«Ես իմ ամբողջ թիմով, մեկ մարդու պես իմ ձայնը տալու եմ ժողովրդի թեկնածուին». Գագիկ Ծառուկյան

Քիչ առաջ SHANTNEWS-ը հաղորդել էր, որ Գագիկ Ծառուկյանը սատարում է Նիկոլ Փաշինյանին: Գագիկ Ծառուկյանը «Կենտրոն» ՀԸ-ի «Ուրվագիծ» հաղորդման եթերում արդեն ներկայացրել է իր դիրքորոշումները կապված երկրի ներքաղաքական իրավիճակի հետ: Նա նշել է, որ շարժմանը շատ դրական է վերաբերվում:

«Ամենակարևորը ուզում եմ ասել, որ այս շարժումը ոչ թե 1 տարվա, կամ 2 տարվա հարց էր, այլ ժողովդրի մեջ կուտակված դժգոհությունն էր, իրենց խոսքը անարդարության հանդեպ, կոռուպցիայի հանդեպ, մենաշնորհի, տնտեսական, քաղաքական, հարկային բանակային: Այդ թվարկվածները տարիների ընթացքում կուտակված հարցեր էին և  ՀՀԿ-ն ոչ ճիշտ պահվածքն ուներ ժողովրդի հանդեպ և ժողովրդի մեջ արդեն կուտակվել էր ատելություն, անվստահություն: Ամեն անգամ ընտրություն ասելով, հասկանալի էր դառնում, որ բոլոր ճանապարհները տանում են դեպի Մելիք Ադամյան: Ժողովրդի մոտ պայթյունավտանգ իրավիճակ է և մենք գիտակցում էինք, զգում էինք, բայց չգիտեինք, թե երբ է դա լինելու ու ամենակարևորը տեսանք, որ եղավ: Այո՛, ժողովուրդը միանգամից ոտքի կանգնեց»,- ասաց Գագիկ Ծառուկյանը: Այնուհետև խոսքը շարունակելով ասաց, որ այս վերջին իրադարձությունները, իրապես, կարելի է համարել հենց ժողովրդի հաղթանակը, նրանք պայքարել են հանուն իրենց ապագայի, արդարության և հանուն իրենց կյանքի:

Այս խոսքերից հետո հաղորդավար Պետրոս Ղազարյանը Ծառուկյանից հետաքրքրվել է, թե նա ինչ դիրքորոշում ունի մայիսի 1-ին կայանալիք ԱԺ հատուկ նիստում վարչապետի թեկնածության և ընտրության վերաբերյալ: Հարցին ի պատասխան՝ Ծառույանը նշել է.

«Մեր դիրքորոշումն այլ կերպ չի կարող լինել: Հաղթանակը ժողովրդինն է, և որիցե մեկը բարոյական իրավունք չունի այդ հաղթանակն իր վրա վերցնելու: Հաղթանակը ժողովրդինն է, ժողովուրդը պետք է որոշի ու առաջարկի թեկնածուին: Ես իմ ամբողջ թիմով, մեկ մարդու պես իմ ձայնը տալու եմ ժողովրդի թեկնածուին: Մենք թեկնածու չենք առաջադրելու, դա ժողովդրի հաղթանակն է, և մենք պաշտպանել ենք ժողովրդի ներկայացրած թեկնածուին»,- ասել է Գագիկ Ծառուկյանը:

Ղազարյանը դիտարկում է արել, թե ժողովդրի թեկնածուն Նիկոլ Փաշինյանն է, ինչին Ծառուկյանն այսպես է արձագանքել.

«Ժողովրդի թեկնածուն Նիկոլն է, Սասունն է, թե Արարատը, նորից եմ ասում, ժողովրդի թեկնածուն նա է, ում կհայտարաի ում կներկայացնի, մենք մի մարդու պես մեր ձայնը տալիս ենք ժողովրդի թեկնածուին»,- ասել է Ծառուկյանը: