Քաղաքացուն գետնին պառկեցնելու կամ պատին դեմ տալու գործընթացից հաճույք չենք ստանում. Օսիպյան

Ոստիկանության պետը և ոստիկանությունը չեն կարող ուշ կատարել կառավարության ղեկավարի հանձնարարականները: Այս մասին սեպտեմբերի 14-ին լրագրողների հետ զրույցում նշեց ՀՀ ոստիկանապետ Վալերի Օսիպյանը: Նա ընդգծեց` ցանկացած հանձնարարական կատարվում է անհապաղ, սահմանված ժամկետում և զեկուցվում:

Անդրադառնալով ԱԱԾ տնօրենի և ՀՔԾ պետի հեռախոսազրույցի գաղտնալսմանն ու ձայնագրմանը և այդ ուղղությամբ իրենց գործողություններին, Օսիպյանն ասաց, որ գործընթացը շարունակվում է, ապա նշեց, որ գաղտնալսումը թույլատրված է միայն այն ծառայություններին, ովքեր օրենքով ունեն դրա իրավունքը:

«Աշխատանքն ընթացքի մեջ է, ոստիկանությունը ստանում է օպերատիվ տեղեկություններ, այդ օպերատիվ տեղեկությունները ենթակա չեն հրապարակման, մենք ստուգում ենք այդ ամենի օրինական լինելը»,- նշեց նա:

Դիտարկմանը` ոստիկանությունը հաճո՞ւյք է ստանում քաղաքացիներին գետնին պառկեցնելուց, Օսիպյանը նշեց.

«Եթե ուշադիր լինեք, մշտապես այդ գործընթացը իրականացրել ենք, ամբողջ խնդիրը ոչ թե՝ ոստիկանությունը հաճույք է ստանում քաղաքացուն գետնին պառկեցնելու, պատին դեմ տալու կամ ստուգելու գործընթացից, մենք հաճույք չենք ստանում, դա օրինական գործողություն է` պայմանավորված նրանով, որ ունենք տեղեկություններ, որ իրենք ունեն զենքեր: Դրանց օրինականությունը պարզելու համար ստուգում ենք: Զինված քաղաքացին ոստիկանության աշխատակցի համար մշտապես համարվում է վտանգ»,- ասաց Օսիպյանը:

Նա նշեց, որ զենքը փոխանցվում է փորձաքրեագիտական ուսումնասիրության` ճշտելու դրա առնչությունը որևէ հանցագործության, կրկնակի ստուգման այս գործընթացն Օսիպյանն ավելորդ չի համարում: Վարչապետի հանձնարարականից հետո ոստիկանական գործողությունները պատկերող տեսանյութեր կան, որոնք, ըստ Օսիպյանի, տեղադրել են քաղաքացիները կամ լրագրողները:

«Շարասյունով երթևեկում են, մենք բազմաթիվ բողոքներ ենք ստանում մեր քաղաքացիներից, որ շարասյունով երթևեկելով` խոչընդոտ են հանդիսանում երթևեկությանը: Մենք երբևէ, անկախ կարգավիճակից` օլիգարխ կամ պաշտոնյա լինելուց, դիմացի մեքենայի հետ կապված խնդիր չենք առաջացրել: Այստեղ խոսքը երկրորդ մեքենայի մասին է, որը, ինչպես գիտենք, թիկնազոր է լինում: Կարող ենք տարբերել` ուղղակի երթևեկո՞ւմ է, տե՞ղ են գնում, թե՞ թիկնազորի գործունեություն է իրականացնում»,- ասաց նա:

Անդրադառնալով ՀՀ պաշտպանության նախկին նախարար Միքայել Հարությունյանի նկատմամբ Ռուսաստանի Դաշնության տարածքում հետախուզումը դադարեցնելու որոշմանը, հարցին` տեղյա՞կ է եղել, որ նա ՌԴ քաղաքացի է, ոստիկանության պետը պատասխանեց` տեղեկացված չի եղել այն մասին, որ Միքայել Հարությունյանը ՌԴ քաղաքացի է, ոստիկանությունը համապատասխան կարգով ստացել է տեղեկություններ ՌԴ-ից:

ՌԴ այդ քայլին գնահատականներ հնչեցնելուց Օսիպյանը խուսափեց` նշելով, որ ոստիկանությունը ապաքաղաքականացված կառույց է:

Ոստիկանության ղեկավարը արձագանքեց նաև քննադատություններին, թե ոստիկանությունը և ինքը շոուներով են զբաղված:

«Իմ գործունեության ընթացքում շոուներ չեմ արել, առաջնորդվել եմ բացառապես օրենքով, իսկ ովքեր են շոումեն, բոլորդ գիտեք: Ամեն կերպ փորձում են, ես հիմա կոնկրետ ոստիկանության մասով կասեմ, ցեխ շպրտել ոստիկանության վրա, ցույց տալ, թե ոստիկանությունը չի աշխատում, այս ամիսների ընթացքում եսիմինչերով է զբաղվել: Ասեմ, որ ոստիկանությունը երբևէ չի աշխատել այսպես, ինչպես հիմա»,- նշեց Օսիպյանը: