Գյումրիում դեռ 2600 տնակ կա. բնակարանային կամ գումարային փոխհատուցման ենթակա է մոտ 1600-ը

Գյումրիում շուտով կսկսվի տնակների ապամոնտաժման գործընթաց, որը վերաբերելու է փակ դռներին, այսինքն՝ չբնակեցված տնակներին, բնակարանային փոխհատուցում ստացած և բնակարանները վաճառած ընտանիքներին, փոխհատուցված և տնակը չապամոնտաժելու պատճառով բնակարանը չսեփականաշնորհածներին։ Այս ամենն ամրագրված է կառավարության որոշմամբ, որը կայացվել է անցած տարվա հոկտեմբերին, և ըստ էության ներառում է տնակներում ապրող բոլոր կատեգորիաների ընտանիքներին։

Նորից տնակներում ապրողների ցանկ է ներկայացվել քաղաքաշինության կոմիտե և քննարկումների արդյունքում որոշվելու է փոխհատուցման ենթակա ընտանիքների թիվը, փոխհատուցման ձևը։ Իսկ մինչ այդ քաղաքապետարանը ծանուցագրեր է ուղարկում այն ընտանիքներին, որոնց տնակները ենթակա են ապամոնտաժման։

Գյումրիում դեռ 2600 տնակ կա, որոնց միայն մի մասն է բնակարանային կամ գումարային փոխհատուցման ենթակա։ Այս թվերը թարմացվել են այս տարվա փետրվարի 10-ին, երբ քաղաքապետարանը հերթական անգամ հաշվառեց տնակները և նոր ցանկ ներկայացրեց քաղաքաշինության կոմիտե։ Տնակներում ապրողներին հաշվառել են ըստ բնակարանային պատմության, թե ովքեր են տուն ստացել, բայց դեռ տնակում են, ովքեր վաճառել են բնակարանը, իսկ ովքեր ընդհանրապես բնակարանային աջակցության ծրագրերից մինչ օրս չեն օգտվել։

«Շուրջ 800 և ավելի տնակներ ենթակա են քանդման և իրենց փոխհատուցում ընդհանրապես նախատեսված չէ։ Մոտ 1500-1600 տնակներում ապրող ընտանիքներ փոխհատուցման ենթակա են։ Սրանք ոչ պաշտոնական, նախնական թվեր են, որոնք մենք լրացրել, ուղարկել ենք կառավարություն»,- SHANTNEWS-ին ասել է Գյումրիի քաղաքապետարանի համայնքային անշարժ գույքի կառավարման բաժնի պետի ժամանակավոր պաշտոնակատար Գևորգ Գրիգորյանը։

Կառավարության որոշմամբ առանձին մոտեցումներ են նախատեսված բոլոր խմբերի տնակների համար։ Ովքեր բնակարան են կորցրել ու տարբեր պատճառներով փոխհատուցում չեն ստացել, հիմա նախատեսված է ԲԳՎ հատկացնել։ Վկայագրերով կլուծվի նաև այն ընտանիքների բնակարանային հարցը, որոնք նախորդ տարիներին ԲԳՎ էին ստացել, բայց չէին կարողացել տուն գնել։ Իսկ այն ընտանիքները, որոնք երկրաշարժին տուն չեն կորցրել, բայց տնակում են ապրում, կարող են դառնալ սոցիալական բնակարանի շահառու։ Իսկ այն ընտանիքները, որոնք բնակարան ստացել են, վաճառել ու մնացել տնակում կօգտվեն բնակարանի վարձակալության աջակցությունից մեկ տարի ժամկետով։  Քաղաքապետարանի պատասխանատուն է նշում,որ մեկ տարի հետո կառավարությունը կդադարեցնի այս ընտանիքներին բնակարանի վարձակալության գումար վճարել, իսկ բնակարանային հարցի լուծումը մնում է միայն բնակչի խնդիրը։ Իսկ քաղաքապետարանը հետամուտ է լինելու միայն տնակների ապամոնտաժմանը։ Քաղաքում շուրջ 800 տնակ ենթակա է ապամոնտաժման։ Հիմա քաղաքապետարանը ծանուցագրեր է հանձնում ընտանիքներին։

«Մոտ 300 ծանուցագիր հանձնել ենք ու շարունակում ենք դրանք բաժանել։ Տնակները ինքնակամ ապամոնտաժելու  համար ժամկետ ունեն մինչև մայիսի 1-ը։ Մայիսի 1-ից հետո արդեն համայնքը լիարժեք կարող է սկսել ապամոնտաժումը»,- ասել է Գևորգ Գրիգորյանը։

Առաջնահերթ ապամոնտաժման ենթակա են փակ տնակները, որոնք վաղուց բնակեցված չեն, տերերը արտերկրում են, տնակն էլ համայնքապատկան հողամասն է զբաղեցնում։ Այս դեպքում էլ խնդիր է բնակչին ծանուցելը։

Մայիսի 1-ից արդեն քաղաքապետարանը սկսելու է այն տնակների ապամոնտաժումը, որոնց տերերը ինքնակամ չեն քանդի տնակը։ Այս ընթացքում սպասում են, որ կառավարության նոր որոշումներ կլինեն փոխհատուցման ենթակա ընտանիքների մասին։

Դեռ նորից առանձին-առանձին քննարկելու են յուրաքանչյուրի անօթևանության պատմությունը բնակարանային գործեր կազմելու համար։ Քաղաքապետարանի պատասխանատուն նշում է՝ անօթևան ընտանիքների կարգավիճակներում և փոխհատուցման տարբերակներում փոփոխությունները չեն բացառվում։