Գյումրիի հրաձգության մարզադպրոցում շենքային պայմանները չեն փոխվում, փոխարենը մեդալների քանակն է ավելանում․  աշխարհի առաջնության ոսկին նվաճել է մարզադպրոցի սանը 

Ֆրասիայի Շատորու քաղաքում կայացած գնդակային հրաձգության վազող թիրախ մրցաձևի Աշխարհի առաջնությունում Հայաստանի հավաքականը 4 մեդալ է նվաճել ՝ 6 հրաձիգներով։ Առաջնության միակ ոսկին Հայաստանի հավաքականում վաստակել է Գյումրիի հրաձգության մանկապատանեկան մարզադպրոցի հրաձիգ Գոռ Խաչատրյանը: Երիտասարդների մրցապայքարում Գոռը 386 միավորով դարձել է Աշխարհի չեմպիոն։ Իսկ Աշխարհի առաջնության կանանց մրցապայքարում գյումրեցի Արուսյակ Գրիգորյանը, հավաքելով 367 միավոր, դարձել է բրոնզե մեդալակիր։ Այս հաջողությունները մարզիկների համար առաջինը չեն, իսկ մեդալները հեշտ չեն նվաճում, երբ համեմատում են մարզադպրոցի շենքային վատ պայմանների հետ, որոնք հեռու են միջազգային չափորոշիչներից։

Գոռի մեդալների հավաքածուում ևս 4 ոսկի կա, որոնք նվաճել է Եվրոպայի առաջնություններում։ Աշխարհի առաջնությունում վաստակելով՝ 386 միավոր, կրկնել է աշխարհի երիտասարդների ռեկորդը։

Մարզադպրոցի լավ արդյունքն է նաև աշխարհի առաջնության մեծահասակների կանանց պայքարում Արուսյակ Գրիգորյանի արդյունքները կարող էին ավելի բարձր լինեին, եթե համապատասխան մարզահագուստն ունենար։ Իր ունեցածը ընդամենը կաշվե հագուստ է, որը հրաձիգին չի օգնում մարզական կեցվածքն ամուր պահելու համար։ Այս մարզաձևում, որոշակի արդյունքի հասնելը հենց մարզահագուստից է կախված։ Վաստակած մեդալը ոսկի չէ, բայց Հայաստանի հավաքականի համար ձեռքբերում է։ Արուսյակը նվաճել է բրոնզե մեդալ:

«Արդեն սովորել եմ իմ մարզահագուստին, բայց այն շատ թույլ է ու չի համապատասկանում միջազգային չափանիշներին։ Եթե ավելի լավը լիներ ինձ կօգներ միավորներս բարելավելու համար, հնարավոր է մի քանի միավոր ավելի շատ հավաքեի, ու ոչ թե 3-րդ, այլ 2-րդ կամ 1-ին տեղն ընկնեի»,- ասում է Աշխարհի առաջնության բրոնզե մեդալակիր Արուսյակ Գրիգորյանը։

Նախկինում Գոռ Խաչատրյանն էլ հագուստի խնդիր ուներ, հրաձգության Եվրոպայի չեմպիոնի կոչմանն արժանանալուց հետո ունեցավ համապատասխան մարզական հագուստ։ Մեկ այսպիսի մարզահագուստը բավականին թանկ արժե, ձեռք բերելը մարզադպրոցի ուժերից վեր է, այս մեկը տրամադրել է Հայաստանի հրաձգության ֆեդերացիան։ Աշխարհի առաջնությունում գյումրեցի հրաձիգների հաղթանակը առիթ է եղել, որ համայնքային բյուջեից գումար նախատեսեն ընդամենը մեկ մարզահագուստ պատվիրելու համար։

«Մարզահագուստը բավականին թանկ հաճույք է, 800 եվրո արժե, բայց ինձ թվոււմ է, որ աշխարհի բրոնզե մեդալը շատ ավելին արժե, քան դա, երբ Հայաստանի դրոշն է բարձրանում, երբ որ Հայաստանի հիմնն է երգում ու բոլորը ոտքի են կանգնում»,- նշում է Գյումրիի հրաձգության մանկապատանեկան մարզադպրոցի մարզիչ Էդվարդ Ղարիբյանը։

Միջազգային տարբեր կարգի առաջնություններից ամեն անգամ վերադառնալիս տեղի մարզիկները ներկայացնում են անհամեմատելի այն պայմանները, որոնք  ունեն այլ երկրների հրաձիգները։ Գյումրիի մարզադպրոցն ապահովված չէ մարզական զենքով, բարձրակարգ մարզիկներին զենք է տրամադրում ֆեդերացիան։ Հին ու մաշված մարզահագուստից բացի, հրաձիգները միջազգային մրցումների են գնում հարմարեցված զենքերով։

Մարզադպրոցում դեռ կիրառում են թղթե թիրախներ։ Գյումրեցի հրաձիգների համար դժվար է թղթե թիրախի վրա պարապելուց հետո միջազգային առաջնություններում մրցել համակարգչային թիրախներով:

Հրաձիգների մեդալներն ավելանում են, բայց շենքային ու մարզական հնարավորությունները չեն փոխվում։ Հաջողություններ գրանցելուց հետո, ամեն անգամ մարզաձևի նկատմամբ հետաքրքրությունն է մեծանում։ Հիմա 20 սան ունեն, բայց պայմանների պատճառով, ստիպված պարապում են հերթով: Տարածքում նորոգումներ անել մարզադպրոցը չի կարող, շենքն իրենցը չէ, սեփականատեր ունի։ Սպասում են, որ նոր պայմաններով հրաձգարան կունենան, երբ ավարտվի Արթուր Ալեքսանյանի անվան մարզադպրոցի կառուցումը։

«Մեզ արդեն տեղեկացրել են, որ Արթուր Ալեքսանյանի անվան մարզահամալիրի առաջին հարկում հրաձգարանի համար տեղ են հատկացնելու, որտեղ պարապմունքներն անցկացնելու համար շատ լավ պայմաններ կլինեն։ Բայց թե դա մինչև 2024 թվականը հազիվ լինի։ Կահավորման հարցեր են լուծվելու, շատ խնդիրներ կան»,- ասում է  Գյումրիի հրաձգության մանկապատանեկան մարզադպրոցի տնօրեն Համլետ Մկրտչյանը։

Գյումրեցի հրաձիգները առաջիկայում Հայաստանի առաջնություններին են մասնակցելու, մարզիկների առաջնային նպատակն է, սակայն, հաջորդ տարի կայանալիք Եվրոպայի առաջնությունում հերթական ոսկիները նվաճել։ Նախապատրաստական պարապմունքներն արդեն սկսել են։