Հանրապետությունում արդեն համարակալվել ու հաշվառվել է 370 հազարից ավելի խոշոր եղջերավոր կենդանի

Հայաստանում համարակալվում և հաշվառվում են խոշոր եղջերավոր կենդանիները: էկոնոմիկայի նախարարության գյուղատնտեսական ծառայությունների կենտրոնի անասնաբույժներն ու համաճարակաբանները շրջում են գյուղերով, պիտակների միջոցով համարակալում են խոշոր եղջերավորներին: Շիրակի մարզում արդեն  հաշվառել ու համարակալել են 57 հազարից ավելի խոշոր եղջերավոր կենդանիների:

Խոշոր եղջերավորներին համարակալում են առաջին անգամ: Մասնագետներն ասում են, որ սրանով կենդանիների տեղաշարժի վերահսկումն են ապահովելու, ինչպես նաև  հնարավոր  վարակիչ հիվանդությունների դեմ կանխարգելիչ միջոցառումների արդյունավետությունն է բարձրանալու։

«Արդեն համարակալված ունենք, որոնք մուտքագրված են համակարգ, 370 հազար խոշոր եղջերավոր կենդանի, բայց փաստացի համարակալվածների թիվն ավելի շատ է։ Գործընթացը կարևոր է նրանով, որ հնարավորություն կստեղծվի, որպեսզի կենդանին իր կյանքի ժամանակահատվածում ունենա մեկ ինդենտիֆիկ համար և տարբեր համաճարակների ժամանակ հնարավոր կլինի կառավարել  այդ համավարակները։ Մյուս կողմից ավելի արդյունավետ կդառնան  այն հակահամաճարակային միջոցառումները, որոնք պետությունն իրականացնում է»,- նշում է ՀՀ էկոնոմիկայի նախարարի տեղակալ  Արման Խոջոյանը։

Իննանիշ թվով պիտակները ռադիոհաճախականությամբ են, յուրաքանչյուր մարզ ունի իր հատուկ կոդը: Շիրակի մարզի կենդանիները հաշվառվում են 105  համարի կոդով սկսվող պիտակներով: Կենդանիների բոլոր տվյալները նախ գրանցվում են հատուկ մատյանում, հետո վերահսկողության համար նույն տվյալները կմուտքագրվեն էլեկտրոնային համակարգ:

Խոշոր եղջերավոր կենդանիների համարակալումն ու հաշվառումը մասնագետներին  կօգնի պրոֆիլակտիկ որոշ միջոցառումների և պատվաստումների ժամանակ՝ օրինակ արյունառման դեպքում։ Վարակված կենդանուն շատ հաճախ անասնատերը հնարամտորեն կարողանում էր թաքցնել, որպեսզի հարկադիր մորթի չենթարկեր:

Իսկ ինչպես կարող է համայնքային անասնաբույժը վերահսկել համարակալված կենդանուն, երբ մինչև էլեկտրոնային բազա տվյալների մուտքագրումը կենդանին վաճառվում է: Առանց  համապատասխան ուղեկցող փաստաթղթի անասնատերը կենդանին վաճառելու իրավունք այսուհետ չի ունենա, վաճառելու դեպքում պատասխանատվություն կկրի գնորդը, իսկ առանց ականջապիտակի կենդանու վաճառքը կդիտարկվի ապօրինի և կարող են հայտնաբերման դեպքում առգրավել:

«Եթե անասնատերը ցանկանում է վաճառել այդ կենդանուն, ապա պարտադիր կենդանին ականջապիտակով պիտի լինի, որ խնդիրներ չունենան վաճառքի հետ կապված։ Առանց պիտակի կենդանին չի թույլատրվում վաճառել, դա կհամարվի ապօրինի գործողություն։ Սննդի անվտանգության տեսչական մարմինն այդ հարցով կզբաղվի, պարզելու համար կենդանին վաճառվել է պահելու նպատակով, թե տարվել է սպանդանոց ու մորթի է ենթարկվել»,- պարզաբանում է Ախուրյանի տարածաշրջանի համաճարակաբան Կարապետ Պապոյանը։

Խոշոր եղջերավորների հայտնաբերմանն ու տեղաշարժի հետագծին հետևել կօգնեն պիտակների վրա առկա QR կոդերը։ Այս կերպ հնարավոր կլինի նաև հեշտությամբ բացահայտել անասնագողությունը, իհարկե, պարեկների օգնությամբ: Համարակալումից հետո անասնատերերը կկարողանան նաև կենդանիները դարձնել  գրավի առարկա:

Եվ ի վերջո, համարակալումն ու հաշվառումը թույլ կտան ունենալ հանրապետությունում առկա գլխաքանակի մասին հստակ տվյալներ, ինչն էլ կօգնի տարեկան նախատեսված պլանային  պատվաստումների համար ճշգրիտ քանակով պատվաստանյութեր ձեռք բերելու հարցում: Հիմա համարակալմանը զուգահեռ  վակցինատորները կատարում են նաև դաբաղի դեմ պատվաստումներ: