«Ռոմա»-ի և «Յուվենթուս»-ի սենսացիոն խաղերը կստիպեն Վենգերին ավելի զգույշ լինել

Այսօր ՈՒԵՖԱ-ի «Եվրոպա» լիգայի 1/4 եզրափակչի պատասխան խաղերի օրն է: Լոնդոնի «Արսենալ»-ը ԲԿՄԱ-ի դեմ խաղին Մոսկվա է մեկնել 3 գնդակի առավելությամբ:  Մոսկվայում, ըստ ամենայնի, հանդես կգա լոնդոնցիների ուժեղագույն կազմը՝ չհաշված Մխիթարյանի և Ջակայի բացակայությունը: Ջական վատառողջ է, իսկ Մխիթարյանին դեռ կանդրադառնանք:

«Արսենալ»-ի գլխավոր մարզիչ Արսեն Վենգերը չի թաքցնում իր թիմի առավելությունը, բայց նշում է, որ այն իրացնելու համար պարզապես պետք է նորից հաղթել: Չձգտել հաշիվ պահելո  չկենտրոնանալ միայն պաշտպանության վրա, այլ նորից հաղթել:  Այսպիսի մոտեցումը, թերևս, պայմանավորված է Չեմպիոնների լիգայում տեղի ունեցած վերջին սենսացիոն իրադարձություններով: «Ռոմա»-ի հաղթանակին ոչ-ոք չէր հավատում, բայց իտալական ակումբը հաղթեց և դուրս եկավ հաջորդ փուլ «Բարսելոնա»-ին՝  1-4 հաշվով պարտվելուց հետո:

Հրաշք գործած կլիներ նաև «Յուվենթուս»-ը, որը սեփական հարկի տակ «Ռեալ»-ին 3-0 պարտվելուց հետո, Մադրիդում մինչև 97-րդ րոպեն խաղը շահում էր նույն 3-0 հաշվով: Ամեն ինչ փոխեց Ռոնալդուի 11 մետրանոցը, բայց չփոխեց այն չգրված օրենքը, որ ֆուտբոլում ամեն ինչ հնարավոր է: Չեմպիոնների լիգայի վերջին հանդիպումները զգուշավորության ազդանշան Վենգերը, բայց խորհուրդ տվեց չչափազանցնել իրավիճակը:  «Ռոմա»-ի սենսացիոն խաղին անդրադարձավ նաև «Արսենալ»-ի առանցքային խաղացողներից մեկը՝ Շկոդրան Մուսթաֆին:  

«Այդ խաղը մեզ համար իդեալական ժամանակահատվածում տեղի ունեցավ, որպեսզի հասկանանք, որ ֆուտբոլում երբեք չես կարող քեզ  անվտանգ զգալ, նույնիսկ եթե մեծ առավելություն ունես:  Պետք է զգուշավոր լինել և կենտրոնացած:  «Ռոմա»-ն բարդագույն խնդիր լուծեց, բայց ես զարմացած չեմ: Ֆուտբոլում այդպես էլ է լինում»,- նշել է Մուսթաֆին: 

«Պետք է նորից կենտրոնանալ և անել այն, ինչի ունակ ենք: «Եվրոպա» Լիգայում հաղթելն, անշուշտ, մեր գլխավոր նպատակներից է: Եթե անկեղծ լինեմ, Պրեմիեր լիգայում մեր շանսերը մեծ չեն: Մենք այն իրավիճակում ենք, երբ թուլանալ պարզապես չի կարելի», -հայտարարել է Արսեն Վենգերը: 

Ի դեպ, լոնդոնցիների մարզիչը նշել է, որ ռուս-բրիտանական  լարվածությունը չի կարող ազդել ԲԿՄԱ-«Արսենալ» խաղի վրա:  Քաղաքականությունն այստեղ վճռորոշ չէ:  

«Երկրպագուների հետ ևս, կարծում եմ, խնդիրներ չեն լինի: Լոնդոնում՝ առաջին խաղի ժամանակ մեծ թվով ռուսներ կային, և արտառոց ոչինչ տեղի չունեցավ: Ինչո՞ւ պիտի Մոսկվայում ինչ-որ բան տեղի ունենա»:   

 
«Արսենալ»-ին, «Ատլետիկո»-ի հետ համարում են Եվրոպա լիգայի գլխավոր ֆավորիտները: Այդ մասին խաղից առաջ նաև բանակայինների մարզիչն էր նշել:  Վիկտոր Գոնչարենկոն նախախաղային ասուլիսում պատասխանել էր նաև SHANTNEWS.am-ի մոսկովյան թղթակցի այն հարցին, թե արդյո՞ք Մխիթարյանի բացակայությունը կհեշտացնի բանակայինների գործը:  
  
 

«Արսենալ»-ը պահեստայինների շատ երկար նստարան ունի, և այն ֆուտբոլիստը, որը դուրս կգա Մխիթարյանի փոխարեն, անշուշտ, որակյալ խաղացող կլինի: Սակայն նաև կարող եմ ասել, որ նրան փոխարինելը դժվար է, քանի որ նա կարող է տարբեր դիրքերում խաղալ:  Ամեն դեպքում դրանից մեր գործը չի հեշտանում»,-պատասխանել էր Վիկտոր Գոնչարենկոն: 

 
Մխիթարյանն այլևս չի կարողանա խաղալ այս մրցաշրջանում,  եթե «Արսենալ»-ը դուրս չգա «Եվրոպա» լիգայի եզրափակիչ:  Այսպիսի ոչ լավատեսական  կանխատեսումներ է արել բրիտանական The Daily Mirror պարբերականը:  Մինչ այդ Արսեն Վենգերը հույս էր հայտնել, որ մրցաշրջանի վերջնամասում Մխիթարյանին գուցե հաջողվի դուրս գալ մարզադաշտ:  Պրեմիեր լիգայի ավարտին մնացել է 6 տուր, վերջինը տեղի կունենա մայիսի 13-ին: Իսկ Եվրոպա լիգայի եզրափակիչը կկայանա դրանից երեք օր հետո՝ մայիսի 16-ին: Այսպիսով, The Daily Mirror-ը հաշվարկել է, որ «Եվրոպա» լիգայի եզրափակչին Մխիթարյանի խաղալու հնարավորությունն ավելի մեծ է: Բայց մինչ այդ դեռ պետք է «Արսենալ»-ը հասնի եզրափակիչ: 

ԲԿՄԱ-«Արսենալ» հանդիպումը կկայանա այսօր Երևանի ժամանակով 23:00-ին: Խաղի ընթացքին ուղիղ եթերով կարող եք հետևել «Շանթ» և «Շանթ Պրեմիում» հեռուստաալիքներով: