Նրա տեսակը, ոճը շատ արդիական է. այսօր լրանում է Մանթաշյանցի ծննդյան 175-ամյակը

Այսօր լրանում է հայ գործարար և բարերար Ալեքսանդր Մանթաշյանցի ծննդյան 175-ամյակը: Ինչպես հայտնի է, դեռևս անցած տարի կառավարության որոշմամբ մարտի 3-ը նշվում է նաև որպես Գործարարի օր՝ ի հիշատակ Ալեքսանդր Մանթաշյանցի: Ամեն տարվա պես, այս տարի էլ մի շարք հայ գործարարներ ծաղիկներ են դրել Մանթաշյանցի արձանին, այնուհետև Երևանի Սուրբ Աննա եկեղեցում մատուցվել է պատարագ մեծ գործարարի ու բարերարի հիշատակին:

«21-րդ դարի տեխնոկրատ, վայրի կապիտալիզմ, ամեն ինչում տնտեսական շահութաբերությունն առաջնային համարելու մթնոլորտում ավելի քան այս տեսակը կարևոր է քան 19-20-րդ դարերում, որովհետև բևեռացումը հասարակության մեջ աշխարհով մեկ է տարածվում՝ գործազրկություն, ընչազրկություն և ամենակարևորը՝ ազգային ուծացման վտանգ հատկապես համայնքներում: Այնպես որ, նրա տեսակը, նրա ոճը շատ արդիական է այսօր: Թե՛ սովորել, թե՛ տարածել և թե՛ նմանվել»,- լրագրողների հետ զրույցում նշեց Հայաստանի արդյունաբերողների և գործարարների միության նախագահ Արսեն Ղազարյանը:

Նրա խոսքով՝ նման միջոցառումներով փորձում են հանրության ուշադրությունը հրավիրել Մանթաշյանցի կերպարի վրա՝ հայ գործարարի բարոյական կերպարի ձևավորման առումով: Արդյունաբերողների և գործարարների միության նախագահը կարծում է, որ այսօր, երբ հայ գործարարությունն ընդամենը 26-27 տարվա անկախ պետականության պատմություն ունի, առավել կարևոր է նման մեծերին՝ Արամյանցին, Մանթաշյանցին, Գյուլբենկյանին, Քըրք Քըրքորյանին հիշել և նրանց օրինակով շարժվել:  

«Կարևոր է, որ այսօր, երբ գործարարի տոնը նշելով մենք ոգեկոչում ենք Մանթաշյանին, ոգեկոչենք նրա ոճը՝ բարեգործ, համայնքի մասին մտածող, մշակույթը զարգացնող, իր տնտեսական ծրագրերն ուղղակի հայ համայնքի զարգացումների հետ կապող մարդու, սա է կարևորը: Մենք արդեն տասներորդ տարին է՝ նշում ենք, ոգեկոչում ենք եկեղեցում, դրանով ոգևորում մեզ և օրինակ դարձնում ինքներս մեզ համար, թե ինչպիսին պետք է լինի 21-րդ դարի գործարարը, ինչպիսին պետք է լինի, որովհետև ձգտում է, որ այդ խավը ձևավորվի այդ տեսակով: Այսօր շերտը շատ բարակ է, պայմանական ասած, Մանթաշյանի ժառանգների, նրա տիպի մարդկանց: Միշտ մենք պետք է փորձենք նմանվելով ավելի լավը լինել»,- նկատեց Արսեն Ղազարյանը: