակի դադարեցման վերաբերյալ համաձայնեցված միջազգային մեխանիզմները»,- գրել է ռուս վերլուծաբանը:

Մոտավորապես նման եզրահանգում է արել «Գեոպոլիտիկա» պորտալը՝ նշելով, որ նախագահների հանդիպման ժամանակ պայմանավորվածությունների կամ առաջընթացի հույսեր չկան: Գրեթե նույն միտքը, ինչ հայտնեց պաշտոնական Երևանը. «Արդեն հիմա հնարավոր է կանխատեսել, որ բանակցություններն արդյունավետ չեն լինի: Այսքան տարիների ընթացքում խնդրի լուծման ուղղությամբ երբևէ առաջ քայլ չի եղել: Բացի այդ, Ադրբեջանը մեղադրում է Արևմուտքին՝ ապակառուցողական գործողությունների համար, ինչը նշանակում է, որ հնարավոր չէ այս պահին դրական տեղաշարժ սպասել»:

Արևմտյան մեդիադաշտը դեռևս լռում է նախագահների հանդիպման սպասելիքների մասին՝ գերադասելով ընդամենը տեղեկություն տալ հանդիպման վայրից և մասնակիցների դիրքորոշումից: Եվրոպայից հեռարձակվող ադրբեջանական ընդդիմադիր «Մեյդան TV»-ի հրապարակման մեջ կասկածի տակ է դրվել Իլհամ Ալիևի հայտարարությունը, թե հանդիպումը տեղի կունենա առանց նախապայմանների՝ շեշտելով, որ Վիեննայի և Սանկտ Պետերբուրգի պայմանավորվածությունների հիշատակումն արդեն նախապայման է:

«Հայկական կողմը սպասում է մինչ այժմ ներկայացված սկզբունքների կատարմանը Ադրբեջանի կողմից: Դրանք նախ՝ վերաբերում են Վիեննայում և Սանկտ Պետերբուրգում ձեռք բերված համաձայնություններին՝ խաղաղության և կողմերի միջև վստահության վերականգնման ուղղությամբ: Դրանք նաև ենթադրում են սահմանային մոնիթորինգ: Ադրբեջանը, սակայն, հրաժարվում է այդ սկզբունքներից՝ պնդելով, որ դրանք կարող են սահմանափակել խնդիրը ռազմական ճանապարհով լուծելու իր իրավունքը»:

Ռուսական «Գազետա.ռու»-ն մեջբերել է Ադրբեջանի նախագահի պահանջները՝ ուղղված միջազգային հանրությանը՝ ճնշում գործադրել հայկական կողմի վրա հակամարտությունը լուծելու համար: Պարբերականը, դրան զուգահեռ, հիշեցրել է, որ Ադրբեջանը պարբերաբար դիմում է ագրեսիայի, ինչը խախտում է հակամարտության խաղաղ լուծման համար մինչև այժմ ձեռք բերված պայմանավորվածությունները: