Եթե պարզենք` ում էր ձեռնտու, կհասկանանք` ով էր պատվիրել. Պարգև Օհանյանը` ԱԱԾ և ՀՔԾ պետերի գաղտնալսման մասին

Ազգային անվտանգության ծառայության Արթուր Վանեցյանի և Հատուկ քննչական ծառայության պետ Սասուն Խաչատրյանի հեռախոսազրույցի գաղտնալսման և հրապարակման շուրջ քննարկումները չեն դադարում: Տեսակետներ են հնչում, որ նրանց հրաժարականից բացի, կան նաև քրեական գործեր հարուցելու հիմքեր:

SHANTNEWS.am-ի հետ զրույցում նախկին դատավոր Պարգև Օհանյանը նշեց` հարցը լուրջ է, քանի որ շատ բան կարող է լսած լինեն, ինչ-որ այլ խոսակցություններ:

«Ճիշտն ասած` չեմ կարծում, որ այնքան անզգույշ են եղել, որ ավելի վտանգավոր բաներ են խոսել: Պարզապես, իմ կարծիքով՝ եզակի դեպք էր, ըստ իս` եզակի, հատուկ պատվերով, երևում է ձեռագիրը, կամ էլ` ում էր դա ձեռնտու, հռոմեական իրավունքից Cui bono, որ մինչև հիմա օգտագործվում է, եթե պարզենք` ում էր ձեռնտու, կհասկանանք` ով էր պատվիրել, դա, իմ կարծիքով, կարող էր անել հեռախոսային ցանցի հասարակ ծառայողը, ես մասնագետ չեմ, իհարկե, բայց նպատակն էլ պարզ է, ցավոք, շանտաժ, սաբոտաժ երևի, մի խոսքով: Ես այդտեղ ինչ-որ լուրջ բան չեմ տեսնում, սովորական, կենցաղային զրույց է»,- ասաց նա:

Հարցին` արդյո՞ք այդ հեռախոսազրույցում քրգործ հարուցելու հիմքեր կան, մասնավորապես` դատավորին ուղղորդելու հիմքով, նա պատասխանեց, որ նախ՝ դատավորի պահը պարզ չէ, հակասական բաներ են ասվում, և ի սկզբանե էլ իր համար հասկանալի չէ, քանի որ երբեմն մարդիկ իրականը մի քիչ փոխաբերական են ներկայացնում: Օհանյանը նշեց, որ իրեն ի սկզբանե անհավանական է թվացել այն, որ դատավորը կարող է վերցնել հեռախոսը, զանգել ԱԱԾ պետին, հատկապես որ դա հերքում են թե՛ դատավորը, թե՛ ԱԱԾ տնօրենը: Նրա խոսքերով` շատ հնարավոր է, որ եղել է մի տեսակ միջնորդավորված բան` կարծիքի հայցում, և այդտեղ որևէ մեկին մեղադրել չի կարելի, այդ թվում՝  դատավորին, որը գուցե շարժվել է նախկին իներցիայով, այն էլ նման մասշտաբի պատասխանատու որոշում կայացնելու համար:

«Սովոր են, դե հիմա, իհարկե, եթե եղել է նման բան, զարմանալու բան էլ չկա, լուրջ հարցեր են, կարող է` նույնիսկ ես էլ լինեի, փորձեի, ասենք, Վճռաբեկ դատարանի նախագահին զանգել կամ ինչ-որ ուրիշի: Ճիշտ չէ, իհարկե, բայց ընդունված է եղել, մյուս կողմից էլ պետք է հասկանալ մարդկանց, վերջին հաշվով, չեն ուզում մենակ մնալ, միայնակ որոշել: Ի դեպ, դատավորի վարքագծի կանոններով չի էլ արգելվում միմյանց հետ խորհրդակցելը: Այլ հարց է, որ պետին զանգի, էլի, կարող է` մասնակցող դատախազի հետ է խոսել, ինքն էլ իր վերադասի հետ, վերադասն էլ զանգել է ԱԱԾ պետին, այսինքն` կարող է այսպիսի ինչ-որ ընթացք ունենալ, բայց հեռախոսային խոսակցության մեջ ուղղակի կոնտակտ ներկայացվի, դա դեռ պետք է պարզվի, բայց բոլոր դեպքերում ոչ մի դատապարտելի բան ես չեմ տեսնում և չկա: Թող ասողները մտածեն իրենց հանցավոր գործերի ու գործունեության մասին: Աստվածաշունչն ասում է` քո աչքի մեջի գերանը հանի, նոր մյուսների աչքի մեջ փուշ փնտրի»,- նշեց Օհանյանը:

Ըստ նախկին դատավորի` այն, որ ԱԱԾ պետը և ՀՔԾ պետը քննարկել են հարց կամ հարցեր, նորմալ է, որովհետև ԱԱԾ-ն և ՀՔԾ-ն երկուսն էլ միջդատական վարույթ` նախաքննություն և քննություն իրականացնող մարմիններ են, և ոչ թե իրավունք ունեն, այլ պարտավոր են իրար հետ համագործակցել, քննարկել, որ գրագետ աշխատանք ստացվի, համագործակցված, օպերատիվ-քննչական, ի վերջո, ըստ Օհանյանի, եթե զանգով արդարադատություն լիներ, դա կարվեր նաև Վերաքննիչ դատարանում:

«Չէին կարո՞ղ Վերաքննիչ զանգել նույն կերպ, ճնշել: Որ այդպես լիներ, հիմա Ռոբերտ Քոչարյանը կալանքի տակ էր, և ոչ միայն նա, այլև մյուսները, բայց, ինչպես տեսնում ենք, օբյեկտիվ ձերբակալում են, հիմքեր չկան, բաց են թողնում, ով ուզում է լինի»,- ասաց նա:

Ազգային անվտանգության նախկին փոխնախարար Գուրգեն Եղիազարյանը ևս ներկայացրեց իր մտահոգությունները: Թիվ մեկ մտահոգությունը, ըստ Եղիազարյանի, այն է, որ նման բան պետք է ընդհանրապես չլիներ, որովհետև դա խայտառակության գագաթնակետն է, բացի դրանից՝ նա կարծում է, որ պետք է հիմա աչալուրջ լինել, որպեսզի թշնամիները, այս ամենից ոգևորված, գործողություններ չկատարեն Հայաստանի Հանրապետության դեմ, իսկ որ միանշանակ կկատարեն, Եղիազարյանը վստահ է, քանի որ կարծում է` նրանք տեսան, որ մենք թույլ կետեր ունենք, և դրանից կօգտվեն միանշանակ:

«Գիտեք, գաղտնալսումն առավելություն է տալիս մարդկանց, որոնք իրավունք չունեն այդ առավելությունն ընդհանրապես ունենալու, և չնայած մոտավորապես պարզ է, գոնե ինձ համար արդեն պարզ է, թե դա որտեղից է գալիս: Ցավոք սրտի, այսօրվա իշխանությունը ոչ միայն դասեր չի քաղել դրանից, այլ նույնիսկ փորձում է օգուտ ունենալ, որն անթույլատրելի եմ համարում: Ավելի լավ է` մտածեն` երկիրն ինչ վիճակի մեջ է, որպեսզի մեր երկրում նման բաներ չլինեն»,- ասաց նա:

Նա խորհուրդ տվեց մտածել, թե ինչպես վերացնել թերությունները, ապա հիշեցրեց` մենք փաստացի պատերազմի մեջ գտնվող երկիր ենք, և այդ ամենը կարող է սարսափներով ավարտվել մեզ համար:

Հարցին` արդյո՞ք այս հեռախոսազրույցի գաղտնալսման մեջ արտաքին ուժերի մասնակցություն տեսնում է, նա պատասխանեց.

«Գիտեք, Աստված չանի, որ Թուրքիան մեզ լսած լինի և մեր ներքին կյանքին միջամտելու համար դա օգտագործի»: