Օլիգարխիկ ուժերը հինգերորդ շարասյուն են, որ կեղեքել ու թալանել են երկիրը. Գարեգին Չուգասզյանը` արտահերթ խորհրդարանական ընտրությունների մասին

«ԱԺ նոր ընտրություններով արձանագրվելու է քաղաքական դաշտի վերաֆորմատավորումը: Քաղաքական դաշտ գոյություն չուներ, կար ավտորիտար, անհատապաշտական համակարգ, որը դեկորատիվ բազմակուսակցական տեսք ուներ: Հիմա փաստորեն կարելի է ասել, որ երեսուն տարվա հեռավորությամբ երկրորդ փուլ ենք մտնում, երբ պետականաշինությունը ռեալ հնարավորություն է ստանում ձևավորելու նոր խորհրդարան, ժողովրդավարական համակարգ, որտեղ կուսակցությունների ձևակազմը լինելու է որակապես այլ` նախորդ երեսուն տարիների համեմատ», – այս մասին այսօր՝ հոկտեմբերի 5-ին հրավիրված ասուլիսի ժամանակ ասաց «Սասնա ծռեր» կուսակցության անդամ Գարեգին Չուգասզյանը:

Նրա խոսքերով՝ «Սասնա ծռեր» կուսակցությունը հիմնադրվեց, քանի որ պետական քաղաքական դաշտը ձևավորելու այլ ճանապարհ չկար, քան կուսակցության հիմնումը: Հիմնական խնդիրներից մեկը, ըստ Չուգասզյանի, միակուսակցական համակարգից հրաժարվելն է, սակայն այստեղ տեսնում է վտանգ, որն  առկա էր առաջին ժողովրդավարական հեղափոխությունից հետո` ՀՀՇ-ի պարագայում:

«Քանի որ այդ ընթացքում պետականաշինության շինհրապարակում չկար վերահսկողություն՝ հանգեցրեց թալանի, և ազնիվ մարդիկ շրջապատվեցին բյուրակրատական ապարատով,  խեղդվեցին էդ ճահճով, և ստացանք միակուսակցական համակարգի մի այլանդակ ճահիճ: Սա նկատի ունենալով՝ պետք է մտածենք, թե ինչ ձևակազմ է հնարավոր այսօրվա իրականության մեջ: Լսում ենք, հետևում ենք իրադարձություններին և տեսնում ենք, որ փորձ  է արվում օլիգարխիկ շրջանակների կողմից ստեղծել երևութականություն՝ իբր օլիգարխիան կարող է առնել միակուսակցականության դեմը: Այդ օլիգարխիկ ուժերը ոչ թե ազգային բուրժուազիայի ներկայացուցիչ են, այլ հինգերորդ շարասյուն, որ կեղեքել են երկիրը, թալանել: Իրենց հետ բանակցություն վարելու փոխարեն պետք է իրենց դիտել որպես հանցագործ», – ասաց Չուգասզյանը:

Ըստ Չուգասզյանի՝ օլիգարխիկ ուժերը պետք է դուրս մնան խորհրդարանից, և ձևավորվի հակակշռով երկրորդ բևեռը, իսկ այդ բևեռը կարող  է լինել հենց «Սասնա ծռեր» կուսակցությունը:

«Քաղաքական շինհրապարակը պետք է ունենա վերահսկողություն, պետք է ունենա երկրորդ բևեռ, և չպետք է լինի օլիգարխիան: Մենք մեր մոտեցումներում ավելի նման ենք սկանդինավյան սոցիալ-դեմոկրատական մոտեցումներին, մտադիր ենք համագործակցել ամենատարբեր խավերի հետ և ներկայացնել նրանց շահերը լայն սպեկտրով»,- ընդգծեց Չուգասզյանը: