Սերգեյ Բագրատյանը Սևանից լրացուցիչ ջրառի անհրաժեշտության հիմնավորումները խոցելի է համարում

ԱԺ «Ծառուկյան» խմբակցության անդամ Սերգեյ Բագրատյանն օգոստոսի 28-ին ԱԺ արտահերթ նիստի ժամանակ դիմեց Ջրային կոմիտեի նախագահ Ինեսա Գաբայանին՝ ընդգծելով, թե Սևանա լճից լրացուցիչ ջրառի անհրաժեշտության մասին խոսելիս միաժամանակ չեն ներկայացնում մի շարք կարևոր մանրամասներ: Պատգամավորն ընդգծեց՝ չեն ներկայացնում, թե նախորդ 100 մլն խմ-ն ինչ նպատակով է օգտագործվել, իմաստ ունեցե՞լ է այդ ջրառը, թե՞ ոչ: Բագրատյանի գնահատմամբ՝ Գաբայանի բերած հիմնավորումները խոցելի են, այդ թվում՝ այն հիմնավորումը, թե Հանրային ծառայությունները կարգավորող հանձնաժողովը սահմանել է կորուստների բարձր մակարդակ, քանի որ այս կառույցի գործունեության վերաբերյալ առնվազն ողջամիտ կասկածներ կան: Բացի այդ, ըստ Բագրատյանի, կորուստների այն ծավալը, որի մասին խոսում են, անհնար է:

«27-30 տոկոս կորուստ ենք նախատեսում, և դա դուք ընդունում եք հիմք՝ այս ջրառը կազմակերպելու նպատակով: Դուք նաև նշում եք, որ 43 մլն խմ է պակասում, սակայն խոսում եք 40 մլն խմ լրացուցիչ ջրառի վերաբերյալ: Ի՞նչ է նշանակում այս պարբերականությամբ գնալ՝ 100 մլն, ապա 40 մլն, վաղը էլի, այսպես շարունակ, մենք կորցնում ենք Սևանը: Նախորդ տարիների ջրառի արդյունավետությունը կա՞, ի՞նչ արդյունավետություն կամ վերադարձելիություն է ապահովվել»,- հետաքրքրվեց նա:

Գաբայանն արձագանքեց, որ 100 մլն խմ լրացուցիչ ջրառի մասին խոսելիս պետք է հիշել՝ խոսքը նախորդ տարվա մասին է, ապա պատգամավորին ասաց, որ նա հնարավորություն ուներ այդ հարցերը տալ հենց նախկինում՝ այդ թեմայով քննարկման ժամանակ: Կոմիտեի նախագահը կոռեկտության կոչ արեց և հիշեցրեց՝ ինքն այս պաշտոնին նշանակվել է հուլիսի 10-ից և պատասխանատու է իր պաշտոնավարման օրվանից հետո առկա իրադրության համար:

«Ջրային կոմիտեն դեռ տարվա սկզբին՝ հունիսին, Կառավարությանը ներկայացրել էր 80 մլն խմ դեֆիցիտի պահանջ, իմ նշանակվելուց հետո կոմիտեի մասնագետների հետ միասին մենք բազմիցս քննարկեցինք, որոշեցինք՝ եթե հնարավորություն ունենք պոմպակայաններն ավելի շատ շահագործելով, ավելի մեծ ֆինանսական բեռի տակ մտնելով՝ կրճատել այդ դեֆիցիտը, Սևանից 40 մլն հավելյալ ջրառ կատարելու խնդրանքով դիմել: Մենք քննարկել ենք մեր բոլոր հնարավորությունները, սա երկար քննարկումների արդյունք է, խորանալ բոլոր այդ քննարկումների և թվերի մեջ՝ ժամանակ անգամ չունենք»,- նշեց Գաբայանը:

Նա տեղեկացրեց, որ ստեղծվել է միջգերատեսչական աշխատանքային խումբ, որտեղ ներգրավվել են բոլոր շահագրգիռ անձինք և գիտնականներ: Սերգեյ Բագրատյանը, արձագանքելով կոռեկտության կոչին, իր հերթին կոչ արեց որակումներով հանդես չգալ:

«Ձեր որակումները պահեք Ձեզ, Դուք չեք, որ պիտի ասեք՝ կոռե՞կտ հարց պիտի տա պատգամավորը , թե՞ ոչ: Կոռեկտության կոչ ես պետք է անեմ, որ առանց լուրջ հիմնավորումների բերել եք նման պահանջ: Դուք պետք է ապացուցեք այդ ջրառի անհրաժեշտությունը և համադրելիությունը գործող իրավիճակում, երբ Սևանում փրկության խնդիր ունենք: Բերել եք նման պահանջ և չեք հիմնավորում թվերով, մենք չենք հասկանում՝ արդյունքում ի՞նչ ենք ունենում, մե՞կ գյուղացու խնդիր ենք լուծում, թե՞ 500, կամ արդյո՞ք դա ժամանակավոր լուծում է»,- ասաց նա:

Գաբայանը վստահեցրեց՝ 40 մլն-ը հիմնավորված թիվ է, նշեց, որ կարող են պատգամավորին հրավիրել և ցույց տալ հիմնավորումները, ապա տեղեկացրեց, որ այս լրացուցիչ ջրառի արդյունքում ունենալու են 55 հազար գյուղատնտեսական ընտանիքների՝ ամբողջ տարվա ընթացքում մշակված արդյունքը ստանալու հնարավորություն: Կոմիտեի նախագահի խոսքով՝ այդ ջրառից օգտվելու են Գեղարքունիքի, Կոտայքի, Արագածոտնի, Արմավիրի, Արարատի մարզերում, նաև Երևանում: