Գյումրիում 2600 տնակ կա․ ապամոնտաժման ենթակա 800 տնակից դեռ 20-նն է քանդվել

Գյումրին պետք է տնակներից և ոչ հիմնական շինություններից ազատվի մինչև 2027 թվականը։ Սա կառավարության հայեցակարգն է, որով ենթադրվում է տնակների ապամոնտաժում, դրանցում ապրող ընտանիքների բնակարանային խնդրի ուսումնասիրում և բնակապահովում։ Համապատասխան որոշումը գործադիրը կայացրել է անցած տարի աշնանը։ Համաձայն դրա, բնակարան ստացած ընտանիքների տնակները պետք է ապամոնտաժվեն։ Զուգահեռ հստակեցվում է փոխհատուցման ձևն այն ընտանիքների համար, որոնք դեռ բնակարան կամ այլ փոխհատուցում չեն ստացել։ Ապամոնտաժման ենթակա ժամանակավոր կացարանների տերերին քաղաքապետարանը ծանուցագրեր է ուղարկում։ Վերջին մեկ ամսում ընդամենը 20 տնակ է ապամոնտաժվել։

«Մոտ 20 տնակ են բնակիչներն իրենց կամքով ապամոնտաժել։ Մենք ժամկետներ ենք սահմանում, եթե այդ ժամկետներում չեն ապամոնտաժում, ապա քաղաքապետարանն է ապամոնտաժում, իսկ ապամոնտաժման ծախսերը բնակիչն է հոգում։ Կան տնակներ, որոնց տերերին չենք կարողանում գտնել։ Առաջնահերթ ապամոնտաժման ենթակա 132 տնակ կա, որոնց տերերին չենք կարողանում գտնել»,- SHANTNEWS-ին ասել է Գյումրիի գլխավոր ճարտարապետ Հենրիկ Գասպարյանը։

Գյումրիում վերջին հաշվառման տվյալներով 2600 տնակ կա։ Այս թվերը քաղաքապետարանը հստակեցրեց այս տարվա ձմռանը և կառավարություն ներկայացրեց բնակեցված, դատարկ ու փակ դուռ համարվող տնակների տվյալները։ Այդ ցանկից ընտրվեցին այն տնակները, որոնք ենթակա են քանդման։ Այս կատեգորիային են պատկանում մոտ 800 տնակներ, որոնց տերերը փոխհատուցում ստացել են, բայց տնակները դեռ մնում են։ Դրանց մի մասն անօգտագործելի է, որոշ մասն էլ  վարձակալությամբ է տրվել այլ ընտանիքների բնակության համար։ Քաղաքապետարանն այդ տնակների տերերին ապամոնտաժման պարտադրանքի մասին ծանուցագրեր է հանձնել ու արդեն իսկ վերահսկելու ժամանակն է, թե արդյոք տնակներն ապամոնտաժվել են։

Ծանուցագրեր հարյուրավոր ընտանիքների են ուղարկել, բայց ապամոնտաժված տնակների թիվն ընդամենը 20 է։ Իսկ ինքնակամ ապամոնտաժելու վերջնաժամկետը մայիսի 1-ն էր, որից հետո քաղաքապետարանը պետք է ապամոնտաժեր։ Բայց ծանուցագրեր ստանալուց հետո ընտանիքները քաղաքապետարան են գալիս, ներկայացնում բնակարանային պատմությունները։ Ամեն մեկն ունի իր պատճառաբանությունը, թե ինչո՞ւ բնակարանային  փոխհատուցում ստանալուց հետո տնակը չի ապամոնտաժել։ Շատ են դեպքերը, երբ բնակարան ստացել են, վաճառել ու նորից տնակ վերադարձել։

«Երկու ոլորտներ են բախվում ՝ քաղաքաշինությունը, քաղաքի շահերը և սոցիալական ոլորտը։ Ամեն դեպքում հակված չենք մարդկանց անօթևան թողնել։ Կառավարության կողմից էլ կլինեն  ծրագրեր։ Մենք էլ սկսել ենք բարեգործական կազմակերպությունների հետ աշխատել, որ սոցիալական բնակարաններ կառուցենք և տրամադրենք ընտանիքներին»,- SHANTNEWS-ին ասել է Գյումրիի գլխավոր ճարտարապետ Հենրիկ Գասպարյանը։

Քաղաքի գլխավոր ճարտարապետն է նշում ՝ ծանուցագրեր ուղարկելուց հետո նորից ուսումնասիրում են բնակարանային գործը, դրանցում անճշտությունները բացառված չեն։ Քիչ չեն նաև դեպքերը, երբ տնակի տիրոջը պարզապես չեն կարողանում գտնել։ Տնակը փակ է, բնակեցված չէ, բայց զբաղեցնում է համայնքապատկան հողատարածքը։

Գյումրիում բնակարանային փոխհատուցման ենթակա է մոտ 1600 ընտանիք։ Սոցիալական բնակարանի շահառու կարող են դառնալ այն ընտանիքները, որոնք երկրաշարժին տուն չեն կորցրել, բայց տնակում են ապրում։ ԲԳՎ-ով կլուծվի այն ընտանիքների բնակարանային հարցը, որոնք ընդհանրապես փոխհատուցում չեն ստացել կամ նախորդ տարիներին ԲԳՎ էին ստացել, ու չէին կարողացել տուն գնել։