Կուզեմ իմ երկիրը պաշտպանված ու անվտանգ էղնի, որ եղբայրս գնալու է բանակ ծառայության․ գյումրեցի աղջնակի հունիսմեկյան ցանկությունը

Այսօր հունիսմեկյան տրամադրություն էր Գյումրիի հրապարակներում ու բակերում։ Երեխաների օրվան նվիրված բացօթյա միջոցառումներ ու համերգային ծրագրեր  էին կազմակերպվել երեխաների մասնակցությամբ։ Միջոցառումներին մասնակցում էին քաղաքապետարանի ենթակայության արվեստի դպրոցները, մանկապարտեզներն ու մշակութային կենտրոնները։

Դեպի կենտրոնական հրապարակ մեքենաների մուտքն արգելված է, տարածքն ամբողջությամբ տրամադրված է փոքրիկներին, կենտրոնում նրանք են՝ մի մասը վազվզում է կամ լուսանկարվում մուլտհերոսների հետ, մյուսները՝ զբաղված են կավճանկարչությամբ։ Ասֆալտին գույներ են, պատկերել են իրենց երևակայական  կերպարներն ու բնության տեսարանները։

Բնություն ու հայրենիք են նկարում, իսկ ամենամեծ ու անկեղծ ցանկությունը մեկն է՝ խաղաղությունը, որը մեր երկրին ու աշխարհին է պետք։

«Կուզեմ, որ միշտ Հայաստանը պաշտպանված լինի, որ իմ եղբայրը երբեք չտխրի, ինքն այս տարի բանակ է գնալու, որ մեզ պաշտպանի»,- ասում է գյումրեցի աղջիկը

«Ես ծաղիկ եմ նկարում, որովհետև Հայաստան որտեղ ես գնում եմ, մենակ ծաղիկ եմ տեսնում, դրա համար էլ այդ գեղեցիկ ծաղիկներից որոշեցի նկարել»,- ասւոմ է փոքրիկներից մեկը։

Խաղաղության ուղերձով Գյումրիի կենտրոնական հրապարակում նոր ռեկորդ սահմանելու էր եկել պատերազմից հետո Արցախից Գյումրի տեղափոխված 9 տարեկան Սուրեն Բաղդասարյանը։ Հայկական «Դյուցազնագրքում» Սուրենի  անունը կա, այս անգամ գերազանցեց իր նախորդ ցուցանիշը։ Կանգնած դիրքից 300 անգամ ընդունեց կամուրջ ելման դիրք՝ սահմանելով նոր ռեկորդ։ Սուրենն այն նվիրեց արցախցի ու աշխարհի բոլոր մանուկներին։

Տոնական տրամադրություն էր նաև Բագրատունյաց զբոսայգում, ելույթ էր ունենում  «Անի» մանկապատանեկան փողային նվագախումբը։ Մանկական նվագախումբը ձևավորվել է երկու տարի առաջ, կազմում ընդգրկված են քաղաքի արվեստի ու երաժշտական դպրոցների 30-ից ավելի շնորհալի երաժիշտներ։

Մանկապատանեկան փողային նվագախումբը անցած տարի է համալրվել  երաժշտական գործիքներով, քաղաքում հանդես եկել  համերգներով, հավակնում է դառնալ փողային նվագախմբերի լավագույն ավանդույթների կրողը Գյումրիում։

«Այս նվագախումբը ձևավորելու ժամանակ նպատակ ունեինք, որ այսօրվա պատանի երաժիշտները տարիներ անց կարողանան համալրել  հարուստ կենսագրություն ունեցող  և մշակութային ավանդույթներ ունեցող «Անի» փողային նվագախմբի կազմը»,- նշում է Գյումրիի քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը։

Փողային նվագախմբի երաժշտությամբ էլ ազդարարվեց կայարանամերձ հրապարակի վերանորոգված շատրվանների բացումը։ Սուբվենցիոն ծրագրով վերանորոգվել են զբոսայգին ու շատրվանները։ Բարեկարգման աշխատանքները կշարունակվեն նաև այս տարի։

Կայարանամերձ հրապարակից բացի, շատրվաններով ջրավազան կգործի նաև Մուշ 2 թաղամասում կառուցված զբոսայգում։ Այս տարի ևս նախատեսված է  4 զբոսայգիների բարեկարգում և կառուցում, որոնք կունենան ջրավազաններ ու շատրվաններ։ Սուրբ Ամենափրկիչ եկեղեցու հարակից այգու գեղեցիկ, ճարտարապետական լուծումներով շատրվանը կվերականգնվի Համաշխարհային բանկի ֆինանսավորմամբ, աշխատանքները կսկսվեն մեկ-երկու ամսից։