Կարևոր ասելիք կար, եթե ԱԺ ամբիոնը չլիներ, հանրահավաք պիտի հրավիրեի. Նիկոլ Փաշինյան

ՀՀ վարչապետի թեկնածու Նիկոլ Փաշինյանը խորհրդարանում կայացած նիստից հետո պատասխանեց լրագրողների հարցերին: Անդրադառնալով կաշառք վերցնելու համար պատգամավորի նկատմամբ քրեական գործ հարուցելու մասին իր հայտարարությանը, Փաշինյանը փակագծեր չբացեց, պիտակավորում չարեց:

«Կարծում եմ` ավելի խոշորներն էլ կբացահայտվեն, բայց սա բացահայտվածներից ամենամեծն է: Մենք արտերկրից սպասում ենք թղթի, այդ պաշտոնական պատասխանի ոչ պաշտոնական թուղթը, որ ֆաքսով է ուղարկվել, մենք այսօր ունենք, բայց սպասում ենք օրիգինալին»,- ասաց նա:

Ընտրական օրենսգրքի նոր նախագծի տապալման մասին խոսելով` Փաշինյանը նշեց, որ իր ունեցած տեղեկություններով` հանրապետականներն իրենց նախկին գործընկերների հետ աշխատել են, որ նրանք չգան քվեարկության: Հարցին` արդյո՞ք ճնշումներ են եղել նրանց նկատմամբ, Փաշինյանը պատասխանեց.

«Ճնշելը հարաբերական է, եթե որևէ մեկին փորձեն ճնշել այնքան, որ մենք ստիպված լինենք հակաճնշման մեխանիզմները գործարկել, պարզ է, թե ինչ տեղի կունենա, մենք չենք ուզում… մեր հասցեին մեղադրանքներ են հնչում, թե ուզում ենք բոլորին ճնշել, դիկտատուրա հաստատել, մենք այդպիսի բան չենք ուզում»:

Նա խոստացավ` այլևս հին ընտրական ավանդույթներ չեն լինի: Փաշինյանին հարց ուղղվեց Վանո Սիրադեղյանի մասին, թե ինչպե՞ս կընդունեն նրան, եթե վերջինս ցանկություն ունենա վերադառնալ:

«Դա իրավական խնդիր է և իրավաբանորեն պետք է լուծվի այսօր: Ես նախկինում իմ հարցազրույցներում ասել եմ, ոչ որպես վարչապետ, որպես մարդ, ով եղել է ընդհատակում, մարդ, ով եղել է բանտում: Ես ասեմ, որ ինձ համար զուտ բոլոր առումներով բանտի վիճակը ավելի կոմֆորտ է, քան ընդհատակի վիճակը»,- նշեց նա:

Լրագրողները հետաքրքրվեցին` մեկ շաբաթ անց էլի առաջադրվելո՞ւ է, թե՞ այլևս դրա անհրաժեշտությունը չկա: Փաշինյանը պատասխանեց.

«Կնայենք»:

Նա չբացառեց, որ կառաջադրվի, բայց ոչ էլ հաստատեց:

Խոսելով հին Ընտրական օրենսգրքով ոչ արդար ընտրություններ կազմակերպելու հավանականության մասին, Փաշինյանն ասաց.

«Ոչ թե արդար ընտրություններ կազմակերպելու շանսը միշտ կա, այլ անարդար ընտրություններ կազմակերպելու շանս չկա: Ինչի՞ ՏԻՄ ընտրությունները, Երևանի ավագանու ընտրությունները հին օրենսգրքո՞վ չեն եղել: Որևէ մեկը կասկածո՞ւմ է, որ մի քվեաթերթիկի ձայն անգամ չի կեղծվել»:

Փաշինյանը փակագծեր չբացեց` ում նկատի ուներ, երբ խոսում էր հեղափոխությունը եռանդով պաշտպանած, բայց հետո քարուքանդ եղած պաշտոնյաների մասին:

«Նկատի ունեմ, որ ոչ մեկը անձեռնմխելի չէ` անկախ նրանից` հեղափոխակա՞ն է, թե՞ հակահեղափոխական: Ցանկացած ոք իր արարքի համար պատասխան է տալու»,- ասաց նա:

Հարցին` համոզվա՞ծ է, որ իր թիմը հաղթանակ է տանելու, նա պատասխանեց.

«Մեր իշխանության օրոք ընտրություն չի կեղծվելու: Ինձ չի հետաքրքրում` ով է հաղթելու. հաղթելու է ժողովուրդը: Եթե ձեզ թվում է, որ ես ձև եմ անում, դուք կհամոզվեք, որ ձև չեմ անում: Եթե պարտվենք, մենք մեր պարտությունը կճանաչենք և սուսուփուս կգնանք մեր ուրիշ գործերով զբաղվելու»:

Վարչապետի թեկնածուն խոստովանեց` այն ամենը, ինչ այսօր խորհրդարանում ասաց, կարևոր էր, և իր համար կարևոր էր ամբիոն ունենալ այդ ամենը ասելու համար:

«Ինձ համար այս քննարկումը կարևոր էր, կարևոր ասելիք կար, որ ուզում էի անպայման ասել, եթե այս առիթը չլիներ, պիտի հանրահավաք հրավիրեի»,- կատակով նշեց նա:

Խոսելով իրենց ընտրական ցուցակի մասին, պատասխանելով ՀՀԿ-ական գործիչների` այնտեղ ընդգրկվելու հնարավորության մասին, Փաշինյանն ասաց.

«Տպավորություն է լինում, թե մեր ցուցակը բաղկացած է լինելու հանրապետականից: Ոչ, կարող են լինել երկու-երեք դեմքեր»:

Նա կարևորեց կադրերի պրոֆեսիոնալիզմը և ընդգծեց` պրոֆեսիոնալ չի նշանակում կուսակցական:

Կայանալիք ընտրություններին Փաշինյանը չբացառեց, որ հնարավոր է` դաշինք լինի, որպեսզի հանդես գան «Իմ քայլը» անունով: Նրա խոսքով` ցուցակում տարբեր տեղերից անհատներ կարող են լինել: Փաշինյանն ասաց, որ ցուցակը ինքն է գլխավորելու: Նա խոսեց ԸՕ նախագծի ընդունումը կրկին տապալելու հավանականության մասին:

«ՀՀԿ-ին թվում է, թե իրենց համար գործող օրենսգիրքը ավելի ձեռնտու է, բայց իրենց շանսերը գործող օրենսգրքով շատ ավելի փոքր են, քան առաջարկվող փոփոխություններով»,- ասաց նա:

Փաշինյանին ասացին` ԸՕ բարեփոխումներով զբաղվող հանձնաժողովի համակարգող Դանիել Իոաննիսյանը ևս իր հասցեին մեղադրանք էր հնչեցրել:

«Ես խոստանում եմ ուղղվել»,- նշեց Փաշինյանը: