Շուրջ 22,6 միլիոն եվրո վարկ. ԱԺ-ին է ներկայացվել կրթության բարելավման համար ՀԲ-ից վարկ վերցնելու մասին համաձայնագիրը վավերացնելու նախագիծը

Խորհրդարանը սկսել է լիագումար նիստերի աշխատանքը: Մինչ օրակարգային հարցերի քննարկմանն անցնելը, Դավիթ Առուշանյանը երդմամբ ստանձնել է պատգամավորի մանդատը: Հիշեցնենք՝ նա փոխարինելու է ԿԸՀ նախագահ ընտրված Վահագն Հովակիմյանին: Իսկ օրակարգային առաջին հարցով պատգամավորներին է ներկայացվել կրթության բարելավման համար Համաշխարհային բանկից շուրջ 22,6 միլիոն եվրո վարկ վերցնելու մասին համաձայնագիրը վավերացնելու նախագիծը:

«Առաջին գործողությամբ՝ 4 ավագ դպրոց կհիմնանորոգվի և կվերակառուցվի, կհամալրվի անհրաժեշտ գույքով։ Խոսքը Երևանի թիվ 139 ավագ դպրոցին,Աշտարակի, Արտաշատի և Վանաձորի ավագ դպրոցների մասին է։

Երկրորդ գործողությամբ՝ կարիքների գնահատման հիման վրա 200 հանրակրթական  կրթական հաստատություններում նոր լաբորատորիան կհիմնվեն։ Կառավարության ծրագրով՝ մինչև 2026 թվականը հանրապետության բոլոր 1400 դպրոցներում պետք է ստեղծել ժամանակակից բնագիտական և ինժեներական լաբորատորիաներ։ Նախորդ ծրագրով 107 դպրոցներում այդպիսի լաբորատորիներ ստեծվել են։

Երրորդ գործողությամբ պետք է ստեղծվի 80 նախակրթարան։ Նախատեսվում է նախակրթարանների տարածքի վերանորոգում, անհրաժեշտ գույքի և սարքավորումների ձեռքբերում, նախակրթարանում ընդգրկված դաստիարակի վերապատրաստում։ Նախակրթարանները հարմարեցվելու են ներառական կրթության պահանջներին։

Չորրորդ գործողությամբ՝ կնույնականացվեն և կփորձարկվեն տվյալների վիզուալիզացիայի գործիքները և առանձնահատկությունները։ Խոսքը կրթության կառավարման տեղեկատվական համակարգի արդյունավետության բարձրացման մասին է։

Հինգերորդ խումբ գործողությունները ուղղված են բարձրագույն կրթության համակարգին։ Նախատեսվում են, որ ԳՏՃՄ (STEM)  հինգ ծրագրեր կիրականցվեն, որը կնպաստի բուհերի կրթական գործունեության որակի և արդյունավետության բարձրացմանը, կառավարման համակարգի զարգացմանը, մասնագիտական կրթական ծրագրերի ու դասավանդման մեթոդների արդիականացմանը, կրթական գործընթացում գիտահետազոտական աշխատանքների ներդրմանը, ինչպես նաև աշխատաշուկայի հետ կապերի զարգացմանը»,- ներկայացրել է ՀՀ ԿԳՄՍ փոխնախարար Արթուր Մարտիրոսյանը։