Տեղի է ունեցել ՀՀ-ում ապաստան ստացած փախստականների ինտեգրման և տեղահանվածների, երկարաժամկետ միգրանտների վերաինտեգրման հարցերով համաժողովի հանդիպումը

Տեղի է ունեցել ՀՀ-ում ապաստան ստացած փախստականների ինտեգրման և տեղահանվածների, երկարաժամկետ միգրանտների վերաինտեգրման հարցերով համաժողովի 19-րդ աշխատանքային հանդիպումը, որն առաջին անգամ հյուրընկալվեց ԱՍՀՆ կողմից՝ որպես փախստականների, տեղահանվածների և երկարաժամկետ միգրանտների ինտեգրման և վերաինտեգրման լիազորությունները վերջերս ստանձնած մարմին։

Քննարկմանը մասնակցել են Աշխատանքի և սոցիալական հարցերի նախարարի տեղակալ Աննա Ժամակոչյանը, ՀՀ-ում Չեխիայի Հանրապետության արտակարգ և լիազոր դեսպան Պետր Պիրունչիկը, ՆԳՆ Միգրացիայի և քաղաքացիության ծառայության պետ Արմեն Ղազարյանը, Միասնական սոցիալական ծառայության պետի առաջին տեղակալ Անի Չիլինգարյանը, «ICMPD-Հայաստան» ծրագրի ղեկավար Անդրեյ Ափոյանը, ոլորտի միջազգային և տեղական կազմակերպությունները։

Հանդիպման ընթացքում քննարկվել են ՀՀ-ում ապաստան ստացած փախստականների ինտեգրմանն ուղղված ծառայությունները, այս ուղղությամբ նախատեսվող ռազմավարության մշակման գործընթացն ու գործիքակազմը, առկա խնդիրներն ու անելիքները։
Նախարարի տեղակալ Աննա Ժամակոչյանն իր ելույթում ընդգծել է Ինտեգրման և վերաինտեգրման ռազմավարական ծրագրի ներառական մշակման կարևորությունը և առաջարկել այս հարթակի միջոցով քննարկումների իրականացումն ու միջազգային և տեղական գործընկերների հետ ջանքերի մեկտեղումը։ Նախարարի տեղակալն անդրադարձել է նաև հայկական պատվիրակության՝ Չեխիայի Հանրապետություն վերջերս կատարած այցին, որի շրջանակում պատվիրակության անդամները ծանոթացել են միգրացիայի կառավրման չեխական փորձին, օտարերկրացիների և հայրենադարձների ինտեգրման և վերաինտեգրման օրենսդրական կարգավորումներին և ծառայություններին։ Չեխիայի դեսպանը ողջունել է երկու երկրների միջև փորձի փոխանակման ծրագիրը և դրա շարունակականության հեռանկարը։

Հանդիպման ընթացքում շահագրգիռ պետական մարմինների և գործընկեր միջազգային կառույցների ներկայացուցիչները ևս կարևորել են սերտ համագործակցության շարունակականությունը միգրացիայի կառավարման ուսումնասիրման, ինտեգրման և վերաինտեգրման փորձի փոխանակման, միասնական վերաինտեգրման ծառայությունների ստեղծման և ինտեգրման ձեռնարկի մշակման աշխատանքներում։
Մինչ քննարկումը՝ ՀՀ-ում Չեխիայի Հանրապետության արտակարգ և լիազոր դեսպան Պիրունչիկը հանդիպում է ունեցել նաև «Նորք» հիմնադրամում, որտեղ գործադիր տնօրեն Անահիտ Պարզյանը ներկայացրել է սոցիալական պաշտպանության ոլորտի «e-Work», «e-Disability», «e-Social» տեղեկատվական համակարգներն ու դրանց թվայնացման գործընթացը, տվյալների վերլուծության թվային ծառայությունների սպասարկման ձևավորման մշակման մեխանիզմները։