Վենետիկի հանձնաժողովի գնահատականն աքսիոմա չէ, կարևորը ՀՀ քաղաքացու պահանջն է. Անժելա Խաչատրյան

«Կարծում եմ, որ Վենետիկի հանձնաժողովի գնահատականը, ընդհանուր առմամբ, այնպիսին է, որ հնարավորություն է տալիս, որպեսզի մենք կարողանանք արտահերթ խորհրդարանական ընտրություններն անցկացնել նոր Ընտրական օրենսգրքով, որը հուսով եմ՝ նաև կընդունվի ԱԺ-ի կողմից: Վենետիկի հանձանժողովի արտահայտած կարևորագույն դիրքորոշումն այն էր, որ իրենք կարծում են, որ ԸՕ-ն փոփոխությունների ենթարկելուց հետո առնվազն մեկ տարի ժամկետ իրենք ուզում են, որ օրենսգիրքը մտնի շրջանառության մեջ ու հետո նոր անցկացվեն ընտրություններ: Հանձնաժողովի հիմնական մեսիջը սա էր, բայց, այնուամենայնիվ, եթե կա քաղաքական համաձայնություն, ապա իրենք դրանում խնդիր չեն տեսնում»,- SHANTNEWS.am-ի զրույցում ասել է «Ազատ Դեմոկրատներ» կուսակցության փոխնախագահ Անժելա Խաչատրյանը:

Խաչատրյանի կարծիքով՝ ներկայումս քաղաքական ուժերի միջև Ընտրական օրենսգրքի փոփոխության հարցում կա համաձայնություն, քանի որ բոլոր քաղաքական ուժերը կարծես իրենց գնահատականները հնչեցրել են, և բացառություն է կազմում Հանրապետական կուսակցությունը և ինչ-որ առումով նաև Դաշնակցությունը:

«Ես կարծում եմ, որ քննարկումների փուլում պետք է նաև այս խնդիրը հարթվի և, այնուամենայնիվ, մենք պետք է արտահերթ խորհրդարանական ընտրություններին գնանք նոր՝ փոփոխված Ընտրական օրենսգրքով, որը կարող է երաշխավորել ընտրությունների արդար և թափանցիկ անցկացում: Փոփոխված Ընտրական օրենսգրքով ռեյտինգային ընտրակարգը դուրս է գալիս, ու մենք այդ չարիք ընտրակարգը չենք ունենալու: Դա չարիք էր և ապացուցվեց 2017 թվականի ապրիլին կայացած խորհրդարանական ընտրություններին՝ հիմնական շեշտը դրվեց ռեսուրսների ու լծակների, ոչ թե քաղաքական, գաղափարական պայքարի վրա»,- ասել է Անժելա Խաչատրյանը և հավելել, որ Վենետիկի հանձնաժողովի գնահատականը աքսիոմա չէ և պետք  չէ կառչել այդ գնահատականից:

«Վենետիկի հանձնաժողովը խորհրդակցական մարմին է, դա վերջին հանգրվանը չէ օրենսգրքի փոփոխության ու օրենսգրքի հետ կապված գնահատականների: Կարևորագույն  հանգրվանը մեզ համար ՀՀ քաղաքացին է»,- նշել է «Ազատ դեմոկրատներ» կուսակցության փոխնախագահը՝ բարձր գնահատելով Ընտրական օրենսգրքում տեղ գտած մի շարք փոփոխությունները, որոնցից մի քանիսը նաև եղել է իրենց կուսակցության առաջարկով:

SHANTNEWS.am-ի հարցին, թե «Ազատ դեմոկրատներ»-ը պատրաստվո՞ւմ է մասնակցել խորհրդարանական ընտրություններին, Խաչատրյանը վստահեցրել է, որ կուսկացությունը մասնակցելու է.

«Մենք միշտ նշել ենք, որ փոփոխությունների կողմնակից ուժ ենք, միշտ ենք այդպիսին եղել: Փոփոխությունների այդ թափանիվը արդեն շարժվել է, և «Ազատ դեմոկրատներ» կուսակցությունը, դրա մի մասը լինելով, պետք է նաև այս ընտրություններում իր գործուն և ակտիվ մասնակցությունն ունենա և լինի խորհրդարանում, որովհետև այն մոտեցումներն ու գաղափարները, որոնք ներկայացնում ենք մենք և մեր համակիրները, պետք է անպայման տեղ ունենան ՀՀ խորհրդարանում»: