«Լավագույն ռեպորտաժ» և «Լավագույն ռադիոհաղորդում» անվանակարգերում հաղթող են ճանաչվել «Շանթ Գյումրի» ՀԸ-ն և «Ռադիո Շանթը»․ ամփոփվել են «Ես կարող եմ կոտրել կարծրատիպեր իմ համայնքում» ծրագրի արդյունքները 

Հաշմանդամություն ունեցող անձանց իրավունքների պաշտպանությանն ուղղված օրենսդրական փոփոխությունների արդյունքում տեսողական, լսողական, հենաշարժողական  և այլ առողջական խնդիրներ ունեցող անձանց իրավունքների պաշտպանությանն ավելի մեծ կարևորություն տրվեց, որը և նրանց հասարակություն ինտեգրումը հեշտացրեց։ Հասարակական կազմակերպություններից բացի, այս  խնդիրների մասին բարձրաձայնում  են զանգվածային լրատվամիջոցները:

«Ագաթ» հասարակական կազմակերպության նախաձեռնությամբ Շիրակի, Լոռու և Տավուշի լրագրողների և բլոգերների համար մեկ ամիս առաջ կազմակերպված  դասընթացները օգնեցին  հաշմանդամություն ունեցող անձանց հետ ճիշտ հաղորդակցության, հարցազրույցներ անցկացնելու և տեսանյութեր պատրաստելու ընդունված մոտեցումներն ու գենդերային խնդիրների առանձնահատկությունները հասկանալ:

«Պետք է գիտակցենք, որ հաշմանդամություն ունեցող յուրաքանչյուր անձ անհատականություն է՝ օժտված ուրույն տաղանդով և սուբյեկտիվ հետաքրքրությամբ։ Նրանց կողմից այնքան նոր լիցքեր են ներթափանցում դեպի մեր համայնքներ: Հաշմանդամություն ունեցող անձանց ներառումը տևական և մշտական պայքար է, որն իր մեջ կրում է բարության և ուշադրության համամարդկային արժեքները: Այս գործընթացում իրենց ուրույն տեղն ունեն զանգվածային լրատվամիջոցները, որոնց օգնությամբ հասարակությանը հայտնի են դառնում  հաշմանդամություն ունեցող կանանց և աղջիկների հաջողված պատմությունները, անհատներ, որոնք պայքարել են դժվարությունների դեմ և հասել մեծ հաջողությունների»,- իր ելույթում  նշել է ՀՀ-ում ԵՄ պատվիրակության  ղեկավար, դեսպան Անդրեա Վիկտորինը։

Դասընթացներին հաջորդեց  հաշմանդամություն ունեցող անձանց մասին հաջողված պատմությունների լուսաբանման մրցույթը։ Հեռուստատեսային, ռադիո ռեպորտաժներն ու հաղորդումները, ինչպես նաև առցանց մեդիայում հոդվածի ձևաչափով ներկայացված նյութերը «Ես կարող եմ կոտրել կարծրատիպեր» ծրագրի բովանդակության ու պահանջի շրջանակներում էին։

Հայտարարված մրցույթի արդյունքներով՝ «Լավագույն ռեպորտաժ» անվանակարգում հաղթող ճանաչվեց «Հորիզոն» լրատվականի լրագրող Ալեքսան Սարգսյանի ռեպորտաժը։ Այն  պատմում է դժվարությունները հաղթահարած և աշխատանքում հաջողություններ վաստակած  Քրիստինե Կիրակոսյանի մասին։ Նա ապրելով գյուղում, կարողացել է հաղթահարել միջավայրային  անհարմարությունները, և այժմ իր  աշխատանքով օգնում է հաշմանդամություն ունեցող  կանանց ու աղջիկներին:

Լավագույն անվանակարգում ևս մրցանակը «Շանթ»-ինն» էր ՝ այս մեկը  «Լավագույն ռադիոհաղորդման» համար։ «Ռադիո Շանթ»-ի երեկոյան ծրագրի եթերում հաղորդավար Էմմա Չոբանյանը զրուցել ու  ներկայացրել էր ևս մեկ  կնոջ հաջողված պատմություն՝ ծանրամարտիկ, պարափաուերլիֆթինգի Աշխարհի առաջնության չեմպիոն, գյումրեցի Գրետա Վարդանյանի մասին։ Գրետան քրտնաջան աշխատանքի, մարզումների շնորհիվ կարողացավ իրականություն դարձնել իր երազանքն ու դառնալ  աշխարհի լավագույն ծանրամարտիկներից մեկը:

Հատուկ և խրախուսական մրցանակներ ստացան նաև մրցույթի մասնակից այլ հեռուստաընկերությունների և կայքերի լրագրողները: Հաշմանդամություն ունեցող անձանց մասին հաջողված այս պատմութունները շատերի համար գուցե դառնան մոտիվացնող և օրինակելի,  որպեսզի առողջական տարբեր խնդիրներ ունեցող անձինք փորձեն հաղթահարել դժվարությունները և ունեցած  հնարավորությունները բացահայտեն իրենց նախընտրած ոլորտներում։