ՀՀԿ-ն հասկանում է` Ռոբերտ Քոչարյանի հետ ցանկացած ձևաչափով միանալը իրեն միայն կվնասի. Խառատյան

ՀՀ երկրորդ նախագահ Ռոբերտ Քոչարյանը օրերս հարցազրույց է տվել Bloomberg-ին, որտեղ անդրադարձել է Հայաստանում տիրող ներքաղաքական իրավիճակին, իր մտահոգություններն արտահայտել: Սա երկրորդ նախագահի առաջին հարցազրույցը չէ օտարերկրյա լրատվամիջոցին:

Ազգագրագետ Հրանուշ Խառատյանը SHANTNEWS.am-ի հետ զրույցում կարծիք հայտնեց, որ դրանք առավելապես ինքնապաշտպանական հարցազրույցներ են: Խառատյանը նշեց, որ Ռոբերտ Քոչարյանի հայտարարությունների մեջ էլ հակասություններ կան, մեկ նա վերադառնում է քաղաքականություն, մեկ, կարծես թե, չի վերադառնում, մեկ համարում է, որ բացառում են իր համար ճանապարհները, մեկ հայտարարում, որ իր դեմ անձնական ատելություն կա, մասնավորապես Նիկոլ Փաշինյանի կողմից:

«Նա շատ շրջահայացորեն անընդհատ խուսափում է իր անձի և անցյալի, իր նախագահության շրջանի նկատմամբ Հայաստանի հասարակության վերաբերմունքի քննարկման հարցերից: Դա հիմա էլ ավելի շատ ինքնապաշտպանական է, բայց կարծում եմ, որ նրա թափը թուլացել է, որովհետև ենթադրաբար նրա գլխավոր հենարանը պետք է լինեին ՀՀԿ-ն և ԲՀԿ-ն, բայց կարծեք այս երկուսն էլ, հատկապես ՀՀԿ-ն, առաջին փորձերից հետո, որ Ռոբերտ Քոչարյանի հետ կարող են կազմել ինչ-որ միասնություն, կամ միավորվեն, համատեղ լինեն ինչ-որ տարբերակով, հիմա այդ հնարավորությունը զգալիորեն թուլանում է, և ակնհայտ է, որ մասնավորապես ՀՀԿ-ն առհասարակ, որպես կուսակցություն, թեկուզ փոքր տոկոսով որպես խմբակցություն շարունակելու խնդիրը անհամեմատ կարևորում է և հասկանում է, որ Ռոբերտ Քոչարյանի հետ ցանկացած ձևաչափով միանալը միայն կվնասի իրեն»,- ասաց նա:

Ազգագրագետը, արձագանքելով երկրորդ նախագահի հայտարարությանը, թե դեմ չէ ակտիվ քաղաքական փոխգործակցությանը տարբեր ուժերի հետ, ընդգծեց` նա միշտ էլ դեմ չէ, սակայն կարծում է, որ այժմ ուժեր, որպես կայունացած և կայացած խմբեր, արդեն չեն գործակցի նրա հետ. անձեր կարող է դեռ իր շուրջը կան, բայց Խառատյանի կարծիքով`ակնհայտ երևում է, որ դրանք հենց այն անձերն են, որոնք որևէ հեղինակություն չունեն հասարակությունում, ոչ հուսալի ինքնապաշտպանական վահան են Ռոբերտ Քոչարյանի համար, ոչ հուսալի քաղաքական թիմ:

Հարցազրույցում երկրորդ նախագահը մտահոգություն էր հայտնել, որ դեկտեմբերին անցկացվելիք խորհրդարանական արտահերթ ընտրությունները կլինեն Փաշինյանի անձնական տակտիկական հաղթանակը, բայց պարտություն մեր պետականության համար: Արձագանքելով այս մտահոգությանը` Խառատյանը նշեց, որ շատ քիչ է ենթադրում, թե Ռոբերտ Քոչարյանին որևէ ձևաչափով հետաքրքրում է պետության հեռանկարը, բայց սկզբունքորեն կարծում է, որ իսկապես դեկտեմբերի համար նախատեսվող և նախապատրաստվող ընտրություններն առայժմ կարող են բերել միաբևեռ խորհրդարանի, ընդ որում, ընտրող բնակչության մտահոգությունը շատ ավելի բևեռված է հեղափոխությունը պաշտպանելուն, քան թե իսկապես կուզենային այդպիսի խորհրդարան ունենալ:

«Զգացողությունս այնպիսին է, որ մարդիկ գերադասում են պաշտպանել հեղափոխությունը նույնիսկ միաբևեռ խորհրդարան ունենալու հեռանկարը աչքի առաջ ունենալով, որը վերլուծական հանրության կողմից բնականաբար ամենացանկալի բանը չէ:

Սա կարող է ինչ-որ չափով ազդել մեր ընդհանուր ցանկալի ընթացքի վրա, եթե, իհարկե, «Քաղաքացիական պայմանագիր»-ը չկարողանա այդ խորհրդարանում իր իսկ կողմից դրված արժեքները լրջորեն պաշտպանել, այդ թվում` վարչապետին տրված լիազորությունները նվազեցնել, իշխանության ուզուրպացիա չանել. սրանք բարդ խնդիրներ են, որոնք կախված են թե՛ իրենց ներքին պատրաստակամությունից ու պատրաստվածությունից, թե՛ երկրում առաջիկայում հնարավոր ծավալվելիք քաղաքական իրադարձությունից, երկխոսությունից, առաջարկվող, առաջացող մարտահրավերներից:

Կարող են լինել և՛ օբյեկտիվ, և՛ սուբյեկտիվ նախադրյալներ, ես վստահ չեմ կարող ասել, ինչպես կլինեն զարգացումները, այնուամենայնիվ, շարունակում եմ հույսեր ունենալ, որ խորհրդարանը կունենա պատշաճ ընդդիմախոսներ, որ հավասարակշռվեն, եթե այսպիսի ընթացք ստանա, իհարկե:

Բայց ես ավելի հակված եմ մտածելու, որ առաջիկա 4-5 տարիներին հասարակությունը կկարողանա այդ բացարձակ խորհրդարանական հնարավոր մեծամասնության նկատմամբ պահել որոշ ազդեցություն, մինչև երկրում ձևավորվեն այն քաղաքական բևեռները, որոնք մեր հասարակության տարբեր կողմերի կամքի արտահայտողները կլինեն` սա արդեն ոչ թե այս, այլ առաջիկա ԱԺ-ում»,- նշեց Խառատյանը: