Գագիկ Հարությունյանը պարգևատրվեց ԳԱԱ ոսկե մեդալով

Հայաստանի Սահմանադրական դատարանի նախկին նախագահ, Բարձրագույն դատական խորհրդի նորընտիր նախագահ Գագիկ Հարությունյանը պարգևատրվել է Հայաստանի գիտությունների ազգային ակադեմիայի բարձրագույն պարգևով` ոսկե մեդալով:

Ինչպես հաղորդում է «Արմենպրես»-ը, գիտությունների ազգային ակադեմիայում Գագիկ Հարությունյանի 70-ամյակին նվիրված միջոցառման շրջանակներում պարգևը Գագիկ Հարությունյանին հանձնեց Հայաստանի գիտությունների ազգային ակադեմիայի նախագահ Ռադիկ Մարտիրոսյանը: Համառոտ ներկայացնելով Գագիկ Հարությունյանի գործունեությունը` Ռադիկ Մարտիրոսյանն ընդգծեց, որ հատկապես կարևոր է նրա վերջին 25 տարիների գործունեությունը:

«Նրա գործունեությունը կարելի է երկու մասի բաժանել` կազմակերպչական և գիտական: Կազմակերպչական գործունեության առումով դա հիմնականում Սահմանադրական դատարանի  միջազգային ճանաչման հասնելն է, Սահմանադրական դատարանի միջոցով միջազգային հանրությանը Հայաստանը ներկայացնելն է: Իսկ գիտական գործունեությունը իրավագիտության ոլորտում նրա արձանագրած հաջողություններն են»,- նշեց Ռադիկ Մարտիրոսյանը:

Նա ընդգծեց, որ իրենք ՍԴ-ին միշտ համարել են լավ հարևան, որի հետ լավ հարաբերությունների մեջ են:

«Գիտեք այսպիսի բան կա, երբ հարևաններից մեկը նոր տուն է ստանում, հարևաններով հավաքվում են և նրան ճանապարհում են: Հիմա մենք էլ ենք դրա համար հավաքվել, քանի որ Գագիկ Հարությունյանը նոր տուն է գնում, հավաքվել ենք նրան ճանապարհելու»,- ասաց Մարտիրոսյանը:

  Նա հիշեցրեց, որ անցած 25 տարիների ընթացքում Գագիկ Հարությունյանը ունի 250 տպագրված գիտական աշխատանք, 40  մենագրություն, որոնց մեծ մասը տպագրված են տարբեր լեզուներով: Ռադիկ Մարտիրոսյանը շեշտեց, որ հաշվի առնելով Գագիկ Հարությունյանի պատկառելի գիտական գործունեությունը` գիտությունների ազգային ակադեմիայի ղեկավարությունը որոշել է նրան պարգևատրել ակադեմիայի ոսկե մեդալով: Գագիկ Հարությունյանը շեշտեց, որ իր համար բացառիկ կարևորություն ունի այն հանգամանքը, որ գիտությունների ազգային ակադեմիան ուշադրություն է հատկացրել ոչ միայն իր անձին, այլ նաև գիտական գործունեությանը:

«Գրեթե կես դարից ավել գիտական գործունեությունը իմ կյանքի անբաժանելի մասն է եղել: Դա հատկապես իր ծավալումը ստացավ հենց այս բնագավառում, որովհետև ես միշտ շեշտել եմ, որ Սահմանադրական դատարանները գտնվում են գիտության և պրակտիկայի խաչմերուկում: Առանց գիտական մտածողության այս ոլորտում լուրջ գործունեություն ծավալելն անհնար է»,- ասաց Հարությունյանը:

ՍԴ նախկին նախագահը իր կողմից գիտությունների ազգային ակադեմիայի նվիրեց իր մենագրությունները` հայերենով և անգլերենով: ՍԴ նորընտիր անդամ, ՍԴ նախագահի թեկնածու Հրայր Թովմասյանն էլ կարևորեց Գագիկ Հարությունյանի մեծ ներդրումը Հայաստանի նոր Սահմանադրության մշակման հարցում:

«Սահմանադրական բարեփոխումների գործընթացի շարժիչ ուժը, այդ փոփոխություններն առաջ տանողը եղել է Գագիկ Հարությունյանը: Սահմանադրական բարեփոխումների հանձնաժողովում աշխատանքի ժամանակահատվածը իմ կյանքի մի կարևոր հատված էր: Այդ ընթացքում ցանկացած գաղափար վերցում, մշակվում էր և այնպես էր ներկայացվում, որ սկզբնական վիճակում, երբ անգամ ներկայացնում էինք, չէինք էլ պատկերացնում, որ վերջում նման տեսք կունենա: Դա այն առաքելությունն է, որը մեր երկրին շատ առաջ է տանելու: Պարոն Հարությունյան, Դուք դրա մոլի հավատացյալն էիք: Այլ կերպ հնարավոր չէր: Եթե հանձնաժողովը ձեր գլխավորությամբ այդ ամբողջին չհավատար, մենք դրան չէինք հասնելու, որովհետև եթե մենք չհավատայինք, մյուսներին չէինք կարողանալու համոզել»,- ասաց Թովմասյանը:

Նրա խոսքով` նոր Սահմանադրությունը սերունդների համար է, որին հասարակ բանվորից մինչև ապագա վարչապետ առնչվելու են, և բոլորը տեսնելու են դրական փոփոխությունները: