Լիլիթ Մակունցն ամփոփել է շաբաթվա մարզային այցերի օրակարգը

«Մարզերի համաչափ զարգացման ու մշակութային կյանքի ապակենտրոնացման քաղաքականության տրամաբանությունից ելնելով` չափազանց կարևորում եմ մարզային այցերը, ակտիվ մասնակցությունը մարզերում տեղի ունեցող այս կամ այն միջոցառմանը»,- աշխատանքային թռուցկաժողովում ասաց մշակույթի նախարար Լիլիթ Մակունցը՝ ներկայացնելով անցած շաբաթվա մարզային այցերի հագեցած օրակարգը, այս մասին տեղեկացնում է ՀՀ Մշակույթի նախարարության լրատվական բաժինը:

Շաբաթվա մարզային «երթուղին» մշակույթի նախարարն սկսեց Գյումրիից.
Օգոսոտոսի 7-ին Շիրակի մարզի Երկրագիտական թանգարանում հրավիրված ասուլիսում նախարար Մակունցը, փոխնախարար Տիգրան Գալստյանը, ՀՀ տնտեսական զարգացման և ներդրումների նախարարության պետական գույքի կառավարման կոմիտեի նախագահ Նարեկ Բաբայանը և Շիրակի մարզի Երկրագիտական թանգարանի տնօրեն Արտաշես Բոյաջյանը հայտարարել էին Երկրագիտական թանգարանի վերանորոգման աշխատանքների համար անհրաժեշտ դրամահավաքի մասին:
Ինչպես հայտնի է, Գյումրու Ջիվանու փողոցի 74 հասցեում գտնվող Գալուստ Գյուլբենկյան հիվանդանոցի նախկին շենքը կառավարության որոշմամբ անհատույց, անժամկետ օգտագործման իրավունքով հատկացվել է Շիրակի մարզի Երկրագիտական թանգարանին: Շենքի վերանորոգման սկզբնական աշխատանքների համար անհրաժեշտ է մոտ 50 միլիոն դրամ:

«Ի թիվս մշակութային մի քանի կառույցների, Գյումրիում մենք այցելեցինք նաև վերանորոգման ընթացքի մեջ գտնվող Ամենափրկիչ եկեղեցի: Կարող եմ ասել, որ շինաշխատանքների հիմնական մասն իրականացվել է, պատրաստ չէ միայն եկեղեցու զանգակատունը: 2018-ի դեկտեմբերին նշվելու է երկրաշարժի 30-րդ տարելիցը, ամեն ինչ անելու ենք, որպեսզի մինչ այդ տեղի ունենա Ամենափրկիչ եկեղեցու բացումը մեր խնայողությունների հաշվին»,- ասաց մշակույթի նախարարը՝ հանձնարարելով եկեղեցու զանգակատանն առնչվող հարցերը կարգավորելու համար պայմանավորվածություն ձեռք բերել Մայր Աթոռի հետ, որովհետև զանգակատան վերականգնման համար Մշակույթի նախարարությունն այս պահին չի կարող բյուջե հատկացնել:

Լոռու մարզ կատարած աշխատանքային այցի ընթացքում մշակույթի նախարարը, փոխնախարարներն ու նախարարության մյուս ներկայացուցիչները այցելել են քաղաքային ու մարզային գրադարաններ, Հովհաննես Աբելյանի անվան թատրոն, պատմա-երկրագիտական թանգարան:

«Զրուցեցինք տեղի մտավորականների հետ՝ փորձելով հասկանալ, թե ինչով կարող ենք օգնել նրանց: Հետաքրքիր առաջարկություններ հնչեցին»,- ասաց նախարարը:

Շաբաթվա չորս մարզային այցերից մեկն էլ Գեղարքունիքում էր: Սևան քաղաքում նախարարը մասնակցել է երիտասարդների միջազգային օրվան նվիրված երաժշտական փառատոնին:

Երիտասարդների միջազգային օրվան նվիրված միջոցառումներին օգոսոտոսի 12-ին նախարար Մակունցն ու փոխնախարար Վահե Բուդումյանը մասնակցել են նաև Տավուշի մարզում. Իջևանում այցելել են նաև մարզային գրադարան, Երկրագիտական թանգարան, մշակութային այլ հաստատություններ: Այցի ընթացքում զրուցել են տեղի մտավորականների հետ, քննարկել մարզի մշակութային կյանքի ակտիվացմանն ուղղված հետագա ծրագրերը: Տավուշցիների բարձրաձայնած խնդիրներից նախարարն այսօր առանձնացրեց երաժշտական գործիքների խնդիրը։

«Տավուշի մարզի երաժշտական դպրոցում գործիքների խնդիր կա: Պետք է աջակցենք նրանց այդ հարցում, ուսումնասիրեք և ներկայացրեք, թե խնդրի լուծման ինչ հնարավորություններ ունենք»,- հանձնարարեց նախարարը։