«Հատուկ դասարան»-ը հատուկ նշանակություն ունեցավ իմ կարիերայում. Դալիթան՝ երկրորդ եթերաշրջանի ու երգարվեստում դադարի մասին

Դալիթան հեռուստադիտողներին ավելի շատ որպես երգչուհի էր հայտնի: Դա, սակայն, մինչև «Հատուկ դասարան»-ը: Արձագանքները թույլ են տալիս ենթադրելու, որ հաջողել է նաև այս ասպարեզում: Դալիթայի կյանքում հիմա ավելի շատ դերասանական արվեստն է գերակշռում: Հիմա արդեն բոլորը նրան որպես «Հատուկ դասարան»-ի Մերի են ճանաչում, ընդունում ու սիրում:

«Հատուկ դասարան»-ը հատուկ նշանակություն ունեցավ իմ կյանքում՝  SHANTNEWS.am-ի հետ զրույցում անկեղծանում է Դալիթան:

«Շատ ուրախ եմ, որ ընդգրկված եմ այս թիմում, իսկապես բոլորս դարձել ենք մի մեծ ընտանիք, երգարվեստը ժամանակավորապես դադարի փուլում է, հուսով եմ, որ ժամանակ կգտնեմ նաև երգարվեստում նորություններ ներկայացնելու համար»,-ասում է Դալիթան:

«Հատուկ դասարան»-ը հիմա խանգարե՞ց, թե՞ օգնեց Դալիթային՝ հարցնում ենք կես կատակ-կես լուրջ՝ պատասխանը, սակայն, ի սկզբանե կռահելով.

«Երբեք չեմ ասի, որ «Հատուկ դասարանը» խանգարեց, որովհետև այս հեռուստանովելը շատ հիանալի փուլ է իմ կարիերայում, որպես դերասանուհի այստեղ ամեն օր լիքը բաներ եմ սովորում բոլորից, իսկապես հիասքանչ փուլ է իմ կյանքում»,- պատասխանում է դերասանուհին:

«Հատուկ դասարան»-ի երկրորդ եթերաշրջանին հաշված օրեր են մնացել: Դալիթան էլ ամեն օր ծանրաբեռնված գրաֆիկով նկարահանումների հրապարակներում է: Հեռուստադիտողը վստահաբար կհիշի, որ նրա մարմնավորած Մերիի դեպքում էլ առաջին եթերաշրջանում չպարզված հարցեր մնացին: Այդ հարցերն իրենց պատասխանները կստանան երկրորդ եթերաշրջանում:

«Շատերը ծանոթ են մարմնավորածս կերպարի՝ Մերիի պատմությանն ու ապրումներին, երկրորդ եթերաշրջանում կլինեն նոր բացահայտումներ նրա պատմության մեջ, քանի որ առաջին եթերաշրջանում շատ հարցեր մնացին իր և իր ընտանիքի պատմության հետ կապված: Կերպարիս՝ Մերիին, կտեսնենք, թե ինչպես է հարմարվում իր այդ նոր իրականությանը, Մերին կբացահայտի իրեն նորովի, կճանաչի իր ընտանիքի պատմությունը, անցյալը, շատ չեմ ուզում փակագծեր բացել, բայց կլինեն շատ հետաքրքիր և նոր զարգացումներ»,- պատմում է Դալիթան՝ ընդգծելով, որ հեռուստադիտողին անակնակլներով լի երկրորդ եթերաշրջան է սպասվում:

«Հատուկ դասարան»-ը ի սկզբանե տարբերվեց այլ հեռուստանովելներից իր գաղափարով ու ասելիքով: Այս հեռուստասերիալը հստակ ունի դաստիարակչական բնույթ, այստեղ կերպարների միջոցով խնդիրներ են բարձրացվում ու նաև տրվում այդ խնդիրների լուծումները: Մերիի կերպարն էլ բացառություն չէ:

«Քանի որ իմ կերպարն ունի ընտանեկան խնդիրներ, մենք փորձում ենք ցույց տալ, որ պետք չէ խեղճանալ, պետք չէ դիմանալ այդ ամեն ինչին, քանի որ կերպարս հենց ինքն էլ հասնում է ինչ-որ մի փուլի, որ ստիպված փախուստի է դիմում առաջին եթերաշրջանում, այսինքն՝ պետք է հասկանալ, որ ընտանեկան հոգատարությունը, իհարկե, շատ ճիշտ է, բայց ամեն ինչ գեղեցիկ է իր չափի մեջ: Եվ, այո՛, բռնության դեպքում պետք է դիմել ցանկացած օգնության: Առաջին եթերաշրջանում մենք տեսանք դասղեկի, տնօրենի , ընկերների օգնությունը: Պետք է միշտ փորձել դուրս գալ նման իրավիճակից: Մեր պատմությունը ցույց է տալիս, որ կան խտրականություններ նաև դպրոցում, ինչը ընդունելի չէ: Մեր կերպարները փորձում են պայքարել նման անարդարության ու խտրականության դեմ, լինել պայքարող ու արդարի կողմնակից և կարևորը, որ մեր կերպարները համախմբված են այդ ամենի շուրջ»,-նշում է դերասանուհին:

Երգչուհու, դերասանուհու հետ զրուցում ենք դպրոցում, նկարահանումներին զուգահեռ, այդ իսկ պատճառով երկար զրուցել չենք հասցնում: Դալիթային Մերիի կերպարն է սպասում ու այն ասելիքը, որ պետք է տեղ հասցնի դերասանուհին արդեն երկրորդ եթերաշրջանում: Գնալուց առաջ, սակայն, Դալիթան խոստանում է.

«Ես վստահ եմ, որ մենք բոլորս մեր կերպարներով կկարողանանք արդարացնել երկրորդ եթերաշրջանում բոլորի սպասելիքները ու կրկին արժանանալ բոլորի սիրուն ու ջերմությանը»: