ՀԱՊԿ զորքերը սկսում են «հակամարտության լուծման» հիմնական գործողությունները

ՀԱՊԿ հավաքական ուժերը Հայաստանում սկսում են իրենց խոշորագույն զորավարժությունը, որը նախորդ շաբաթ անցկացված վարժանքների տրամաբանական շարունակությունն է: Սցենարի համաձայն՝ հետախույզները պարզել են պայմանական ահաբեկիչների գտնվելու վայրերը, նախապես մշակել են նրանց, և այժմ ժամանակն է ոչնչացնել նրանց հիմնական ուժերը: Զորավարժության այս փուլին կիրառվելու են հնարավոր բոլոր զինատեսակները, բացի ռազմավարական նշանակության խոցման միջոցներից:

«Այս տարի մենք անցկացնում ենք հավաքական ուժերի զորավարժությունների ամբողջական ցիկլ, հերթականությամբ, երկու տարածաշրջանում՝ Կովկասյան և Կենտրոնասիական: Դրանք անցկացվում են «Մարտական եղբայրություն 2017» օպերատիվ-ռազմավարական զորավարժության տեսքով», — զորավարժության մեկնարկի կապակցությամբ հայտարարեց ՀԱՊԿ գլխավոր քարտուղար Յուրի Խաչատուրովը:

ՀԱՊԿ անդամ բոլոր պետությունների դրոշների բարձրացումով այսօր Հայաստանում մեկնարկել է ՀԱՊԿ «Փոխգործակցություն» զորավարժությունը, որը հավաքական ուժերի կազմով այս տարի անցկավող վարժանքներից խոշորագույնն է: Մասնակցում են դաշինքի անդամ բոլոր պետությունների ավիացիոն, մոտոհրաձգային, հրթիռահրետանային և այլ զորքեր: Ներգրավված զորատեսակներին անդրադառնալիս ՀԱՊԿ գլխավոր քարտուղարը խոսեց «Իսկանդեր» համալիրների հնարավոր կիրառման մասին:

«Դե, թղթի վրա ամեն ինչ էլ պլանավորել ենք, իսկ գործնականում այստեղ որտե՞ղ կարող ես պլանավորել: Հայաստանը փոքր է, հանկարծ կթռչի ինչ-որ տեղ, Թուրքիա կընկնի: Չի կարելի: Պլանավորումը կիրականացվի Ռուսաստանում որևէ տեղ», — նշեց ՀԱՊԿ գլխավոր քարտուղարը:

Յուրի Խաչատուրովը չնշեց ներգրավված ստորաբաժանումների կազմն ու զինատեսակները, սակայն հայտարարեց, որ դրանց մի մասը կիրառվելու է Ռուսաստանի տարածքում, քանի որ այդպիսի խոցման միջոցներ ունի միայն Ռուսաստանը:

«Հետախուզությունն անցկացրինք, հիմա իրականացնում ենք պլանավորում, և ամսի 13-ին կոչնչացնենք ահաբեկիչներին: Զորավարժությունն անցկացվում է Ռուսաստանի հարավային ռազմական շրջանի հրամանատարի ղեկավարությամբ, որովհետև հնարավոր է կիրառվեն խոցման այնպիսի միջոցներ, որոնք կան միայն Ռուսաստանում», — նշեց Խաչատուրովը:

Զորավարժության հիմնական նպատակներից մեկը տարբեր երկրներից եկած, տարբեր ռազմական համակարգերում թրծված զինվորականների ուսուցումն է համատեղ աշխատանքին, զինվորականների խոսքով՝ վարչական ապարատի ներդաշնակումը: Կիրառվելու են նաև որոշումների ընդունման ու զորքերի ղեկավարման ավտոմատացված համակարգեր:

«Մասնակցելու են ինչպես խաղաղապահ գործունեություն իրականացնող ստորաբաժանումներ, մասնակցելու են հատուկ ստորաբաժանումներ և մասնակցելու են համազորային, հրթիռային, ավիացիոն բոլոր խմբավորումները, որոնք գործում են ՀԱՊԿ-ի երկրներում, բացառությամբ կարևոր ստրատեգիական զենքի: Մնացած բոլորը օգտագործվելու են», — մասնակիցների մասին տեղեկությունները հայտնեց ՀՀ ԶՈւ գլխավոր շտաբի պետ, գեներալ-լեյտենանտ Մովսես Հակոբյանը:

Սրան նախորդած հետախուզական վարժանքներից հետո ժամանակն է տեղայնացնել հորինված հակառակորդին: ՀԱՊԿ հավաքական ուժերն ու հայ-ռուսական միացյալ զորախմբի ստորաբաժանումները ստուգելու են իրենց կարողությունները պայմանական թշնամու հայտնաբերման ու ոչնչացման գործում, իսկ ՀԱՊԿ ղեկավարությունը հետևելու է զորավարժության հրամանատարության աշխատանքի արդյունավետությանը:

«Հիմնական նպատակն է այն համապատասխան էս ռեգիոնում այն բոլոր սպառնալիքների հետ կապված իրականացնել կանխարգելիչ միջոցառումներ, ինչի չէ՝ նաև համապատասխան իրականացված հատուկ օպերացիաներ մշակման արդյունքներով իրականացնել և չեզոքացնել, ապահովել տվյալ մեր տարածաշրջանի անվտանգությունը: Ամենակարևորը դա է, մեր նպատակը», — նշեց ՀԱՊԿ օպերատիվ արձագանքման հավաքական ուժերի հրամանատար, գեներալ-մայոր Կարեն Աբրահամյանը:

ՀԱՊԿ հավաքական ուժերը ներկայում պատրաստվում են բուն վարժանքներին, որոնց մարտական կրակով փուլը Հայաստանում կանցկացվի այս շաբաթ: Զորավարժության մտահղացման համաձայն՝ հորինված հակառակորդի ոչնչացումից հետո հակամարտության գոտում տեղակայվելու են խաղաղապահ ստորաբաժանումներ՝ կարգ ու կանոն հաստատելու համար: Բայց դա կլինի արդեն Ղազախստանում: