Եթե նման ձայնագրություն նախկինում հայտնվեր, Նիկոլ Փաշինյանը ԱԺ-ն օդ կհաներ. Շարմազանով

Ազգային ժողովի փոխնախագահ Էդուարդ Շարմազանովն այսօր խորհրդարանում՝ լրագրողների հետ զրույցի ժամանակ, նշել է. որ ինքը որևէ կոռուպցիոն սկանդալի մեջ չի եղել ու չի կարող լինել:

«Առնվազն ես որևէ ապօրինության մեջ չեմ եղել ու չեմ կարող լինել, առնվազն ես մեր ժողովրդի գումարներից գոնե մեկ լումա չեմ լափել: Առնվազն ես իմ և իմ ընկերների ֆինանսական միջոցներն եմ ծառայեցրել Հայաստանի Հանրապետության շահերի համար, և եթե պետք լինի, կարող եմ դրա համար փաստեր ներկայացնել»,- ասել է նա:

Շարմազանովը նաև անդրադարձել է ԱԱԾ տնօրենի և ՀՔԾ պետի ձայնագրության փաստը հետազոտող, արդար դատաքննության իրավունքի և հեռախոսային խոսակցությունների գաղտնիությունը խախտելու փաստերի մասին հարցի ուսումնասիրության նպատակով հանձնաժողովի ստեղծմանը և նշել,  որ այստեղ եղել է առնվազն օրենքներից վեր դասելու խնդիր:

«Ի՞նչ է նշանակում՝ ուզես-չուզես, պիտի կալանավորես, ի՞նչ է նշանակում՝ 2 օր կնստի, խելքը գլուխը կգա, ի՞նչ է նշանակում՝ մի՛ բռնի՝ ռուսների հետ հազիվ եմ բարիշել, այսինքն՝ հանուն ռուսների, հանուն ամերիկացիների, բա ինքնիշխանությունից են խոսում, արժանապատվությունից են խոսում: Եթե կալանքի հիմքեր կան, թող կալանավորեն»,- ասել է Շարմազանովը:

Ինչ վերաբերում է հանձնաժողովի անվանմանը, ապա Շարմազանովը նշել է, որ այս դեպքում անվանումը համապատասխանում է բովանդակությանը:

«Ելք»-ից մեր գործընկերները նշել են, որ հանձնաժողովի ստեղծման մեջ ոչինչ չկա: Ես երեկ Փաշինյանին ասացի՝ եթե այդ ամենը անենին Գորիկ Հակոբյանը և Վահրամ Շահինյանը, Նիկոլ Փաշինյանը՝ որպես ազգային ժողովի ընդդիմադիր պատգամավոր, ԱԺ-ն օդ կհաներ, Ազգային ժողովից բան չէր թողնի, կոնկրետ բան եմ ասում, հիմա ի՞նչ է փոխվել, ընկեր: Վերանանք անձից, ես անձնապես ո՛չ Արթուր Վանեցյանի, ո՛չ էլ Սասուն Խաչատրյանի հետ խնդիր չունեմ, ո՛չ էլ՝ Նիկոլ Փաշինյանի: Որևէ մեկի հետ այս երկրում ես խնդիր չունեմ: Ես Ձեզ ասում եմ՝ եթե այդպիսի բան տեղի ունեցած լիներ, Նիկոլ Փաշինյանը Սերժ Սարգսյանի, Ռոբերտ Քոչարյանի մասին ի՞նչ կխոսեր»,- հայտարարել է Շարմազանովը:

Շարմազանովը նշել է, որ կա մարդու իրավունքների պաշտպանի հայտարարություն, որտեղ ասվում  է, որ «մարդուն կալանավորում են, որ ոչ թե ինքը ցուցմունք տա, այլ փաստերի հիմա վրա են կալանավորում»:

Շարմազանովը նշել է, որ վարչապետը շատ հմուտ գործիչ է:

«Սրանում որևէ կասկած լիներ չի կարող, որ նա շատ հմուտ գործիչ է, բայց նա չխոսեց այն բաների մասին, որոնք կային այդ ձայնագրության մեջ: Նիկոլ Փաշինյանը կոչ է անում ասֆալտին պառկեցնել մարդկանց և մենք չգիտենք, թե որ իրավունքով: Նիկոլ Փաշինյանի այս հայտարարությունը սկիզբ էր Հայաստանում քաղաքական տեռորի սկզբի մասին, սա իմ կարծիքն է: Սա պետությո՞ւն է, թե՞ պոպուլյակրատիա, որ ով ուզի և ինչ ուզի անի»,- ասել է Շարմազանովը:

Անդրադառնալով խնդրին, որ որոշ քաղաքական գործիչներ կարծիք են հայտնում, թե Ռոբերտ Քոչարյանը կապ ունի այդ գաղտնալսման հետ, Շարմազանովը նշել է.

«Ես՝ որպես ԱԺ փոխնախագահ, կոչ եմ անում Ալեն Սիմոնյանին և բոլորին, ովքեր ունեն համապատասխան փաստեր, գնալ և հայտնել դրանք: Եթե որևէ կուսակցության կամ քաղաքական գործչի մեղադրում են ինչ-որ բանի մեջ, ապա նրանք պետք է ապացուցեն նրա մեղավորությունը, այլ ոչ թե տվյալ գործիչը կամ կուսակցությունն արդարանա»: