Բժիշկը թվարկել է ուղեղի ու հիշողության համար ամենաօգտակար մթերքները

Հաճախ հիշողության և ուշադրության հետ կապված խնդիրներ բոլոր տարիքի մարդկանց մոտ առաջանում են անառողջ սննդակարգի և, որպես հետևանք, վիտամինների և հանքանյութերի պակասի պատճառով: Որոշ նյութերի պակասը կարող է հանգեցնել ավելի լուրջ խնդիրների, ինչպիսիք են՝ մեծահասակների մոտ Ալցհեյմերի հիվանդությունը կամ երեխաների զարգացման հետաձգումը:

Նյարդաբան Օլգա Կոզլովան «Իզվեստիա»-ին ասել է, թե որ մթերքներն են բարելավում ուղեղի աշխատանքը և հիշողությունը։

Ինչպես նշել է բժիշկը, ճանաչողական գործառույթների բարելավման գաղտնիքը հաճախ ճիշտ սնվելու մեջ է։

«Այնպիսի ձկները, ինչպիսիք են՝ ծովատառեխը, սկումբրիան և սաղմոնը, օմեգա-3 ճարպաթթուների հիանալի աղբյուր են, որոնք ոչ միայն բարելավում են ուղեղի աշխատանքը, այլև օգնում են ամրացնել և մաքրել անոթները, նորմալացնել արյան ճնշումը և կանխել սրտանոթային հիվանդությունները: Յուղոտ ձուկը սննդակարգում ներառելը կարող է մեծապես բարելավել հիշողությունն ու նյութափոխանակությունը»,- ասել է Կոզլովան։

Նաև, ըստ նրա, օմեգա-3-ի հիանալի աղբյուր է կտավատի սերմի յուղը: Այն պարունակում է ճարպաթթուների զգալի մասը, որոնք օգնում են ամրապնդել հիշողությունը։

Շոկոլադի չափավոր օգտագործումը նույնպես բարենպաստ է ազդում ուղեղի վրա, ընդգծել է մասնագետը։

«Մուգ շոկոլադը կարող է օգտակար լինել ձեր ուղեղի համար: Այն պարունակում է անտոցիանիններ և ֆլավանոլներ, որոնք բարելավում են արյան անոթների աշխատանքը և մեծացնում արյան հոսքը դեպի ուղեղ։ Արդյունքում ուղեղը ստանում է հավելյալ սնուցում, ինչը նպաստում է նրա կենսունակությանն ու արդյունավետությանը»,- հավելել է բժիշկը։

Բացի այդ, նա հիշեցրել է, որ հավի ձուն հարուստ է B խմբի վիտամիններով, որոնք կարևոր դեր են խաղում ուղեղի առողջության հարցում։

«Ձուն օգնում է տարեցների դեմենցիայի կանխարգելմանը և երիտասարդների մոտ լավացնում է հիշողությունը և կենտրոնացումը: Ձվի դեղնուցում պարունակվող խոլինը անհրաժեշտ է նյարդային հյուսվածքի բնականոն աշխատանքի համար»,- պարզաբանել է բժիշկը։

Մասնագետը նաև հորդորել է սննդակարգում չմոռանալ ներառել ընկույզ։ Այն ուղեղի համար սննդանյութերի «իսկական պահեստ» է։

«Ընկույզը պարունակում է մելատոնին, մագնեզիում և օմեգա-3 ճարպաթթուներ, որոնք ապացուցված են, որ բարելավում են ճանաչողական գործառույթը: Ընկույզի մեջ հայտնաբերված վիտամին E-ն օգնում է պայքարել ազատ ռադիկալների դեմ, նվազեցնում է բորբոքումն օրգանիզմում և կարող է դանդաղեցնել Ալցհեյմերի հիվանդության առաջընթացը: Օրական մի քանի ընկույզ ուտելը կօգնի էապես բարելավել ուղեղի աշխատանքը»,- ​​ասել է Կոզլովան։

Ամփոփելով վերը նշվածը՝  նա նշել է, որ սննդանյութերով հարուստ և կալորիականությամբ հավասարակշռված դիետան լավագույն մոտեցումն է ոչ միայն ուղեղի, այլև ամբողջ մարմնի առողջությունը պահպանելու համար: Միաժամանակ բժիշկը հորդորել է չմոռանալ, որ նույնիսկ ամենաառողջ մթերքների՝ չափից ավելի օգտագործումը կարող է հանգեցնել առողջական լուրջ խնդիրների։