Քարոզարշավը տեխնոլոգիական տեսակետից աղքատիկ է, բովանդակային տեսակետից` խիստ թերի. քաղտեխնոլոգ

Քաղտեխնոլոգ Արմեն Բադալյանը Երևանի քաղաքապետի պաշտոնի համար պայքարող հիմնական մրցակիցներ է համարում «Իմ քայլը» դաշինքի թեկնածու Հայկ Մարությանին և «Ծառուկյան» դաշինքի թեկնածու Նաիրա Զոհրաբյանին: SHANTNEWS.am-ի հետ զրույցում Բադալյանը նշեց, որ տեխնոլոգիական տեսակետից բավական աղքատիկ է այս քարոզարշավը, իսկ բովանդակային տեսակետից` խիստ թերի:

«Կան շատ թեկնածուներ, որոնք ունեին բավական մեծ պոտենցիալ, բայց այդպես էլ չկարողացան իրենց մեծ պոտենցիալը օգտագործել չիմացության պատճառով, և միջակ քարոզարշավ կարող եմ գնահատել: Հասկանալի է, որ այս քարոզարշավի ժամանակ բոլորը չէ, որ գնում են քաղաքապետ ընտրվելու, չնայած բոլորն էլ նշում են, որ գնում են քաղաքապետ դառնալու, բայց իրականում այստեղ ընդամենը երկուսն են, որ կարող են քաղաքապետ դառնալ` դերասան Հայկ Մարությանը և ԲՀԿ-ից Նաիրա Զոհրաբյանը. հիմնական պայքարն այս երկուսի միջև է գնում, այդ երկուսն են, որ իրականում պայքարում են քաղաքապետ դառնալու համար: Մնացած ուժերից մի քանիսը մասնակցում են քարոզարշավին, որ ներկայություն ունենան ավագանիում, մի քանիսը, որ ընդամենը կարողանան հաղթահարել այդ նշաձողը և որոշակի ներկայություն ունենան, որոշ ուժերի համար սա բենեֆիս է, այսինքն` մասնակցում են իրենց ներկայացնելու համար, և կան ուժեր, որ մասնակցում են, որպեսզի իրենց մասին հիշեցնեն, որ գոյություն ունեն: Այսինքն՝ տարբեր ուժեր տարբեր նպատակներ են հետապնդում»,- ասաց նա:

Հարցին՝ երևանցիները մինչ քարոզարշավը կողմնորոշվա՞ծ էին՝ ում պիտի ընտրեին կամ քարոզարշավի ընթացքը ինչ-որ բան փոխե՞ց նրանց որոշման մեջ, քաղտեխնոլոգը պատասխանեց, որ հարցին ավելի ճիշտ կպատասխանեին սոցիոլոգները: Բադալյանի դիտարկմամբ` ամեն դեպքում այս քարոզարշավով որոշակի հստակություն մտցվեց, եթե կային մարդիկ, որոնք նախկինում կողմնորոշված էին դեպի թեկնածուներից մեկը, հիմա բավական մեծ հիասթափություն կա, և դա հիմնականում նկատելի է «Իմ քայլը» դաշինքի թեկնածուի նկատմամբ:

«Հեղափոխական էյֆորիայի անկման արդյունքում էապես պակասում են դեպի այդ թեկնածու գնացող ձայները, նկատելի է, որ բավական մեծանում են «Ծառուկյան» դաշինքի թեկնածուի օգտին գնացող ձայները, դա այս քարոզարշավի արդյունքում է, որ տեղի է ունենում, որովհետև այստեղ մենք տեսնում ենք, որ իրականում «Իմ քայլը» դաշինքի դեպքում քվեարկությունը գնում է վարչապետի վարկանիշի օգտին, իսկ «Ծառուկյան» դաշինքի դեպքում ճիշտ է` կա և ԲՀԿ առաջնորդ Գագիկ Ծառուկյանի գործոնը, բայց կա նաև թեկնածուի ձայն, այսինքն` այստեղ երկու գործոն է աշխատում»,- ասաց նա:

Բադալյանը նշեց, որ մնացած թեկնածուները խոսում են այդ նույն թեմաների մասին` աղբահանություն, տրանսպորտ, վերելակներ և այլն: Ըստ քաղտեխնոլոգի` «Իմ քայլը» դաշինքը հիմնական շեշտադրումը կատարում է զգացմունքային բնագավառում, իսկ «Ծառուկյան» դաշինքի դեպքում ընթանում է զուտ քաղաքական գործընթաց, այսինքն` զուտ մենեջերական:

«Իհարկե, լիարժեք չէ նրա քարոզարշավը, միանշանակ լիարժեք չէ, բավական թերի է, նա շատ ավելին կարող էր անել, բայց այս պահի դրությամբ մենք դա ենք տեսնում, պատահական չէ, որ ինչքան մոտենում է քարոզարշավը, այդ երկու ուժերի միջև պայքարը ուժեղանում է, դա` մեկ, երկրորդ` մենք տեսնում ենք, որ այս երկու թեկնածուներից մեկը մյուսին հրավիրեց անհատական բանավեճի, «Իմ քայլը» դաշինքի թեկնածուն խուսափեց»,- նշեց Բադալյանը:

Քաղտեխնոլոգն ասաց, որ մյուս ուժերի շրջանում հիմնական պայքարը երրորդ տեղը զբաղեցնելու համար է: