Գյումրեցի սամբիստները կմասնակցեն սամբոյի աշխարհի առաջնությանը

Հայաստանի մեծահասակների սամբոյի հավաքականը պատրաստվում է նոյեմբերին Ռումինիայի մայրաքաղաք Բուխարեստում կայանալիք  աշխարհի առաջնությանը։ Միջազգային կարևոր ստուգատեսում Հայաստանը կներկայացնեն ինը սամբիստներ, նրանցից չորսը գյումրեցի մարզիկներն են, ովքեր  Հայաստանի առաջնության  չեմպիոններ են։ Մինչ  մեծահասակների աշխարհի առաջնությունը հոկտեմբերի 11-ից 15-ն էլ Թբիլիսիում կանցկացվի պատանիների աշխարհի առաջնությունը։ Այս ստուգատեսում էլ Գյումրին կներկայացնի 20 ամյա  Արտյոմ Ավետիսյանը։

Արտյոմ Ավետիսյանը մի քանի օր առաջ է ստացել սպորտի վարպետի կոչում: Միջազգային հարթակներում լավագույն արդյունքները  գրանցելու շնորհիվ է երիտասարդ տարիքում հասցրել վաստակել այդ կոչումը: Նա պատանիների Եվրոպայի առաջնության բրոնզե մեդալակիր է: Արտյոմ Ավետիսյանը այսօրվանից կմասնակցի Սամբոյի աշխարհի պատանիների առաջնությանը։

2017 թվականի  Սամբոյի աշխարհի առաջնության բրոնզե մեդալակիր Մաքսիմ Մանուկյանը ստացած վնասվածքի պատճառով նախորդ մրցաշարերին չի մասնակցել: Նոր է սկսել վերականգնել մարզավիճակը, որպեսզի նոյեմբերին մեծահասակների աշխարհի առաջնությանը ներկայանա: Նպատակն է բարելավել ցուցանիշները և այս անգամ Հայաստան վերադառնալ հաղթանակով։

«Պատրաստվում եմ աշխարհի առաջնությանը, շատ լավ եմ հիմա պատրաստված, վնասվածքս արդեն վերականգնվել է: Ինչ, որ բաց եմ թողել Եվրոպայի առաջնությանը, պետք է դա անեմ  այս աշխարհի առաջնությանը»,- իր մարզավիճակի ու մարզումների մասին է խոսել սամբոյի աշխարհի բրոնզե մեդալակիր Մաքսիմ Մանուկյանը:

Մաքսիմ Մանուկյանի հետ Բուխարեստում կայանալիք սամբոյի մեծահասակների աշխարհի առաջնությանը կմասնակցեն նաև Գյումրիի սամբո-ձյուդոյի մարզադպրոցի մարզիկներ Գոռ Մայիլյանը,Գրիգոր Սահակյանն և 52 կգ քաշային կարգում աշխարհի գործող  չեմպիոն Գրիգոր Մխիթարյանը, ով  աշխարհի չեմպիոնի տիտղոսը պահպանելու համար ակտիվ մարզումներ է անցկացնում։ Վստահ է, որ Բուխարեստից ևս հաղթանակած կվերադառնա։

Սամբոյի Հայաստանի գործող չեմպիոններ Գոռ Մայիլյանն ու Գրիգոր Սահակյանը մեծահասակների հավաքականի կազմում առաջին անգամ են մասնակցելու աշխարհի առաջնությանը, մարզումներն անցկացնում են մայրաքաղաքում։ Նոր հաջողություններ գրանցելու հավակնությունները մեծ են:Հայաստանի մեծահասակների հավաքականի կազմում են տարբեր քաշային կարգերում հանդես եկող ինը սամբիստներ։ Աշխարհի առաջնությունը նրանց համար կլինի միջազգային կարևոր ստուգատես, իսկ հաջորդ տարի կմասնակցեն վարկանիշային մրցաշարերի, որոնք կդառնան պարտադիր, եթե սամբոն ևս ընդգրկվի օլիմպիական մարզաձևերի ցանկում :