Պետական-իրավական հարցերի մշտական հանձնաժողովը երկրորդ ընթերցմամբ քննարկել է մի շարք նախագծեր

Պետական-իրավական հարցերի մշտական հանձնաժողովը Վլադիմիր Վարդանյանի նախագահությամբ հոկտեմբերի 18-ին գումարած նիստում երկրորդ ընթերցմամբ քննարկել է մի շարք նախագծեր եւ տվել դրական եզրակացություն:

«Հայաստանի Հանրապետության քրեական օրենսգրքում լրացում կատարելու մասին» եւ կից ներկայացված օրինագծերի փաթեթը ներկայացրել է ՀՀ ներքին գործերի նախարարի տեղակալ Արփինե Սարգսյանը:

Նախաձեռնությամբ առաջարկվում է կիբեռհանցավորության դեմ պայքարի շրջանակում իրավապահ համակարգին օժտել համապատասխան գործիքակազմով:

Փոխնախարարի խոսքով առաջինից երկրորդ ընթերցում Կառավարությունը ներկայացրել է մի շարք գրավոր առաջարկներ: Արդյունքում՝ կիբեռհանցավորության ցանկից հանվել է «արտոնագրային իրավունքը խախտելը» պարբերությունը՝ հաշվի առնելով Բուդապեշտի կոնվենցիայում կիբեռհանցագործությունների ցանկում այդ հանցակազմի չներառումը: Կատարվել են նաեւ տեխնիկական փոփոխություններ:

Նշվել է, որ կրիպտոակտիվների ոլորտին վերաբերող իրավակարգավորումներն ուժի մեջ կմտնեն 2026 թվականի հունվարի 1-ից:

ՀՀ արդարադատության նախարարի տեղակալ Լեւոն Բալյանը ներկայացրել է «Հարկադիր կատարումն ապահովող ծառայության մասին» ՀՀ օրենքում առաջարկվող լրացումը : Գործադիրն առաջարկում է յուրաքանչյուր հաջորդ տարվա ՀՀ պետական բյուջեով հարկադիր կատարման ծառայության համար նախատեսել պարգեւատրման հավելյալ ֆոնդ:

Զեկուցողի տեղեկացմամբ առաջին ընթերցումից հետո նախաձեռնությունում կատարվել են տեխնիկական փոփոխություններ:

««Հայաստանի Հանրապետության տոների եւ հիշատակի օրերի մասին» Հայաստանի Հանրապետության օրենքում լրացում կատարելու մասին» օրինագծի հեղինակն ԱԺ «Քաղաքացիական պայմանագիր» խմբակցության պատգամավոր Զարուհի Բաթոյանն է: Հեղինակն առաջարկում է հունիսի 17-ը նշել որպես Հայրերի օր:

Ըստ զեկուցողի՝ առաջինից երկրորդ ընթերցում նախաձեռնությունը չի փոփոխվել, քանի որ չի ներկայացվել որեւէ առաջարկ:

ՀՀ արդարադատության նախարարի պարտականությունները կատարող, փոխնախարար Արմենուհի Հարությունյանի ներկայացմամբ քննարկվել է «Պետական տուրքի մասին» օրենքում եւ ՀՀ քաղաքացիական դատավարության օրենսգրքում առաջարկվող լրացումներն ու փոփոխությունները:

Առաջինից երկրորդ ընթերցում նախաձեռնությունը լրամշակվել է՝ հաշվի առնելով ԱԺ աշխատակազմի փորձագիտական եւ վերլուծական վարչության ներկայացրած խմբագրական առաջարկները:

Լրամշակման նպատակով մինչեւ երկու ամիս ժամկետով հետաձգվել են «Քաղաքացիական պայմանագիր» խմբակցության պատգամավորներ Սիսակ Գաբրիելյանի եւ Վլադիմիր Վարդանյանի հեղինակած «Հայաստանի Հանրապետության քաղաքացիական օրենսգրքում լրացումներ կատարելու մասին» եւ Կառավարության հեղինակած «Քրեական վարույթներով իրավական օգնության մասին» օրինագծերի քննարկումը: