Գյումրիի դպրոցներում ուսումնական երկրորդ կիսամյակը մեկնարկել է բացակայությունների մեծ թվով

Ձմեռային արձակուրդներից հետո սովորաբար հանրակրթական բոլոր դպրոցներում բացակայությունների մեծ թիվ է լինում։ Այս տարի աշակերտների հետտոնական տրամադրությանը գումարվել է նաև Հանրապետությունում շրջանառվող վիրուսը։

Դպրոցներում բացակայությունների թիվը մեծ է, միաժամանակ նշվում է, որ այն նորմայի սահմաններում է։ Առողջապահության նախարարության շրջաբերականով՝ բոլոր դպրոցներում աշակերտների մուտքը դպրոց սկսվում է ջերմաչափումով, այսինքն՝ սահմանվել է «համաճարակային ֆիլտր» և ոչ միայն դպրոցներում, նաև նախադպրոցական հաստատություններում՝ հիվանդ երեխաների մուտքը բացառելու համար։

Ջերմաչափումը կանխարգելիչ, բայց ոչ լիարժեք արդյունավետ միջոց է։ Հնարավոր է երեխան հիվանդ լինի, բայց չջերմի։ Դրա համար էլ հատուկ ուշադրություն են դարձնում այն դեպքերին, երբ աշակերտի ինքնազգացողությունը վատանում է դասերի ընթացքում։ Երկրորդ կիսամյակի առաջին երկու օրերի ընթացքում սովորաբար բացակաները շատ են լինում, ու դրանք տարբեր պատճառներով են։

«590 աշակերտ ունենք։ Այս թվի մեջ ներառված չեն առաջին և երկրորդ դասարանցիները։ Այսօր ունենք 70 բացակա։ Սա մեզ համար մեծ թիվ է, որովհետև մեր դպրոցում այսպիսի հաճախելիություն չի եղել։ Մեր աշակերտները միշտ պարտաճանաչ են հաճախել։ Մեծ մասն այս շրջանում բացակայում է քաղաքից։ Բացակայություններին նաև դրանք են գումարվում։ Բայց ունենք տեղեկություններ, որ բարձր ջերմող հիվանդ աշակերտներ ունենք, որոնք տանն են բուժում ստանում»,- SHANTNEWS-ին ասել է Գյումրիի «Օյունջյան» միջնակարգ դպրոց-վարժարանի տնօրեն Հասմիկ Անդրիասյանը։

Դպրոցներում ամեն օր դիտարկում են բացակայությունների թիվն՝ ըստ պատճառների, թե քանիսն են հիվանդ, քանիսը երկրում չեն կամ էլ այլ պատճառներով են բացակայում։ Բոլոր այս տվյալները լրացնում են հատուկ ձևաթղթի վրա ու ներկայացնում հիվանդությունների վերահսկման ու կանխարգելման կենտրոն։

Ձևանմուշում առանձին սյունակներում նաև դասասենյակների, միջանցքների ու սանհանգույցների ամենօրյա ջերմաչափումների տվյալներն են լրացվում։ Դասասենյակներում պետք է ապահովվի 19-20 աստիճան, իսկ միջանցքներում, սանհանգույցներում՝ 16-17 աստիճան ջերմություն։ Հաշվի առնելով վիրուսային հիվանդությունների թիվն ու դպրոցահասակ երեխաների շփման շրջանակը, դպրոցներում կարծում են, որ լավագույն կանխարգելումը արձակուրդների երկարացումը կլիներ։

«Կարելի էր գարնանային արձակուրդների հաշվին երկարացնել արձակուրդները, որ գոնե այս պիկը հանդարտվեր։ Որոշ ժամանակ կշահեինք, քանի որ երեխաները դպրոցից գնում են երաժշտական դպրոցներ, պարի, տարբեր խմբակներ, շփման շրջանակը շատ մեծ է »,- ասել է Հասմիկ Անդրիասյանը։

Այդուհանդերձ, հիմա հիմնական դպրոցներում աշակերտների թիվը քիչ է, շփման շրջանակն էլ փոքր-ինչ նեղ։ Առաջին և երկրորդ դասարանցիների արձակուրդները շարունակվում են մինչև հունվարի 22-ը ներառյալ։