Իլհամ Ալիևը պատմել է Արբեջանի սպառազինության, Պուտինի հետ իր հարաբերությունների և Հայաստանի քաղաքական կուրսի մասին

Ադրբեջանում արտահերթ նախագահական ընտրությունների շեմին Իլհամ Ալիևը հարցազրույց է տվել ռուսական լրատվամիջոցներին: Mediamax.am-ի հաղորդմամբ, Ալիևն ասել է, որ Ադրբեջանը բաց երկիր է:

«Մեր երկրում գործում են ժողովրդավարական բոլոր ինստիտուտները: Լիովին ապահովված է մամուլի ազատությունը: Ադրբեջանն ազատ համացանցով երկիր է, օգտատերերի թիվն աճում է և արդեն մոտենում է մոտ 80%-ին: Լիովին երաշխավորվում է հավաքների և քաղաքական գործունեության ազատությունը: Մենք՝ որպես զգալի փորձ ունեցող Եվրոպայի խորհրդի անդամ երկիր, պարտավորություններ ենք ստանձնել, այդ թվում՝ մեր հասարակության հետագա ժողովրդավարացման մասով: Կարծում եմ, որ մենք վստահորեն և հաջողությամբ ենք կատարում դրանք: Իհարկե, կան որոշ հարցեր, որոնք լրացուցիչ ջանքեր են պահանջում, սակայն մենք աշխատում ենք այդ ուղղությամբ»,-ասել է Իլհամ Ալիևը:

Ադրբեջանի նախագահի խոսքով, միջազգային փորձագետների և կազմակերպությունների գնահատականների համաձայն՝ այսօր ադրբեջանական բանակը դասվում է աշխարհի 50 ամենահագեցած և մարտունակ բանակների թվին:

«Մենք գործնականում ավարտել ենք վերազինման գործընթացը, մեր բանակը հագեցած է ինչպես հարձակողական, այնպես էլ պաշտպանական ամենաժամանակակից, գերճշգրիտ, տեխնոլոգիական զենքերով: Մենք զենք  ենք գնում ամենալավ արտադրողներից, և այդ սպառազինությունը մեզ թույլ է տալիս բավականաչափ վստահ զգալ մեզ: Բնականաբար, ուժեղ բանակ ստեղծելու համար միայն սպառազինությունը բավարար չէ, այդ իսկ պատճառով մեծ աշխատանք է տարվել բանակի մարտունակությունը բարձրացնելու և կարգապահությունն ամրապնդելու ուղղությամբ: Ինչ վերաբերում է սպառազինության ձեռքբերմանը, ապա այն կլինի ավելի ընտրովի, ավելի կոնկրետ՝ համապատասխան խնդիրները լուծելու համար: Ադրբեջանում արտադրվում է ավելի քան 1000 անուն ռազմական արտադրանք, որը համապատասխանում  է միջազգային ստանդարտներին և մի շարք ցուցանիշներով նվազեցնում է մեր կախվածությունը ներկրումից, ինչպես նաև ստեղծում է արտահանման մեծ ներուժ»,-նշել է Ադրբեջանի նախագահը:

Իլհամ Ալիևը խոսել է նաև ՌԴ նախագահ Վլադիմիր Պուտինի հետ իր հարաբերությունների մասին:

«Մեր անձնական կապերը Վլադիմիր Վլադիմիրովիչ Պուտինի հետ երկկողմ հարաբերությունների հաջող զարգացման ամենակարևոր գործոններից մեկն են: Մեր միջև առկա են շատ վստահելի հարաբերություններ: Մենք չունենք փակ թեմաներ: Երբ ծագում են մեր միջամտությունը պահանջող հարցեր, մենք անպայման հեռախոսազրույց ենք ունենում կամ հանդիպում և կարգավորում ենք խնդիրները, որոնք ծագել են մեր ենթականերից որևէ մեկի պատճառով: Սա մեր երկկողմ հարաբերությունների կարևորագույն գործոնն է, որը խաղացել և շարունակում է կարևոր դեր խաղալ միջպետական համագործակցության մեջ: Հիմնականում մեր անձնական, վստահելի հարաբերությունների և միմյանց համար մեր կարևորության ընդհանուր գիտակցման շնորհիվ մեզ հաջողվեց հասցնել այդ կապերը ռազմավարական գործընկերության մակարդակի»:

Բնականաբար, Իլհամ Ալիևը չէր կարող բաց թողնել հնարավորությունը՝ միջազգային մամուլի էջերում քննադատելու Հայաստանի տարածաշրջանային քաղաքականությունը:

«Գլխավոր խնդիրն այն է, որ Հայաստանը չի ցանկանում փոխել ստատուս-քվոն: Խոսքով Երևանը հայտարարում է բանակցություններ վարելու իր ցանկության մասին, բայց գործնականում զբաղվում է իմիտացիայով: Եվ դա անում է, որպեսզի այս ամենն անընդհատ շարունակվի, և այս գործընթացն ավարտ չունենա, ինչն անընդունելի է թե՛ մեր և թե՛ միջազգային հանրության համար: Ուստի Հայաստանը պետք է անհապաղ կատարի ՄԱԿ-ի Անվտանգության Խորհրդի բանաձևերը, և անհրաժեշտ է սկսել ադրբեջանական տարածքների օկուպացիայի անհապաղ վերացումը»,-ասել է Ալիևը: