ՀՀ ԱԺ նախագահի տեղակալ Հակոբ Արշակյանի գլխավորած պատվիրակությունը Տաշքենդում հանդիպել է Նորվեգիայի խորհրդարանական պատվիրակության ղեկավար Թելլեֆ Ինգե Մյորլանդի հետ:
Հակոբ Արշակյանը նշել է, որ Հայաստանը շահագրգռված է զարգացնելու հայ-նորվեգական հարաբերությունները:
Հանդիպման ընթացքում քննարկվել են երկու երկրների միջեւ հարաբերությունների ամրապնդմանը, տարածաշրջանում անվտանգության ու խաղաղության հաստատմանը եւ միջազգային անվտանգությանն առնչվող մի շարք հարցեր:
Թելլեֆ Ինգե Մյորլանդն ընդգծել է տեւական խաղաղության համաձայնագրի կնքման կարեւորագույն դերը տարածաշրջանում կայունության եւ բարգավաճման ապահովման գործում: Նա նշել է, որ տարածաշրջանում իրավիճակը շարունակում է բարդ մնալ, բայց միայն կառուցողական երկխոսության եւ խաղաղության հանձնառության շնորհիվ հնարավոր կլինի առաջընթաց արձանագրել:
ՀՀ ԱԺ պատվիրակությունը հրավիրվել է մասնակցելու այս տարի Նորվեգիայում կայանալիք Ինտերնետ կառավարման համաժողովի պատգամավորական հատվածին:
Զրուցակիցները շեշտել են միջխորհրդարանական կապերի խորացման եւ ամրապնդման անհրաժեշտությունը: Կողմերը մեծապես կարեւորել են տնտեսական դիվերսիֆիկացիան, որը կծառայի Եվրոպական միության հետ վիզաների ազատականցման գործընթացին` նպաստելով քաղաքացիների եւ գործարարների տեղաշարժին ու երկու կողմերի միջեւ տնտեսական հարաբերությունների զարգացմանը:
Հակոբ Արշակյանը մանրամասներ է ներկայացրել հայ-ադրբեջանական հարաբերությունների եւ խաղաղ գործընթացի վերաբերյալ:
ՀՀ ԱԺ պատվիրակության կազմում են Ֆինանսավարկային եւ բյուջետային հարցերի մշտական հանձնաժողովի նախագահ Ծովինար Վարդանյանը, Առողջապահության հարցերի մշտական հանձնաժողովի նախագահ Արսեն Թորոսյանը, ՀՀ ԱԺ պատգամավոր Հասմիկ Հակոբյանը եւ ԱԺ աշխատակազմի ղեկավար-գլխավոր քարտուղար Դավիթ Առաքելյանը:
