Հյուսիսային և Հարավային Կորեաների ղեկավարների պատմական հանդիպման հիմնական արդյունքները

Կորեական թերակղզում շարունակում են մեծ ոգևորությամբ քննարկել երեկ տեղի ունեցած միջկորեական գագաթաժողովը: Անդրադառնալով երկու Կորեաների ղեկավարների պատմական հանդիպմանը՝ Հյուսիսային Կորեայի պետական լրատվական գործակալությունը նշել է, որ այն Կորեական թերակղզու համար շրջադարձային նշանակություն կունենա: Հանդիպման մասին տարբեր անդրադարձերը ողողել են նաև հարավկորեական մամուլի առաջին էջերը:

Երեկ՝ ապրիլի 27-ին, Հյուսիսային Կորեայի ղեկավար Կիմ Չեն Ինը Փանմունջոմ ապառազմականացված գոտում հանդիպել էր Հարավային Կորեայի նախագահ Մուն Չժե Ինի հետ: Դա միջկորեական թվով երրորդ գագաթաժողովն էր:

Մասնագետներն այդ պատմական հանդիպումը շատ դրական են գնահատել: Պատմական հանդիպման առաջին արդյունքը եղել է գործող զինադադարի փոխարեն խաղաղության պայմանագիր ստորագրելու որոշումը. այն պաշտոնապես վերջ կդնի Կորեական պատերազմին: Գագաթաժողովի արդյունքների վերաբերյալ կողմերը համատեղ հռչակագիր են ստորագրել, որն ամրապնդել են գրկախառնությամբ: Կորեական թերակղզում այլևս պատերազմ չի լինի՝ ահա հռչակագրի գլխավոր կետերից մեկը:

«Այսօր նախագահ Կիմ Չեն Ինը և ես հաստատեցինք, որ մեր ընդհանուր նպատակն է լիովին ապամիջուկայնացնել Կորեական թերակղզին: Հյուսիսի կողմից միջուկային ծրագրի սառեցումը շատ մեծ նշանակություն ունի: Դա սկիզբ կդնի Կորեական թերակղզու լիակատար ապամիջուկայնացմանը: Մենք հստակ հայտարարում ենք, որ Հարավն ու Հյուսիսը սերտորեն կհամագործակցեն լիակատար ապամիջուկայնացման ուղղությամբ», – հայտարարել է հարավկորեական ղեկավար Մուն Չժե Ինը:

Հյուսիսային Կորեայի ղեկավարը նույնպես դրական է գնահատել երկու Կորեաների համագործակցության հեռանկարները:

«Նախագահ Մուն Չժե Ինը և ես ընդունեցինք և ստորագրեցինք Փանմունջոմի հռչակագիրը, որն արտացոլում է այն բազմաթիվ միջոցառումները, որոնք ուղղված են Կորեական թերակղզում խաղաղությանը, բարգավաճմանը և վերամիավորմանը: Եթե Փանմունջոմը, որը սրտակեղեք բաժանման խորհրդանիշն է, դառնա խաղաղության խորհրդանիշ, ապա Հյուսիսի և հարավի մարդիկ, որ ունեն նույն արյունը, նույն լեզուն, նույն պատմությունն ու նույն մշակույթը, նորից կմիավորվեն և սերունդները կվայելեն բարեկեցություն», – նշել է Կիմ Չեն Ինը:

Հռչակագրի կետերից է նաև երկիրը բաժանող ապառազմականացված գոտին խաղաղության գոտու վերածելը և քարոզչություն տարածող հեռարձակումների դադարեցումը, սահմանը հատող երկաթգծերի և ճանապարհների բարելավումը, համատեղ մասնակցությունը տարբեր միջոցառումների, ինչպես նաև ԱՄՆ-ի և Չինաստանի մասնակցությամբ քառակողմ բանակցությունների կազմակերպումը:

Երկու Կորեաների ղեկավարների հանդիպումը բավականին դրական արձագանք է ստացել տարբեր երկրների կողմից, այդ թվում՝ Չինաստանի, Ճապոնիայի և ԱՄՆ-ի: