Չէի ցանկանա, որ հաջորդ փուլում «Արսենալ»-ին բաժին հասնի Մադրիդի «Ատլետիկոն». Արսեն Վենգեր

Առաջինն, ինչ աչքի ընկավ երեկվա «Արսենալ»-«Միլան» խաղում,  մարզադաշտ եկած հանդիսատեսների  անհամեմատ մեծ թիվն էր, ի տարբերություն նախորդ հանդիպումների:  Խաղից առաջ Արսեն Վենգերը հատուկ էր անդրարադարձել այդ խնդրին, նշելով որ ամենակարևորը հիասթափված երկրպագույին կրկին մարզադաշտ վերադարձնելն է:  Եվ մեծ հաշվով դա հաջողվեց:   «Արսենալ»-ը վերջին երեք խաղերում տարել հաղթանակներ է տարել,  խփել 8 գնդակ, բաց թողել միայն մեկը:   «Միլան»-ի հետ պատասխան հանդիպումից առաջ, մրցակցի դաշտում խփած երկու գնդակի առավելությամբ  «Արսենալ»-ը իհարկե ֆավորիտ էր:  Բայց ֆավորիտ լինելու գործոնը մեծացնում է պատասխանատվությունը և ինչ-որ իմաստով վերածվում է նաև ճնշող գործոնի, առավել ևս երբ մրցակիցը կարգով ցածր չէ ու կորցնելու ոչինչ չունի:    Հենց այս տրամաբանությամբ էլ «Միլան»-ը մոտեցել էր պատասխան հանդիպմանը:  Ու չնայած «Արսենալ»-ի տարածքային առավելությանը,  խաղի սկիզբը լոնդոնցիների համար այնքան էլ լավ չդասավորվեց:  Նախ թիմի ավագ Կոսյելնին վնասվածք ստացավ և չկարողցավ շարունակել խաղը:  Իսկ քիչ անց Հաքան Չալխանօղլուի հեռահար հարվածով  արձանագրվեց դարպասի գրավում:  Շատերը երևի միանգամից «Էստերսունդ»-ի հետ լոնդոնյան հանդիպումը հիշեցին:  Բարեբախտաբար անգլիական ակումբը այս անգամ շատ շուտ դուրս եկավ ստեղծված իրավիճակից՝  արդարացի նշանակված 11 մետրանոց՞ի, մրցավարական սխալ՞ի, թ՞ե Ուելբեքի սիմուլյացիայի շնորհիվ՝   «Արսենալ»-ի ու երկրպագուների համար դա այլևս կարևոր չէր:   Խաղից հետո Չալխանօղլուն հեգնանքով  ասաց, թե մրցավար Էրիկսենը հանդիպման ամենալավ խաղացողն էր, և կարողացավ ծնկի բերել «Միլան»-ին:   Եթե պարտվող թիմի համար սա արդարացման փորձ է, ապա «Արսենալ»-ի համար  չափազանցություն է:   Անկախ 11 մետրանոցի արդարացի կամ ոչ արդարացի լինելուց «Արսենալ»-ը օբյեկտիվորեն ուժեղ էր այս խաղում, իսկ իտալական թիմը ծնկի էր եկել շատ ավելի շուտ, դեռ Միլանում ու այդ մասին չխուսափեց խոստովանել նաև «Միլան»-ի գլխավոր մարզիչը: 

«Եկեք անկեղծ լինենք և ընդունենք, որ քառորդ եզրափակիչ դուրս գալու հնարավորությունները կորցրել էինք դեռ մեկ շաբաթ առաջ «Սան Սիրո» մարզադաշտում:   Ամեն դեպքում  «Արսենալ»-ի հետ երկու հանդիպումներն ապացուցեցին, որ մենք կարող ենք լուրջ խնդիրներ ստեղծել հզոր թիմերի համար և ես  շնորհակալություն եմ հայտնում   խաղացողներին:  Ես հպարտանում եմ իմ ֆուտբոլիստներով:   Իսկ մրցավարների մասին չեմ ցանկանում խոսել:  Նրանք կարող են սխալվել այնպես, ինչպես խաղացողները»,- խաղից հետո ասուլիսում նշել է Ջեննարո Գատտուզոն:  

Ավելի շատ հպարտանալու առիթ ուներ, իհարկե, Վենգերը:   «Արսենալ»-ի վերջին շրջանի յուրաքանչյուր հանդիպումը  լավ կամ վատ իմաստով ուղղակիորեն ազդում է Վենգերի ու նրա  վարկանիշի  վրա,  ու երբեմն նույնիսկ այնպես, որ    քննադատները պատրաստ են մոռանալ նրա համաշխարհային ճանաչումը ու «Արսենալ»-ի  22 տարիների   փառահեղ հաղթանակները:   Թերևս նաև դրա պատճառով Վենգերը   իր վերջին հարզցազրույցներում միշտ զգուշավոր է  ու համեմատություններ է անում  նախորդ՝ այսպես ասած սև շրջանի հետ: 

«Ընդհանուր առմամբ մենք հիմա շատ ավելի լավ ենք խաղում: Այս հաղթանակը շատ կարևոր էր մեզ համար, որպեսզի շարունակվի հաղթական շարքը:   Եթե շարունակենք նույն ոգով խաղալ և այսպիսի արդյունքներ գրանցել, վստահ եմ, որ երկրպագուները կաջակցեն մեզ»,- ասել է Արսեն Վենգերը:

 Մի շատ անկեղծ խոստովանություն էլ  է արել Վենգերը: Նշել է, թե չէր ցանկանա, որ հաջորդ փուլում «Արսենալ»-ին բաժին հասնի Մադրիդի «Ատլետիկոն», որը երկու խաղում Մոսկվայի «Լոկոմոտիվ»-ի դարպասը  ուղարկել էր 8 գնդակ, սեփականն ընդունելով միայն մեկը:   
Ինչ վերաբերում է Հենրիխ Մխիթարյանին, ապա այս անգամ ևս նա ցուցադրեց արդյունավետ խաղ:  Գոլեր ու գոլային փոխանցումներ չեղան, սակայն երկրպագուները գնահատում են   ֆուտբոլիստի ամբողջ աշխատանքը:  «Միլան»-ի հետ պատասխան հանդիպումից հետո համացանցում այսպիսի արձագանքներն են հնչել  Մխիթարյանի հասցեին: 

1.«Մխիթարյանը իսկապես մեծ ծավալի աշխատանք է կատարում:   Չէի սպասում, որ նա այդքան    աշխատասեր կարող էր լինել:   Նա ամենաշատն է զարմացնում իր տրանսֆերից հետո»:

2.«Սկսում եմ զգալ, որ մենք «կողոպտել» ենք «Մանչեսթեր Յունայթեդին»՝  Սանչեսին-Մխիթարյանի հետ փոխանակելու  արդյունքում: Հայ ֆուտբոլիստը կատարյալ խաղացող է «զինագործների» համար»: 

3.«Հիշո՞ւմ եք, ինչպես էինք բոլորս պնդում, որ Միկին չի կարող փոխարինել Սանչեսին:  Բայց նա հիմա դա է անում և հրաշալի է անում:   Բացի դրանից նա շատ լավ է   համագործակցում    Օզիլի հետ:    Նրա պաշտպանողական գործողությունները նույնպես տպավորիչ են»: