ՀՔԾ-ից որևէ քրգործի քննությունը այլ վարույթի հանձնելը գլխավոր դատախազի իրավասությունն է. փաստաբան

Հայաստանի Հանրապետության քրեական դատավարության օրենսգրքով սահմանված կարգով` գլխավոր դատախազի բացառիկ իրավասությունն է վարույթ իրականացնող մարմնից վերցնել առանձին քրգործի քննությունը և հանձնարարել մեկ այլ վարույթի: SHANTNEWS.am-ի հետ զրույցում այս մասին նշեց փաստաբան Նորայր Նորիկյանը` արձագանքելով ՀՀ երկրորդ նախագահ Ռոբերտ Քոչարյանի փաստաբանների հնչեցրած կարծիքին, թե «Ռոբերտ Քոչարյանի գործը բոլոր դեպքերում չի կարող քննվել Հատուկ քննչական ծառայությունում»:

«Ես չգիտեմ` իրենք ինչ հիմնավորում են ներկայացրել կամ կներկայացնե՞ն այդպիսի միջնորդություն ՀՔԾ վարույթից Մարտի 1-ի գործի շուրջ հարուցված քրգործի հետագա նախաքննությունը այլ վարույթ իրականացնող մարմին տեղափոխելու վերաբերյալ: Պետք է հասկանալ ուղղակի` միջնորդություն կներկայացվի՞, թե՞ ոչ, և եթե կներկայացվի, որո՞նք են այդ միջնորդության հիմքերը, դրանից հետո նոր հնարավոր կլինի գնահատական տալ` ներկայացված միջնորդության մեջ ամրագրված հիմքերը արդյոք հիմնավո՞ր են, թե՞ ոչ»,- ասաց նա:

Փաստաբանն արձագանքեց տեսակետին, թե ձայնագրությունից պարզ է դարձել, որ վարչապետը մասնակից է եղել խափանման միջոցի հարցի քննարկմանը: Նա նշեց, որ պետք է համակողմանիորեն նայել խնդրին:

«Ի դեմս Ռոբերտ Քոչարյանի փաստաբանների` մենք գործ ունենք պրոֆեսիոնալ փաստաբանների հետ, և կարծում եմ, որ կամ ճիշտ չի հասկացվել իրենց ասածը կամ իրենք ճիշտ չեն ձևակերպել միտքը այն առումով, որ այդպիսի ձևակերպում կա: Եթե անգամ այդպիսի ձևակերպում կա, պետք է ուղղակի համակողմանի նայել այդ խնդիրը, որովհետև Գլխավոր դատախազությունը երեկ քրեական գործ է հարուցել Քրեական օրենսգրքի 309-րդ հոդվածի առաջին մասի, այն է` պաշտոնեական լիազորությունների անցման հատկանիշներով, հետևաբար, եթե Քոչարյանի փաստաբանները` հարգարժան գործընկերները, հղում են կատարում անմեղության կանխավարկածի ինստիտուտի փիլիսոփայությանը, պետք է առավել քան օբյեկտիվություն ցուցաբերեն այս պարագայում ևս, պահպանեն օբյեկտիվություն և հարգեն անմեղության ինստիտուտը»,- նշեց փաստաբանը:

Նորիկյանն ասաց` նախաքննությամբ պարզ կլինի` արդյո՞ք այդ գաղտնալսման ձայնագրման բովանդակության հետ կապված որևէ պաշտոնյա, այդ թվում` վարչապետը, ԱԱԾ տնօրենը, ՀՔԾ պետը կամ այլ ենթադրվող պաշտոնյա, իր պաշտոնեական լիազորություններն անցե՞լ է, թե՞ ոչ, եթե անցել է` ինչ հանգամանքներում, դրա փաստական տվյալներ կա՞ն, թե՞ ոչ: Փաստաբանը կարծում է, որ դեռ վաղաժամ է դրա վերաբերյալ ընդհանուր գնահատականներ տալ, քանի որ հիմա դա կլինի բացահայտ սուբյեկտիվիզմ` հաշվի առնելով այն հանգամանքը, որ շատ սեղմ տեղեկատվություն է առկա:

«Փաստն այն է, որ հարուցված է քրեական գործ: Քոչարյանի ժամանակներում ուղղակի կբացառեին, որ իրենք այսպիսի հանգամանքներում հանկարծ քրեական գործ հարուցեին, բայց մենք իսկապես աննախադեպ երևույթի հետ գործ ունենք, երբ, ըստ էության, այդ հոդվածի հատկանիշներով հարուցվել է քրեական գործ»,- ասաց Նորիկյանը:

Երկրորդ նախագահի փաստաբանները նաև դժգոհել էին Բարձրագույն դատական խորհրդի (ԲԴԽ)` քայլեր չձեռնարկելուց` նշելով, որ ԲԴԽ-ն չի փորձել պաշտպանել դատավորների անկախությունը: Հիշեցնենք` ձայնագրությունը շատերին հիմք էր տվել պնդելու, որ դատավորի նկատմամբ ճնշում է եղել:

«Իսկապես առերևույթ ՀՀ Սահմանադրության եթե չեմ սխալվում 174-րդ հոդվածով ամրագրված է ԲԴԽ հիմնական առաքելությունը: Սահմանադրությամբ ԲԴԽ-ն ունի երկու սուրբ առաքելություն, դա Հայաստանի Հանրապետության դատարանների և դատավորների անկախության բնականոն պահպանումն է, հետևաբար ես, անկեղծ ասած, չգիտեմ, թե ինչ պետք է աներ ԲԴԽ-ն: Անկեղծ` չգիտեմ` իրենք ինչ հիմքերով, շարժառիթներով են այդ մեղադրանքը ներկայացրել, բայց մի բան ակնհայտ է, որ ԲԴԽ-ն իսկապես պետք է իր առաքելությանը համահունչ իրականացնի այնպիսի գործունեություն, որը միտված կլինի դատարանների, դատավորների անկախության, բնականոն գործունեության ապահովմանը»,- ասաց փաստաբանը: