Հանրապետականները ճիշտ կանեն` համաձայնեն գնալ արտահերթ ընտրությունների. քաղաքագետ

Վարչապետ Նիկոլ Փաշինյանի՝ խորհրդարանը ցրելու և արտահերթ խորհրդարանական ընտրություններ անցկացնելու նախաձեռնությունը հաջողություն կունենա: SHANTNEWS.am-ի հետ զրույցում նման տեսակետ հայտնեց քաղաքագետ Արմեն Բաղդասարյանը:

Նրա կարծիքով` արտահերթ խորհրդարանական ընտրությունների անցկացումն այս պահին ձեռնտու չէ միայն ՀՀԿ-ին և ՀՅԴ-ին, իսկ «Բարգավաճ Հայաստան»-ին, օրինակ, կարող է ձեռնտու լինել, որովհետև նրանք Երևանի ավագանու ընտրություններում շարունակում են մնալ երկրորդ քաղաքական ուժը: Քաղաքագետը համոզմունք հայտնեց, որ ԲՀԿ-ն խորհրդարանական արտահերթ ընտրությունների ժամանակ էլ վստահաբար կպահպանի երկրորդ ուժի դիրքերը:

«Լույս» դաշինքը, ըստ Բաղդասարյանի, ակնհայտորեն կողմ կլինի այդ ընտրությունների անցկացմանը, ԲՀԿ-ն ևս բանակցությունների արդյունքում կողմ կլինի, իսկ հանրապետականները և դաշնակցականները կփորձեն բոլոր հնարավոր ձևերով դիմադրել: Քաղաքագետը կարծում է, որ այս պահին ՀՀԿ-ի շանսերը զրոյական են, հենց դրա համար էլ նրանք ձգտում են հնարավորինս հետաձգել արտահերթ խորհրդարանական ընտրությունները` հույս ունենալով, որ այդ ընթացքում իրենք կվերադասավորեն իրենց ուժերը, սոցիալ-տնտեսական բարդություններն էլ իշխանությունների վարկանիշը կիջեցնեն:

«Այդ հույսով նրանք պիտի փորձեն հնարավորինս երկար ձգձգել, կարծում եմ` դա նրանց չի հաջողվի, որովհետև ամեն դեպքում նոր իշխանություններին կհաջողվի հանրային հզոր ճնշման ներքո հասնել ԱԺ ցրման»,- նշեց նա:

Ճշտմանը` հարցն ամեն դեպքում կհասնի՞ հանրային ճնշման անհրաժեշտությանը, քաղաքագետը պատասխանեց, որ ցանկալի չէր լինի` բանը հասներ հանրային ճնշման, տասնյակ հազարավոր մարդիկ գային, օրինակ՝ ԱԺ շենքը շրջափակեին:

«Դա ամենաանցանկալի տարբերակը կլիներ: Կարծում եմ` ճիշտ կլինի, եթե ՀՀԿ-ն ողջամտություն դրսևորի, առաջնորդվի պետական շահերով, ոչ թե կուսակցական, և ամեն դեպքում բանակցությունները հաջող ընթացք ունենան: Հանրապետականները իրենք էլ քաջ գիտակցում են, որ խորհրդարանում ունեն 50 տոկոս, մինչդեռ հանրային աջակցության անգամ 5 տոկոս չունեն, և սա արտառոց իրավիճակ է, անոմալ իրավիճակ է, որը վնասում է պետությանը: Նրանք ճիշտ կանեն ի շահ պետության, թեկուզ իրենց կուսակցական շահերին դեմ գնալով, գնան արդյունավետ բանակցությունների և, ի վերջո, համաձայնեն գնալ արտահերթ խորհրդական ընտրությունների»,- ասաց Բաղդասարյանը:

Քաղաքագետը նշեց, որ արտահերթ ընտրությունների անցկացման որոշման ընդունման հարցում ավագանու ընտրությունների արդյունքները ևս նպաստել են: Հարցին` արդյոք համապետական ընտրությունների դեպքում ևս կլինի քաղաքական ուժերի նույնպիսի խայտաբղետ մասնակցություն, ինչպես եղավ Երևանի ավագանու ընտրությունների ժամանակ, Բաղդասարյանը պատասխանեց.

«Կարծում եմ, որ ոչ: Շատ ցածր տոկոս ստացած քաղաքական ուժերն այս ընտրություններից դասեր կքաղեն` կամ ընդհանրապես չեն մասնակցի կամ կմիավորվեն, դաշինք կստեղծեն: Կունենանք նաև այլ ուժեր, որոնք այս ընտրություններին չեն մասնակցել. վստահ եմ, որ կմասնակցեն հանրապետականները և «Հայ ազգային կոնգրեսը»: Կարծում եմ` ԲՀԿ-ում բավական կրեատիվ թիմ ունեն և կհարմարվեն, բացի այդ, եթե խոսքը երկրորդ ուժի կարգավիճակի մասին է, ապա շատ մեծ նշանակություն չունի` հաջորդ խորհրդարանում կունենա՞ն 25 տոկոս, 20 տոկոս, թե՞ 10 տոկոս, կարևորը երկրորդ ուժի քաղաքական կարգավիճակն է, որը նրանք ի վիճակի են պահպանել»:

Հարցին` արդյո՞ք համապետական ընտրությունների դեպքում ևս կարելի է ակնկալել հետընտրական խաղաղ գործընթացներ, թե՞ ինչ-ինչ զարգացումներ, այնուամենայնիվ, կլինեն, Բաղդասարյանն արձագանքեց` վստահություն հայտնելով, որ իշխանություններն ազատ, արդար ընտրություններ անցկացնելու քաղաքական կամք կունենան, հետևաբար հետընտրական զարգացումներ էլ չեն լինի, որովհետև պարտված քաղաքական ուժերը պարզապես աղմուկ բարձրացնելու առիթ էլ չեն ունենա:

Քաղաքագետը համոզված է, որ երկրորդ նախագահ Ռոբերտ Քոչարյանը մասնակցելու է ընտրություններին, սակայն դժվարանում է ասել` ինչ ձևաչափով:

«Ես կարծում եմ` Ռոբերտ Քոչարյանն ինքն էլ դեռ այդ հարցում վերջնական որոշում չունի: Որ ինչ-որ ֆորմատով կմասնակցի, չեմ կասկածում: Իհարկե, կմասնակցի, բայց ֆորմատը, կարծում եմ, դեռ ինքն էլ չի որոշել վերջնականապես»,- ասաց նա: