Ազնավուրն այն մարդն է, ով ապրել է պատմական հայրենիքի և իր ժողովրդի հոգսերով ու երազանքներով. Փաշինյանի հրաժեշտի խոսքը Ֆրանսիայում

ՀՀ վարչապետ Նիկոլ Փաշինյանը Ֆրանսիայում մեծանուն ֆրանսահայ շանսոնյե Շառլ Ազնավուրի հրաժեշտի արարողության ժամանակ հայ ժողովրդի սերն ու նվիրումն արտահայտեց սիրված երգչին: Վարչապետը նշեց` 8 տասնամյակ այս անունը ժպիտ է փորագրել միլիոնավոր դեմքերի վրա, արագացրել են կամ դանդաղեցրել տասնյակ միլիոնավոր մարդկանց շնչառությունը, փայլ է ներարկել հարյուր միլիոնավոր աչքերի մեջ, և այս անունը 2018 թ. հոկտեմբերի 1-ին մի պահ կանգնեցրեց երկիր մոլորակի և միջազգային կյանքի ընթացքը: «94 տարեկանում մահացել է Շառլ Ազնավուրը». աշխարհի առաջատար լրատվամիջոցներում հայտնված այս վերնագիրը, ըստ վարչապետի, պատմում է ճակատագրի նկատմամբ մեծանուն երգչի տարած փառահեղ հաղթանակի մասին:

«Նա երգեց և մարդկանց հասկացրեց, որ համաշխարհային մշակույթի երկնակամարում մի նոր մեծ աստղ է ծագել, որ դեռ մի քանի տասնյակ տարի պետք է պայթեցնի աշխարհի ամենահեղինակավոր դահլիճները: Նրա ձայնը տարածվեց աշխարհի բոլոր կողմերում, հասավ ամենահեռավոր երկրները և ջերմացրեց նույնիսկ ամենասառը սրտերը: Ցավոք, ես չհասցրեցի անձամբ ծանոթանալ մեծ վարպետի` Շառլ Ազնավուրի հետ, բայց հավատացեք, ես նրան ընկալում եմ որպես մերձավոր հարազատի, նրան այսպես ընկալում է ցանկացած հայ, որովհետև Ազնավուրն այն մարդն է, ով հայի անունը հասցրել է նոր բարձունքների, ով հայի հպարտությանը նոր ուժ է տվել ու նոր երանգ, ով կարողացել է ապրել իր պատմական հայրենիքի և իր ժողովրդի ցավերով, հոգսերով ու երազանքներով»,- ասաց Փաշինյանը` նշելով, որ նաև այս է պատճառը, որ Շառլ Ազնավուրին շնորհվել է Հայաստանի Ազգային հերոսի կոչում:

Փաշինյանն ասաց, որ Երևանում Ազնավուրի անունը կրող հրապարակ կա, Հայաստանի երկրորդ քաղաք Գյումրիում արդեն երկար տարիներ վեր է խոյանում նրա մեծաշուք արձանը, և Ազնավուրը, թերևս, միակ մարդն է, ում արձանը կենդանության օրոք կանգնեցվել է Հայաստանում:

«Նրա մահվան կապակցությամբ Հայաստանում սուգ է հայտարարված, այս ամենն արտահայտումն է այն հսկայական սիրո, որ յուրաքանչյուր հայ, առանց բացառության, տածում է այս մեծ մարդու, մեծ ֆրանսիացու, աշխարհի այս մեծ քաղաքացու նկատմամբ»,- ասաց նա:

Խոսքն ուղղելով Ֆրանսիայի նախագահ Էմանուել Մակրոնին` Փաշինյանը նշեց, որ Շառլ Ազնավուրի հրաժեշտի այս վեհաշուք արարողության ընթացքում չի կարող չարտահայտել այն մեծ հարգանքն ու երախտագիտությունը, որ հայ ժողովուրդը տածում է Ֆրանսիայի ու ֆրանսիացիների նկատմամբ, նա հայ ժողովրդի երախտագիտությունն արտահայտեց նրանց` ցեղասպանությունից մազապուրծ մեր ժողովրդին օթևան տալու և հայկական տաղանդի զարգացման բարենպաստ միջավայր ձևավորելու համար:

«Ֆրանսիայի հայությունը տվել է այնպիսի անուններ, ինչպիսիք են Շառլ Ազնավուրը, Անրի Վեռնոյը, Ժորժ Գարվարենցը, Գառզուն, Ժանսեմը: Ֆրանսիան մեր ժողովրդի վերածննդի մի սիրելի օազիս է դարձել: Շառլ Ազնավուրը Ֆրանսիայի մեծ նվիրյալ էր, մեծ քաղաքացի, ֆրանսերենի տարածման մի անկրկնելի մունետիկ, բայց նաև Հայաստանի մեծ պաշտպան էր, Հայաստանի քաղաքացի և ՀՀ դեսպան: Նա ապրում էր Հայաստանի հոգսերով, և մեր ժողովուրդը նրա հոգատարությունը տեսել ու զգացել է 30 տարի առաջ տեղի ունեցած մեծ երկրաշարժի ժամանակ՝ Հայաստանի անկախության բոլոր դժվար օրերին: Նա անտարբեր չմնաց նաև Հայաստանում տեղի ունեցած ոչ բռնի, թավշյա հեղափոխության նկատմամբ: Ինձ ուղղված նամակում գրել է. «Հենց որ առողջությունս թույլ տա, ջերմորեն փափագում եմ այցելել այս նոր Հայաստանը, ծանոթանալ այն առողջ ուժերին, որոնք ձևավորելու են մեր ազգի գալիքը»»,- ասաց վարչապետը:

Փաշինյանը հայտնեց, որ մեծ վարպետը պատրաստվում էր Հայաստան այցելել հաջորդ շաբաթ` Ֆրանկոֆոնիայի միջազգային կազմակերպության 17-րդ գագաթնաժողովի առիթով, և ինքը խոստացել էր սիրված երգչին ծանոթացնել նոր Հայաստանի հետ, խոստացել էր, որ նա միանգամից կզգա նոր Հայաստանի հաղթանակած քաղաքացու լավատեսությունն  ու ոգին: Վարչապետը ցավով նշեց, որ այս խոստումը չկարողացավ կատարել, հավելեց` սփոփանքն այն է, որ Ազնավուրը, այնուամենայնիվ, հասցրեց իր վերջին ուղերձը հղել նոր Հայաստանին` իրեն ուղղված նամակում ասելով. «Սրտանց փափագում եմ, որ հայ երիտասարդը կարողանա երբևէ դրսևորել իր ողջ ներուժը և իր երազանքներն իրականություն դարձնել Հայաստանում»:

«Սիրելի՛ վարպետ, մեծարգո՛ Շառլ Ազնավուր, Ձեր նամակում Դուք ճշգրտորեն ձևակերպել եք այն, ինչ ուզում է հայ ժողովուրդը, Հայաստանի երիտասարդությունը, և այստեղ` հիմա, աշխարհի աչքի առաջ, ուզում եմ հանդիսավոր կերպով Ձեզ խոստանալ, որ իրականություն կդարձնենք ձեր պատգամը, կյանքի կկոչենք ձեր ցանկությունը, ուզում եմ հավաստիացնել, որ անմնացորդ նվիրված եմ այն գործին, որ նոր Հայաստանը պիտի դառնա այնպիսին, ինչի մասին Դուք երազում էիք: Ազատ և երջանիկ Հայաստանն իսկապես արժանի գնահատանք կլինի Հայաստանի և հայ ժողովրդի նկատմամբ Ձեր ունեցած անուրանալի վաստակին: Խոնարհվում եմ  Ձեր առաջ, մեծ ֆրանսիացի, մեծ հայ, մեծ արվեստագետ, մեծ հումանիստ: Ննջի՛ր խաղաղությամբ, սիրելի՛ վարպետ»,- ելույթը եզրափակեց վարչապետը: