Անի խոշորացված համայնքը 2023-ին սուբվենցիոն ծրագրեր չի ներկայացրել. որոշումներ կայացնելու համար չունեն ձևավորված ավագանի

Կառավարությունն ավելացրել է մարզերի սուբվենցիոն ծրագրերի ֆինանսավորումը, զուգահեռ համայնքների առաջնահերթ լուծում պահանջող ծրագրային փաթեթներն ավելի նպատակային են դառնում։ 2023 թվականի սուբվենցիոն փաթեթների ներկայացման ժամկետներն ավարտված են, այժմ ընթանում են ծրագրերի հաստատման, որոշների դեպքում՝ շինմրցույթների հայտարարման և ընտրության փուլերը: Այսինքն, նախապատրաստական գործընթացի շուտ անցկացումը երաշխիք է լինելու աշխատանքների շուտ մեկնարկի։ Շիրակի մարզի գրեթե բոլոր խոշորացված համայնքներում 2022-ից անավարտ շինծրագրեր կան, որոնք  կշարունակվեն նորերի մեկնարկին զուգահեռ։

Անցած տարի Ախուրյան խոշորացված համայնքը կառավարություն էր ներկայացրել 12 սուբվենցիոն փաթեթներ, որոնց շինարարական փուլը ուշացած է մեկնարկել ՝ նույնիսկ աշնան կեսին։ Արդյունքն էլ եղել է այն, որ 12 ծրագրերից  միայն մեկի՝ փողոցի հիմնանորոգումն են ավարտել, ևս մեկն էլ 2021-ից մնացած Արևիկ գյուղի փողոցի ասֆալտապատումը։

2022-ի անավարտ ծրագրերի հետ սպասում են, որ այս տարվա նորերը ևս կսկսեն։ Այս տարի կառավարություն են ներկայացրել 10 սուբվենցիոն ծրագիր՝ ընդհանուրը 1 միլիարդ 600 միլիոն դրամ արժեքով: Ծրագրերը հաստատված են, համայնքի ներդրումը  600 միլիոն դրամ է կազմում: Փորձել են պահպանել համամասնությունը բոլոր բնակավայրերի համար։ Փաթեթներում ներառված են նաև մեծ ու թանկ ծրագրեր:

«Մեծ ծրագիր ունենք Ախուրյանի Ղարիբջանյան բնակավայրում, որտեղ ոռոգման ցանց ենք կառուցելու․ 400 միլիոն դրամանոց ծրագիր է, նախատեսված է պատվարի կառուցում, ոռոգման ցանցի կառուցում և պոմպակայանի կառուցում։ Այս ծրագրի միջոցով կլուծվի Ղարիբջանյան գյուղի և հարակից բոլոր բնակավայրերի ոռոգման խնդիրը»,- նշում է Ախուրյանի համայնքապետարանի զարգացման ծրագրերի, տուրիզմի, առևտրի սպասարկման և գովազդի բաժնի պետ Գնել Մանուկյանը։

Թանկ  ծրագրերից է համարվում նաև Շիրակ, Ոսկեհասկ, Երազգավորս և Առափի գյուղերի գազաֆիկացումը։ Մոտ 500 միլիոն դրամ գնահատված սուբվենցիոն ծրագրով գյուղերում և՛ նոր գազատար խողովակներ կացկացվեն, և՛ ներքին ցանց կկառուցվի:

Մարզի 2023-ի սուբվենցիոն փաթեթը մեծացել է, ֆինանսավորման չափն ավելացել՝ կազմելով 10 միլիարդ դրամ։ Ստացված վերջնական հայտերով թանկարժեք են Գյումրիի քաղաքապետարանի ներկայացրածները: 9-ը ծրագիր է՝ ընդհանուր արժեքը մոտ 6 միլիարդ դրամ: Ախուրյանի, Արթիկի, Աշոցքի և Ամասիայի տարածաշրջանների սուբվենցիոն փաթեթների թիվն ու գումարի չափերը հայտնի են, միայն Անի խոշորացված համայնքն է, որ դեռ մնում է առանց սուբվենցիոն փաթեթների։ Պատճառը  համայնքային կառավարման ոչ լիարժեք համակարգումն է։

«Նման դեպքերում, երբ համայնքը չունի ավագանի, չի կարող կազմակերպել  ավագանու նիստեր և ընդունել որոշումներ, տվյալ դեպքում սուբվենցիոն հայտերն ամբողջական փաթեթներով կքննարկվեն  մայիսի 25-ին»,- պարզաբանում է Շիրակի մարզպետարանի զարգացման ծրագրերի, զբոսաշրջության և վերլուծության բաժնի պետ Կարեն Բադիշյանը։

Հիշեցնենք, մարտի 26-ին Անի խոշորացված համայնքում տեղի կունենան ավագանու նոր ընտրություններ, ըստ այդմ՝ ձևավորվելու է նոր ավագանի և ընտրվելու է  համայնքապետ, ինչը փաստացի ձախողվել է 2022-ի  նոյեմբերի 25-ին անցկացված ՏԻՄ ընտրությունների արդյունքներով։ Իսկ միակ սուբվենցիոն ծրագիրը Անի համայնքի համար 2022-ին հաստատել է նախորդ ավագանին։