80-ականներին Գյումրիում կառուցված ստորգետնյա ավտոտնակները փլուզվում են

Մհեր Մկրտչյան 44 և Իսահակյան 9 շենքերի ընդհանուր բակում մասնակի փլուզվել է մոտ 40 տարի առաջ կառուցված ստորգետնյա ավտոտնակների ծածկաշերտը։ Ստորգետնյա ավտոտնակները մինչև երկրաշարժը թաղամասում եղած 9-հարկանի  բնակելիների ապրողներին է պատկանել։

Շենքերը փլուզվել են, ավտոտնակների սեփականատերերից շատերը չկան, և փաստացի անշարժ գույքը մնացել է առանց տնօրինման, ըստ նշանակության չի օգտագործվում ավելի քան 30 տարի։ Այն ընդամենը  երեխաների համար որպես   ազատ տարածք դարձել էր  խաղահրապարակ, իսկ բնակիչների համար գորգ լվանալու կամ բուրդ չորացնելու հարմար տեղ։

Տարիներով անօգտագործելի մնալու, այլ ազդեցությունների հետևանքով  ավտոտնակների բետոնյա կառուցատարրերը քայքայվել են, ծածկի ծանրությունն իրենց վրա կրող ամրանային հենասյուները՝ խոնավությունից խարխլվել: Ստորգետնյա այս կառույցների վտանգավորության աստիճանը տարեցտարի  մեծացել է, ավտոտնակների արտաքին ծածկի  փլուզումը տեղի է ունեցել գարնանային անձրևներից հետո։ Հիմա տեղում մեծ խորության փոսեր են բացվել:

«Անձրևներից հետո է էղել, գիշերը ժամը երկուսն էր, գոռոցը եկավ՝ չմտածեցինք, որ ըսպես բան կեղնի։ Առավոտ ելա, էրեխեն վազելով էկավ, ըսեց՝ տատ հայաթը բլել է ու տեսանք, որ  մեծ փոսեր էին բացվել»,-պատմում է բնակիչներից Սոնա Չաքմիշյանը։

Փլուզման պատճառը, բնակիչների ասելով՝ միայն տեղումները չեն, մարդկային գործոնն ավելի մեծ դեր է ունեցել։ Ավտոտնակների դարպասները թալանել-տարել են, ամրության համար կարևոր նշանակության հատվածներում ապամոնտաժումներ են արել, իսկ վտանգավոր հետևանքները շարունակվում են։

Ծնողները երեխաներին արգելել են բակում խաղալ, վտանգավոր է նաև տարածքին անծանոթ անցորդների համար: Փլուզումից հետո բնակիչները խնդիրը ներկայացրել են քաղաքապետարան, ահազանգել են փրկարար ծառայություն, իսկ գործն ավարտվել է տարածքը սահմանազատելով։

«Փլուզումը տեղի է ունեցել մարտ ամսին, քաղաքապետարանից եկել են, ուսումնասիրել ու լենտեր են անցկացրել ու դրանից հետո ոչ մի արձագանք չի եղել։ Մենք էլ հույս ունեինք, որ դիմացը ամառ է, մինչև ամառ գոնե հարցը կլուծվի, որ հարթեցում կիրականացնեն ու տարածքը անվտանգ կլինի թե՛ երեխաների և թե՛ մեզ համար»,- ասում է թաղի բնակիչներից Տաթև Մովսիսյանը։

Հետագա փլուզումներից կամ փորձանքներից հեռու մնալու համար բնակիչները քաղաքապետարանի պատասխանատուներին առաջարկել են տարածքը մաքրել փլատակներից կամ ծածկել առաջացած խորը փոսերը: Երկու շենքերի ընդհանուր բակը նաև մարզպետարանի հարևանությամբ է՝ հետնամասում։

Քաղաքապետարանի կոմունալ  ծառայության աշխատողները հերթական ահազանգից հետո  եկան տարածք։ Սկսեցին ցանցապատել ոչ միայն փլուզված հատվածները, այլև ամբողջ տարածքը։ Կոմունալ ծառայության պատասխանատուն նշեց, որ սա խնդրին ժամանակավոր լուծում է՝ տարածքը փլատակներից մաքրելու անհրաժեշտություն կա։

«Առաջնային խնդիրը հիմա կայանում է նրանում, թե էս ապամոնտաժման աշխատանքները ե՞րբ է մեկնարկելու և ի՞նչ միջոցներով։ Հիմա էս ցանցապատման աշխատանքները կկատարվեն, իսկ հետագայում մաքրման աշխատանքներ տեղի կունենան, ուղղակի ժամկետներ չեմ կարող հիմա նշել»,- նշում է Գյումրիի քաղաքապետարանի կոմունալ ծառայության պետի ԺՊ Արտավազդ Ոսկանյանը։

Տարածքը փլատակներից մաքրելու և բարեկարգելու համար միջոցներ են պետք, հնարավոր է հայտարարվի նաև շինմրցույթ։ Հին ստորգետնյա ավտոտնակներով բակեր քաղաքում էլի կան, կոմունալ ծառայությունը վտանգավոր տարածքներում խնդիրը լուծել է  հարթեցման ու վերականգնման տարբերակով։