Հայաստանյան կրթական համակարգը կարող է տարածաշրջանում առաջատարը դառնալ. Էրիկ Իսրայելյան

Հայաստանի կրթական ոլորտում մեծ պոտենցիալ կա: Առկա են բոլոր հնարավորությունները՝ տարածաշրջանում առաջատարը լինելու համար: Նման կարծիք է հայտնել ամերիկացի դոկտոր, հանրահայտ «Խոստումը» ֆիլմի պրոդյուսեր, հասարակական գործիչ Էրիկ Իսրայելյանը՝ «Շանթ» հեռուստաընկերության «Հեռանկար» վերլուծական հաղորդման ընթացքում:

Նրա խոսքով՝ իր և Կալիֆոռնիայի համալսարանի ռեկտոր Ջին Բլոկի համատեղ այցը Հայաստան հնարավորություն է տվել առավել մոտիկից ծանոթանալու այստեղ առկա գիտական ու կրթական նախադրյալներին, միևնույն ժամանակ, ամերիկյան ու հայկական համալսարանների համագործակցության համար նոր ճանապարհներ բացել:

«Սա հրաշալի հնարավորություն է իմ և մեզ հրավիրող նախագահ Սարգսյանի, կառավարական և կրթական առաջնորդների համար: Ուղղակի տպավորիչ է հանդիպել կրթական հաստատությունների ֆակուլտետների ուսանողների հետ: Այս հանդիպումների շնորհիվ մենք գաղափար ենք կազմում, թե ինչ մակարդակի, ինչ որակի մտավոր ընդունակություններ ունի Հայաստանի ժողովուրդը: Սա իսկապես տպավորիչ է»,- ասել է Էրիկ Իսրայելյանը:

Կալիֆոռնիայի համալսարանի ռեկտորն էլ ասել է, որ մեծ հետաքրքրություն ունի հայկական կրթական հաստատություններ այցելելու հարցում: Նշում է, որ իրենց համալսարանում դասավանդվող ուղղություններից մեկն էլ հայագիտությունն է, և այդ առումով Հայաստան կատարած այցը կարևոր է: Իր խոսքով՝ ինքն առաջիկայում պատրաստվում է ծանոթանալ հայաստանյան համալսարանների կրթական ծրագրերին:

«Սա իմ առաջին այցն է Հայաստան, չնայած, որ Կալիֆոռնիայի համալսարանը ստեղծման օրից միշտ կապ է պահպանել Հայաստանի ամերիկյան համալսարանի հետ: Ես պարտավոր էի այցելել ոչ միայն համալսարան, այլև պարզապես Հայաստան: Սա հրաշալի հնարավորություն է իմ և բժշկի համար: Մենք այցելելու ենք նաև ԵՊՀ:

Մենք ավելի խորությամբ կուսումնասիրենք այս հաստատությունների ծրագրերը: Նաև ցանկանում ենք խորացնել մեր հարաբերությունները հայկական հաստատությունների հետ:
Սա մեզ նախնական պատկերացումներ կտա մեր հնարավորությունների մասին»,- ասել է Կալիֆոռնիայի համալսարանի ռեկտորը:

Էրիկ Իսրայելյանն էլ կիսվում է ԵՊԲՀ ուսանողների հետ ունեցած իր տպավորություններով: Ասում է, որ տպավորված է Հայաստանում ուսանող երիտասարդների մասնագիտական ունակություններով և ունեցած նպատակներով:

«Մենք իմացանք, թե նրանք ինչ նպատակներ, ծրագրեր ունեն Հայաստանում բժշկական բարձրագույն կրթությունն ավելի զարգացնելու համար: Երկիրը հույս ունի ավելի խորը զարգացնելու այլ մասնագիտությունները նույնպես: Մենք հուսով ենք, որ ոչ միայն Կալիֆոռնիայի համալսարանի, այլև մեր տարբեր համալսարանների հանրային առողջության կենտրոնների հետ գործակցությունը մեզ թույլ կտա ավելի սերտ համագործակցություն հաստատել հայաստանյան առաջատար կրթօջախների հետ»,- ասել է Իսրայելյանը:

Բլոկի խոսքով՝ իրենք համագործակցության մեծ նախադրյալներ են տեսնում հայաստանյան համալսարանների հետ ու արդեն առաջին քայլերն արված են այդ ուղղությամբ: Ամերիկյան համալսարանի ռեկտորը հայտնել է, որ իրենք ուղիներ են փնտրում գործարարության մեջ համագործակցության համար և ուսումնասիրում՝ արդյո՞ք հնարավոր է տարածաշրջանում ուսանողների փոխանակման ծրագիր իրականացնել: