Երևանի երկնքում ինքնաթիռներով բարձրագույն պիլոտաժի հնարքներ ցուցադրեցին ռուս հայտնի օդաչուները

Էրեբունու օդանավակայանում այսօր բաց դռների օր էր: Մարդիկ ուսումնասիրում էին այնտեղ գործող ռուսական բազայի ինքնաթիռները, ուղղաթիռներն ու առկա զինամթերքը: Երեխաները բարձրանում էին զինտեխնիկայի վրա ու լուսանկարվում։ Բայց միջոցառման «մեխը» Ռուսաստանից ժամանած վարպետ օդաչուների թռիչքներն էին: Նրանք եկել էին ավիաբազային ու Երևանի 2800-ամյակը շնորհավորելու։

Ավիաբազայի հրամանատարը ողջունում է հյուրերին ու կեսկատակ խնդրում՝ տեխնիկայի վրայից ոչինչ չպոկել, չտանել. այդ տեխնիկան դեռ պետք է մարտական հերթապահություն իրականացնի։

«Հյուրերի մեջ են մեր կանայք, մեր երեխաները, որոնց հետաքրքիր է՝ իրենց հայրերն ինչով են այստեղ զբաղված առավոտից երեկո։ Հավատացեք՝ այստեղ միայն տոներ չեն, այստեղ նաև մարտական պատրաստության խիստ օրեր են լինում, նորոգման ու սպասարկման աշխատանքներ», – հավաքվածներին ուղղված իր խոսքում ասաց ռուսական ավիաբազայի հրամանատար Ալեքսանդր Պետրովը։

20 տարի առաջ այս ինքնաթիռները տեղափոխվել են Երևան՝ Հայաստանի օդային տարածքը պաշտպանելու համար։ Այսօր Ռուսաստանից ժամանած վարպետ օդաչուները հենց սրանցով կատարեցին բարձրագույն պիլոտաժի հնարքները։

Այս հնարքները միայն ցուցադրության համար չեն։ Մարտական պայմաններում այսպիսի հնարքներով կարելի է փախչել հակառակորդի հետապնդումից կամ ընկնել նրա հետևից։ Իսկ հիմա օդաչուները ծայրահեղ արագ ու ծայրահեղ դանդաղ, գերցածր ու խմբային թռիչքներով տանջում են ինքնաթիռները՝ դրանց հնարավորությունները առավելագույնս ներկայացնելու համար։

Երևանի բազան ոչ այնքան հեռու է Թուրքիայի սահմանից, ու դա իր դժվարությունն է առաջացնում։ Բայց բազայի հրամանատարությունը գոհ է այստեղից, այստեղ թռչելու հնարավորությունից։

«Ե՛վ շատ պատվաբեր է, և՛ բավական դժվար է, որովհետև հասկանում եք՝ մենք թռիչքներ ենք կատարում ժամանակակից կործանիչներով, բարձր արագություններով, մեծ աղմուկով, և մենք ի վերջո զինծառայողներ ենք ուրիշ երկրում։ Եվ մենք հնարավորինս ապահովում ենք անվտանգությունը, փորձում ենք չաղմկել վաղ առավոտյան և չթռչել ուշ երեկոյան։ Երբեմն ստիպված ենք, բայց փորձում ենք նվազեցնել դա։ Այստեղ թռչելը հարմար է, պատվաբեր է ու հաճելի», – արդեն թռիչքներից հետո ShantNews.am-ի լրագրողին հայտնեց բազայի հրամանատարը։

Հարցին, թե արդյո՞ք չի խանգարում բազայի՝ թուրքական սահմանին մոտ լինելը, բազայի հրամանատարը պատասխանեց, որ իրենց օդաչուների վարպետությունն ու ինքնաթիռների հնարավորությունը թույլ են տալիս խուսափել արգելված սահմանն անցնելուց։

Վերջապես թռիչքների ավարտից հետո մոտենում է նաև Երևանի օդում հնարքներ արած օդաչուներից մեկը։

«Ինքնաթիռները հիանալի վիճակում են։ Հզոր են ու լավագույն վիճակում։ Ոչինչով չեն տարբերվում մեր ինքնաթիռներից, մերն էլ նույն մարտական ինքնաթիռներից են», – ասաց բարձրագույն պիլոտաժի «Ստրիժի» խմբի օդաչու Դմիտրի Կոսոռուկովը։

Թռիչքներից հետո անմիջապես սկսում են սպասարկել ինքնաթիռները, լրացնել վառելիքը։ Ցուցադրությունը ցուցադրություն, բայց անհրաժեշտության դեպքում դրանք պետք է պատրաստ լինեն մարտական խնդիրներ կատարելուն։