Երիտասարդության նկատմամբ ուշադրությունը պետական ռազմավարական նշանակություն ունեցող առաջնահերթություն է. Հասմիկ Հակոբյան

Ողջունելով Ինդիանայի համալսարանի հանրային եւ բնապահպանական հարցերի գծով մասնագիտացված դպրոցի ուսանողներին եւ «Երիտասարդական խորհրդարան» ծրագրի մասնակիցներն՝ ՀՀ ԱԺ «Քաղաքացիական պայմանագիր» խմբակցության պատգամավոր Հասմիկ Հակոբյանն ասել է, որ երիտասարդության նկատմամբ ուշադրությունը պետական ռազմավարական նշանակություն ունեցող առաջնահերթություն է, եւ պետությունը պետք է ունենա համապատասխան գործիքակազմ՝ ոլորտը համակարգելու համար.

«Խթանելով ՀՀ Ազգային ժողովի արձագանքման կարողությունները, արդյունավետությունը, թափանցիկությունն ու ներառականությունը» ՄԱԶԾ խորհրդարանական ծրագրի աջակցությամբ եւ ՀՀ ԱԺ աշխատակազմի նախաձեռնությամբ նոյեմբերի 26-ին խորհրդարանում տեղի է ունեցել քննարկում «Երիտասարդական քաղաքականության մասին» օրենքի նախագծի վերաբերյալ, որին մասնակցել է նաեւ ՀՀ ԱԺ «Քաղաքացիական պայմանագիր» խմբակցության պատգամավոր Նարեկ Բաբայանը:

«Երիտասարդական քաղաքականության մասին» օրենքի նախագծի ընդունումը հնարավորություն կընձեռի համակարգելու ՀՀ-ում երիտասարդության ոլորտը՝ ստեղծելով պետական վարչարարությունն իրականացնելու մեխանիզմներ եւ նպաստելով ավելի արդյունավետ ու թիրախային քաղաքականություն իրականացնելուն:

Հասմիկ Հակոբյանի ներկայացմամբ Հայաստանի Հանրապետությունը չի ունեցել ոլորտը կարգավորող համապատասխան օրենք. շրջանառության մեջ դրված օրենսդրական նախաձեռնությունը քննարկվելուց եւ ընդունվելուց հետո կդառնա ոլորտը կարգավորող մայր օրենքը:

«Օրենքով կկարգավորվեն երիտասարդական քաղաքականության մշակման եւ իրականացման գործընթացները, ինչպես նաեւ այդ գործընթացում ներգրավված սուբյեկտների եւ պետական կառավարման մարմինների միջեւ ծագող իրավահարաբերությունները»,- ասել է պատգամավորը՝ մանրամասն ներկայացնելով նախագծով սահմանվող դրույթները, հիմնական հասկացությունները:

Նախագծով սահմանվել է, որ երիտասարդ է համարվում 13-35 տարեկան քաղաքացին. պատգամավորն ընդգծել է, որ այդ հարցում հիմք է ընդունվել միջազգային լավագույն փորձը:

«Մենք այսօր էլ ունենք ներառական երիտասարդություն, իսկ Հայաստանի խորհրդարանն աշխարհի ամենաերիտասարդ խորհրդարանն է»,- ասել է Հասմիկ Հակոբյանը՝ հավելելով, որ այս տարի Հայաստանում է տեղի ունեցել Միջխորհրդարանական միության երիտասարդ պատգամավորների գլոբալ համաժողովը:

Օրենքը կաջակցի նաեւ Կառավարության ծրագրով նախատեսված եւ արդեն իսկ մեկնարկած երիտասարդական կենտրոնների ստեղծմանն ու դրանց արդյունավետ գործունեությանը: Հիմնական ծրագրերն իրականացվելու են երիտասարդական կենտրոնների միջոցով: Արդեն իսկ ձեւավորվել են 4 երիտասարդական կենտրոններ տարբեր մարզերում: Այս տարի եւս 4 կենտրոն շուտով կգործի, իսկ մինչեւ 2026 թվականը Հայաստանի տարածքում կգործեն 25 նմանատիպ կենտրոններ:

«Այս կենտրոնները ոչ միայն ժամանցային են, այլեւ ունեն կրթական կարեւոր բաղադրիչգ երիտասարդների կարողությունների զարգացում, ներուժի բացահայտում, քաղաքացիական կրթություն եւ ակտիվություն, ինտելեկտուալ ժամանց: Ոչ ֆորմալ կրթական միջավայր է ձեւավորվում, կանցկացվեն տարբեր թեմաներով դասընթացներ, հանդիպումներ ամենատարբեր ոլորտի ներկայացուցիչների հետ, ինչը նաեւ կօգնի մասնագիտական կողմնորոշմանը»,- ասել է Հասմիկ Հակոբյանը:

Նարեկ Բաբայանը տեղեկացրել է, որ օրենքի նախագիծը քննարկվելու է ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում: Նա կարեւորել է նախագծի՝ նման ձեւաչափով քննարկումը:

Հարցուպատասխան ձեւաչափում պատգամավորներն անդրադարձել են քննարկման մասնակիցների հարցերին՝ ներկայացնելով պարզաբանումներ աշխատանքի իրավունքի, մասնագիտական կողմնորոշման, ընտրելու իրավունքի տարիքային շեմերի սահմանման վերաբերյալ: Օրենսդիրի ներկայացուցիչները խոսել են «Ակադեմիական քաղաք» նախագծի վերաբերյալ:

Ինդիանայի համալսարանի ուսանողները Հայաստանում համագործակցել են Կայուն զարգացման նպատակների նորարարական կենտրոնի հետ՝ մասնակցելով «Զարգացնել նորարարական եւ մասնակցային քաղաքականությունների մշակումը Հայաստանում» նախագծի իրականացմանը եւ ստեղծել որոշակի գործիքներ մշտադիտարկման ու գնահատման համար: Շնորհակալություն հայտնելով հետաքրքիր հանդիպման եւ քննարկման համար՝ ուսանողները ներկայացրել են նաեւ իրենց երկրների փորձն ու օրինակը, հանդես եկել առաջարկություններով: Նրանք ողջունել են երիտասարդների մասնակցությունն ու գործունեությունն օրենսդիր մարմնի աշխատանքներին: Նրանք կարեւորել են նաեւ նման հարթակում եւ ձեւաչափով հանդիպումներ ու քննարկումներ կազմակերպելը: «Երիտասարդական խորհրդարան» ծրագրի մասնակիցներն էլ ներկայացրել են Հայաստանի երիտասարդների խնդիրներն ու ձեռքբերումները: