Այսօր նույնպիսի, գուցե ավելի մեծ ոգևորություն և լավատեսություն է, քան 1991թ. հանրաքվեի օրերին. Նիկոլ Փաշինյան

ՀՀ վարչապետի նստավայրում՝ Բաղրամյան 26-ում, սեպտեմբերի 21-ին կազմակերպված տոնական ընդունելության ժամանակ ՀՀ վարչապետ Նիկոլ Փաշինյանն ուղերձով դիմեց ՀՀ քաղաքացիներին:

Շնորհավորելով տոնական օրվա առթիվ` վարչապետը խոսեց կոռուպցիայի դեմ արդյունավետ պայքարի, անկախ դատական համակարգի, խոսքի ազատության, Մարդու իրավունքների պաշտպանվածության կարևորության մասին: Նա նշեց` անհրաժեշտ է նոր խթան հաղորդել տնտեսությանը, որի հենասյունը կլինի ազատ և արդար քաղաքացին, ով հավատում է իր ուժերին, որ կարող է փոխել իրականությունը, որ կարող է փոխել աշխարհը, որ սկսելով զրոյից` կարող է նորանոր հայկական բրենդներ ստեղծել, որոնք կնվաճեն աշխարհը, կփոխեն Հայաստանի ճակատագիրը:

Փաշինյանը խոսեց նոր ոճի, նոր սերնդի` սեփական աշխատանքով ու քրտինքով հարստացած, երկրում նոր տնտեսական համակարգ, հարաբերություններ կառուցելու պատասխանատվություն զգացող գործարարների մասին, ոչ միայն նրանց, ովքեր նոր են ի հայտ գալու, այլև բոլոր նրանց, ովքեր մինչ այժմ էլ գործել են կամ պատրաստ են գործել օրինական մրցակցության, սիրո և համերաշխության տրամաբանության ներքո:

Արտաքին քաղաքականությանն ու մասնավորապես Արցախի հարցին անդրադառնալով` վարչապետը նշեց.

«Արցախի հակամարտության կարգավորման հարցում մեր դիրքորոշումը չի փոխվել. կողմ ենք խնդրի բացառապես խաղաղ կարգավորմանը, անելու ենք մեզնից կախված ամեն ինչ` հարցը բանակցային ճանապարհով լուծելու համար»:

Ադրբեջանի նախագահ Իլհամ Ալիևի հոխորտանքների վերաբերյալ Փաշինյանն ասաց, որ պատերազմի սպառնալիքները հեռանկար չունեն:

«Ենթադրել, թե վախենալու ենք այդ սպառնալիքներից և բավարարելու ենք նրա առավելապաշտական նկրտումները, սին են: Մենք մարդասեր, ժողովրդավարական արժեքներ դավանող ժողովուրդ ենք, բայց դա չի նշանակում, որ պատրաստ չենք պաշտպանել մեր հայրենիքը, մեր ապագան»,- ասաց նա:

Փաշինյանը կրկին հիշեցրեց` Հայաստանի արտաքին քաղաքականության մեջ շրջադարձեր չեն լինելու:

«Հայաստանի Հանրապետության գլխավոր ռազմավարական դաշնակիցը Ռուսաստանի Դաշնությունն է, որի հետ կապված ենք բազում և դարավոր կապերով, մտադիր ենք ավելի խորացնել մեր համագործակցությունը Ռուսաստանի հետ թե՛ երկկողմ, թե՛ բազմակողմ ձևաչափերում: Զարգացնելու ենք մեր հարաբերությունները ԵՄ, ԱՄՆ, ինչպես նաև մեր անմիջական հարևանների` Վրաստանի ու Իրանի հետ»,- ասաց վարչապետը:

Փաշինյանը նշեց, որ այսօր մեծ տոն է Հայաստանում, այն կրկնապատիկ արժևորվում է, եթե հաշվի են առնում, որ տիրում է նույնպիսի, գուցե ավելի մեծ ոգևորություն և լավատեսություն, ինչ 1991թ. հանրաքվեի օրերին:

«Մաղթում եմ, որ այս ուրախությանը չհետևեն հիասթափություններ, հուսահատությունը չվերադառնա մեր երկիր: Աստված ուժ ու իմաստնություն տա` այդ խնդիրը լուծելու»,- նշեց Փաշինյանը: