Յուրաքանչյուր գործարար պետք է զգա բարելավվող մրցակցային միջավայրի ազդեցությունը. Արտակ Շաբոյան

Տնտեսական մրցակցության պաշտպանության պետական հանձնաժողովն այսօր շրջայց է կատարել Սյունիքի մարզի մի շարք սոցիալական հաստատություններում՝ գիշերօթիկ դպրոցներում, Սյունիքի մարզային նյարդահոգեբուժական դիսպանսերում և այլն: Այցի նպատակը նշված հաստատություններում պետական գնումների միջոցով սննդի ձեռք բերման գործընթացի վերահսկումն է: Հանձնաժողովի աշխատակիցները տեղում ուսումնասիրել են փաստաթղթերը՝ պարզելու՝ արդյո՞ք նշված հաստատությունները պատշաճ կերպով իրականացրել են մրցույթները, կամ որքանով են սննդի մատակարար հանդիսացող ընկերությունները բարեխիղճ գտնվել սննդի մատակարարման գործում: ՏՄՊՊՀ աշխատակիցների ուշադրության կենտրոնում էր նաև այն խնդիրը, թե որքանով է վերոնշյալ հաստատությունների կողմից կազմված տեխնիկական բնութագրերը, ինչպես նաև մրցույթների կազմակերպման գործընթացը համապատասխանում օրենքի պահանջներին:

Առկա փաստաթղթերի հիման վրա, առաջիկայում Հանձնաժողովը կպարզի նաև՝ արդյո՞ք պետական գնումների գործընթացում արձանագրվել են մրցույթի մասնակիցների նկատմամբ պատվիրատու հաստատությունների կողմից սահմանափակումներ կիրառելու դեպքեր, թե ոչ: Նշենք, որ նախկինում, Հանձնաժողովի կողմից կատարված ուսումնասիրությունները փաստում են, որ այս ոլորտում առկա են որոշակի խնդիրներ: Մասնավորապես, շատ հաճախ մրցույթներում հաղթում են միշտ միևնույն ընկերությունները, կամ տեխնիկական պահանջներում նշվում է, որ պետք է մատակարարվի հենց կոնկրետ ապրանքանիշի կամ բրենդի ապրանք, ինչը անթույլատրելի է:

Սյունիքի մարզ այցելության ընթացքում, Հանձնաժողովի նախագահ Արտակ Շաբոյանը հանդիպել է նաև մարզում գործունեություն իրականացնող մի քանի տասնյակ գործարարների՝ ոլորտին առնչվող խնդիրներին տեղում ծանոթանալու և դաշտի առավել բարելավմանն ուղղված վերջիններիս առաջարկներին և ծրագրերին ծանոթանալու նպատակով:

Հանդիպմանը ներկա մոտ 3 տասնյակ գործարարները զբաղվում են հիմնականում կաթնամթերքի, հրուշակեղենի, հացամթերքի արտադրությամբ, գյուղմթերքների վերամշակմամբ, ինչպես նաև գործունեություն են իրականացնում հանքաարդյունաբերության և այլ ոլորտներում: ՀՀ ՏՄՊՊՀ նախագահ Արտակ Շաբոյանն իր խոսքում առանձնակի կարևորեց նման այցելությունները՝ նշելով, որ Հանձնաժողովի նպատակն է, որպեսզի յուրաքանչյուր գործարար զգա տարեցտարի բարելավվող մրցակցային միջավայրի ազդեցությունը՝ իր բիզնես գործունեության վրա, որն անշուշտ կբերի ծավալների, ինչպես նաև արտահանման աշխարհագրության ընդլայնմանը:

Կաթնամթերքի արտադրությամբ զբաղվող «Էլոլա» ընկերության տնօրենը ՏՄՊՊՀ նախագահին տեղեկացրեց, որ այսօր շուկայում առկա է փոշի կաթից պատրաստված կաթնամթերք, որի բաղադրության մեջ սակայն այդ մասին չի նշվում, հետևապես այն ընկերությունները, որոնք իրենց արտադրանքը պատրաստում են թարմ կաթից հայտնվում են անհավասար պայմաններում: Սպառողը չի տեղեկանում, թե որ արտադրանքն է թարմ կաթից, իսկ որը փոշի կաթից պատրաստված: Տնտեսվարողի կողմից բարձրացված խնդրի հետ կապված Արտակ Շաբոյանը խոստացավ, որ Հանձնաժողովն անմիջապես ուսումնասիրություն կսկսի, քանի որ արտադրողի կողմից ոչ ճիշտ մակնշումը կարող է հանգեցնել նրան, որ վերջինս անբարեխիղճ կերպով մրցակցային առավելություն ստանա, ինչն անթույլատրելի է:

Սյունիքի մարզի գործարարները խնդիրներ բարձրացրեցին նաև մանրածախ առևտրի ոլորտի, թռչնամսի արտադրության և ներկրման հետ կապված: Մասնավորապես, հանքային ջրի արտադրությամբ զբաղվող ընկերությունները տեղեկացրեցին, որ խնդիր ունեն մանրածախ առևտրային ցանցերում իրենց արտադրանքի վաճառքի հետ կապված: Խոշոր սուպերմարկետները երբեմն խտրական մոտեցում են ցուցաբերում և կամայականորեն որոշում են՝ որ արտադրողի ապրանքը վաճառել, իսկ որինը` ոչ, կամ որինը առավել տեսանելի ցուցադրել իրենց խանութներում: Արդյունքնում գործարարները կանգնում են իրացման խնդրի առաջ: Ի պատասխան, ՏՄՊՊՀ նախագահը տեղեկացրեց, որ նման դժգոհություններ ստացվել են թե՛ արտադրողներից և թե՛ ներմուծողներից, և այս պահին Հանձնաժողովն ուսումնասիրում է մանրածախ առևտրի ոլորտը` նման խնդիրների օրենսդրական կարգավորմանը հասնելու նպատակով: Նա իր խոսքում նաև նշեց, որ գերիշխող առևտրային ցանցերը պետք է համահավասար մոտեցում ցուցաբերեն բոլորի հանդեպ, այլապես հաճախ ստացվում է, որ  մատակարարները կախվածության մեջ են հայտնվում խոշոր առևտրային ցանցերի կողմից և ստիպված ընդունում են վերջիններիս թելադրած պայմանները:

Մարզում թռչնամսի արտադրությամբ զբաղվողներն էլ դժգում են, որ այլ երկրներից ներկրվող թռչնամսի վրա հաճախ բացակայում է պատշաճ մակնշումը, թե երբ է այն արտադրվել և որ երկրի արտադրանք է, հետևապես, սպառողը կարող է մտածել, որ այն արտադրվել է Հայաստանում: Արտակ Շաբոյանը նշեց, որ բարձրացված բոլոր խնդիրները կարճ ժամկետներում կուսումնասիրվեն Հանձնաժողովի կողմից, և բոլոր այն խնդիրները, որոնք գտնվում են ՀՀ Մրցակցային մարմնի տիրույթում, լուծում կգտնեն:

ՏՄՊՊՀ լրատվական ծառայություն