Կառավարությունը կրկին կմերժի «Ելքի»` «ավելորդ բյուրոկրատիայից» հրաժավելու նախագիծը

SHANTNEWS.am-ը պաշտոնական փաստաթղթերից տեղեկացավ, որ կառավարությունը որոշում է կայացնելու մերժել ԱԺ «Ելք»  խմբակցության պատգամավորներ Էդմոն Մարուքյանի, Գևորգ Գորգիսյանի և Մանե Թանդիլյանի կողմից օրենսդրական նախաձեռնության կարգով ներկայացված «Թվային տեխնոլոգիաների զարգացման մասին» ՀՀ օրենքում փոփոխություններ և լրացումներ կատարելու մասին» օրենքի նախագիծը:

Դրա հիմնավորման մեջ նշված է, որ կրիպտոարժույթի մայնինգի վերաբերյալ օրենսդրության ընդունումը պայմանավորված է ժամանակակից աշխարհում տեղի ունեցող զարգացումներին համընթաց քայլելու անհրաժեշությամբ։ Այդուհանդերձ, «Ելքն» առաջարկում է ազատականացնել կրիպտոառևտրի ոլորտը, հրաժարվել «ավելորդ բյուրոկրատիայից» և լիցենզավորման պարտադիր պահանջից: Նախագծի հիմնավորման մեջ բերվում է Գերմանիայի և Էստոնիայի օրինակները: Նշվում է, որ Գերմանիայում լիցենզիա չի պահանջվում, ընդ որում՝ այնտեղ թվային ակտիվներն օրինական են ու կարգավորվում են արտարժույթի իրավական ռեժիմով, իսկ ոլորտի այլ առաջատար երկրներում, օրինակ՝ Էստոնիայում այս լիցենզիան պարզագույն եղանակով տրվող փաստաթուղթ է: Մյուս կողմից՝ նախագծով առաջարկվում է այդ գործունեությունը մինչև 2023 թվականն ազատել հարկերից.

«Հետևաբար մայնինգով զբաղվող անհատների կամ ընկերությունների էլեկտրոնային հաշվառումը բացառապես վիճակագրական տվյալներ հավաքագրելու նպատակ է հետապնդում»,- ասված է փաստաթղթում։  

«Ելքը» կարծում է, որ նախագիծն այս տեսքով ընդունման արդյունքում՝ բոլորը հավասարապես հնարավորություն կստանան զբաղվելու մայնինգով և դրա միջոցով վաստակելու գումար, կբարձրանա ինքնազբաղվածության մակարդակը, կներգրավվեն լրացուցիչ ներդրումներ (այդ թվում՝ օտարերկրյա) բարձր տեխնոլոգիաների ոլորտում, հատկապես ի հաշիվ նրա, որ մեր երկրում ոլորտը հնարավորինս լիբերալ օրենսդրությամբ կկարգավորվի, ինչը նաև համահունչ կլինի բարձր տեխնոլոգիաների ժամանակաշրջանում տեղի ունեցող փոփոխություններին։

Բայց, ինչպես արդեն նշեցինք, գործադիրը որոշել է բացասական եզրակացություն տալ նախագծին:  Նշվում է, որ նոր կամ գործող կրիպտոարժույթների թողարկման և վաճառքի գործընթացների կար­գա­­վորումը նպատակահարմար չեն համարում՝ ելնելով ոլորտին բնորոշ մի շարք ռիսկերի առ­կայությունից՝ փողերի լվացման և ահաբեկչության ֆինանսավորում, զեղծարարությունների մեծ ծավալ, հակերային հարձակումներ, սպառողների շահերի ոտնահարում, կրիպտոարժույթ­նե­րի գնի բարձր տատանողականություն և այլն:

Գործադիրի պնդմամբ՝ դրա ընդունման դեպքում հնարավոր է՝ բախվենք ոչ միայն ֆինանսական համակարգը ռիս­կային դաշտ տեղափոխելու և ֆինանսական կայունությունը խարխլելու, այլև երկրի մա­կար­­դակով համակարգային ռիսկերի, ներառյալ հեղինակության ռիսկի առաջացնելու վտան­գին:

Նկատենք, որ մեկ անգամ չէ, որ «Ելքը» հայտնել է, թե նախաձեռնության համար հիմք են հանդիսացել նաև Հայաստանում այս ոլորտը մոնոպոլիզացնելու մասին առկա կասկածները։

Հիշեցնենք, որ SHANTNEWS-ն այսօր արդեն գրել է, որ Բելառուսի նախագահ Ալեքսանդր Լուկաշենկոյի՝ «թվային տնտեսության զարգացման մասին» հրամանագիրը ստորագրելուց հետո այդ երկրում «մայնինգ-բում» պայթեց: