Պուտինի ուղերձը ՌԴ քաղաքացիներին՝ կապված կենսաթոշակային բարեփոխումների հետ

ՌԴ նախագահ Վլադիմիր Պուտինը տեսաուղերձով դիմել է Ռուսաստանի քաղաքացիներին և ներկայացրել կենսաթոշակային բարեփոխումների անհրաժեշտությունը: Նա ընդգծել է, որ փոփոխությունների գլխավոր խնդիրն է ապահովել կենսաթոշակային համակարգի կայունությունը: Պուտինը նաև որոշ միջոցներ է առաջարկել, որոնց շնորհիվ տեղի ունեցող փոփոխությունները առավելագույնս մեղմ կընթանան:

Կենսաթոշակային բարեփոխումների վերաբերյալ կառավարության ներկայացրած օրինագիծը ՌԴ Պետդուման առաջին ընթերցմամբ հաստատել էր հունիսին: Ըստ այդ բարեփոխումների՝ կանանց կենսաթոշակային տարիքը պետք է բարձրանա 55-ից 63 տարեկանի, իսկ տղամարդկանցը՝ 60-ից 65-ի: Օրինագիծը երկրում համատարած դժգոհությունների և ցույցերի առիթ էր դարձել:

Այս իրավիճակից դուրս գալու համար Ռուսաստանի նախագահ Վլադիմիր Պուտինը երկրի քաղաքացիներին անձամբ է բացատրել բարեփոխումների անհրաժեշտությունը: Պուտինի խոսքերով՝ 90-ականների վերջին երկիրը կանգնել է լուրջ տնտեսական և սոցիալական ճգնաժամի առջև, ինչն էլ ժողովրդագրական խնդիրների պատճառ է դարձել:

«Հիմա հենց 90-ականներին ծնված այդ փոքրաթիվ սերունդն է հասել աշխատելու տարիքի: Դրա հետ կապված էլ ավելի է մեծանում կենսաթոշակային համակարգին բաժին ընկնող ծանրաբեռնվածությունը: Հետևությունը մեկն է՝ կրճատվում է աշխատունակ բնակչության թիվը, ավտոմատ կերպով նվազում են նաև կենսաթոշակային վճարները»,- նշել է Պուտինը:

Կենսաթոշակային բարեփոխումների դեմ արտահայտվողները հաճախ նաև հիշեցնում էին Վլադիմիր Պուտինին, որ նա խոստացել էր, թե իր նախագահության ընթացքում կենսաթոշակային տարիքը չի բարձրանա: Պուտինը նաև այս հարցին է անդրադարձել:

«Այդ պահին տնտեսական տեսանկյունից այդ դիրքորոշումը հիմնավորված էր, իսկ սոցիալական տեսանկյունից՝ արդարացված: Անհրաժեշտ էր նախ տնտեսական աճ ապահովել և լուծել սուր սոցիալական խնդիրները»,- հավելել է Պուտինը:

Պուտինի խոսքերով՝ պետության ձեռնարկած միջոցների շնորհիվ Ռուսաստանում կյանքի տևողութունն աճել է՝ վերջին 15 տարվա ընթացքում ավելանալով 8 տարով:

ՌԴ ղեկավարը նշել է, որ առաջարկվող փոփոխությունները ոչ միայն թույլ կտան պահպանել թոշակառուների եկամուտների մակարդակը, այլև ապահովել դրանց կայուն աճը:

Վլադիմիր Պուտինը նաև բացատրել է, թե ինչու արդյունավետ չէին լինի կենսաթոշակային համակարգի կայունությունն ապահովելու այլընտրանքային տարբերակները: Պետական սեփականության մի մասի վաճառքը, նավթագազային ընկերություններից լրացուցիչ հարկերի գանձումը, պահուստային ֆոնդերի օգտագործումը նախագահի խոսքերով, միայն ժամանակավոր լուծում կտային հարցին: Ռուսաստանի ղեկավարը միջոցներ է առաջարկել, որոնք թույլ կտան մեղմացնել ընդունված որոշումները:

«Անհրաժեշտ եմ համարում օրինագծով կանանց համար առաջարկվող կենսաթոշակային տարիքը բարձրացնել ոչ թե 8, այլ 5 տարով: Եվ նաև պետք է հաշվի առնենք բազմազավակ մայրերի համար ժամանակից շուտ թոշակի անցնելու կանոնները: Առաջիկա 2 տարում հին օրենսդրությամբ թոշակի անցնող քաղաքացիներին հատուկ արտոնություն կտրվի. նրանք կարող են թոշակի գնալ նոր կենսաթոշակային տարիքից 6 ամիս շուտ»,- ասել է ՌԴ նախագահը:

Պուտինը նաև բարձրաձանել է այն մտահոգությունները, որ կենսաթոշակային տարիքին մոտ գտնվող մարդիկ կկորցնեն աշխատանքը և կմնան և՛ առանց թոշակի, և՛ առանց աշխատավարձի: Այս առնչությամբ պետությունը լրացուցիչ միջոցներ կձեռնարկի, որոնք աշխատաշուկայում կպաշտպանեն բարձր տարիքի քաղաքացիներին:

«Գործատուների համար պետք է սահմանվի վարչական և նույնիսկ քրեական պատասխանատվություն կենսաթաշակային տարիքին մոտ գտնվող աշխատողներին աշխատանքից հեռացնելու, ինչպես նաև տարիքի պատճառով քաղաքացիներին աշխատանքի չընդունելու համար»,- նշել է Պուտինը:

Ամփոփելով իր խոսքը՝ Վլադիմիր Պուտինը ևս մեկ անգամ ընդգծել է, որ առջևում իրենց դժվարին, բայց անհրաժեշտ որոշում է սպասվում և խնդրեց երկրի քաղաքացիներին ըմբռնումով մոտենալ այդ հարցին: