Շիրակի երկրագիտական թանգարանն արդեն նոր շենք ունի

Շիրակի երկրագիտական թանգարանն արդեն նոր հասցե ունի՝ Ջիվանու 74 : Գյումրու Գյուլբենկյանի անվան նախկին վիրաբուժական հիվանդանոցն այսուհետ վերածվում է երկրագիտական թանգարանի։ Այսօր՝ օգոստոսի 7-ին, ՀՀ մշակույթի նախարար Լիլիթ Մակունցը և ՀՀ տնտեսական զարգացման և ներդրումների նախարարության պետական գույքի կառավարման կոմիտեի նախագահ Նարեկ Բաբայանը շենքի տնօրինումը պաշտոնապես հանձնել են Շիրակի երկրագիտական թանգարանին։ Նարեկ Բաբայանի խոսքով՝ պետական գույքի նկատմամբ նախկինում հետաքրքրություններ են ունեցել տեղական իշխանությունները:

«Թե ով ինչ շահ ու պլան է ունեցել՝ ես չեմ կարող ասել, բայց հիմա ոչ միայն իրավիճակ է փոխվել, այլև մտածողություն, և մենք պետական գույքը փորձում ենք տնօրինել ու օգտագործել ի շահ ժողովրդի։ Շենքն անհատույց օգտագործման է տրվում երկրագիտական թանգարանին՝ մնալով պետական գույքի կառավարման կոմիտեի հաշվեկշռում»,- ասել է Նարեկ Բաբայանը։

ՀՀ մշակույթի նախարար Լիլիթ Մակունցն էլ նշել է, որ քննարկվում է եռահարկ շենքում նաև պատկերասրահ ունենալու հարցը: Նախարարի կարծիքով՝ շենքն այդ հնարավորություններն ունի, քանի որ բավական մեծ է։

«Կարծում եմ՝ բանակցությունների արդյունքում մեզ կհաջողվի համաձայնության գալ և այն ծառայեցնել նաև որպես պատկերասրահ, քանի որ Գյումրին չունի պատկերասրահ, կարծում եմ՝ այն կտավները, այն նմուշները, որոնք այսօր ֆոնդերում են, արժե ցուցադրել»,- ասել է նախարարը։

Շիրակի երկրագիտական թանգարանի տնօրեն Արտաշես Բոյաջյանը նախարարի՝ շենքում պատկերասրահ ունենալու մասին առաջարկն ընդունել է ու նշել, որ ցանկանում է Մինաս Ավետիսյանի որմնանկարները ևս տեղափոխել նոր շենք, և ոչ միայն որմնանկարները, այլև այն կտավներն ու նկարները, որոնք 88-ի աղետից հետո տեղափոխվել են Երևան:

«Թանգարանը նաև գիտահետազոտական կենտրոն է լինելու, այսինքն՝ նյութերը միայն ցուցադրելու համար չեն, նաև գիտահետազոտական աշխատանքներով ենք այստեղ զբաղվելու։ Բացի դրանից, պատկերասրահի հետ կապված՝ ուզում եմ ասել, որ երկրաշարժից հետո պատկերասրահի նկարների մեծ մասը տեղափոխվել է Երևան, նաև պետք է էդ հարցը բարձրացնենք, որ էդ նկարները նորից հետ դառնան Գյումրի, որտեղից որ գնացել են՝ էդտեղ էլ վերադառնան»,-ասել է Արտաշես Բոյաջյանը։

Մնում է որոշեն՝ երեք հարկանի շենքի որ հարկում և ինչպես են պատկերասրահ բացում։ Հիմա քննարկվում է մեկ կարևոր հարց ևս՝ շենքի պահպանման ու վերանորգման խնդիրը։ Նշենք, որ արդեն 6 տարի է՝ ինչ այս շենքը դադարել է բուն նշանակությամբ ծառայել։ Դատարկ ու փոշու մեջ կորած շենքը հիմա վերանորգման և արդեն որպես թանգարան ծառայելու համար անհրաժեշտ միջոցների կարիք ունի։ Նախարարությունը վերանորոգման համար ֆինանսավորում տրամադրել չի կարող բյուջեի սուղ լինելու պատճառով, և դրա համար նախարարը հայտնել է, որ կհայտարարվի դրամահավաք։ Առաջին հասույթի փոխանցողն էլ արդեն հայտնի է՝ աշխարհահռչակ դաշնակահար Տիգրան Համասյանն է։

«Թանգարանի գործունեությունը լիարժեք ապահովելու համար հասկանում ենք, որ անհրաժեշտ են նաև շենքային պայմաններ, և այդ առումով, չնայած նախարարությունն այս պահին չունի միջոցներ՝ տրամադրելու վերանորգման հետ կապված, մենք հայտարարում ենք սեպտեմբեր ամսին դրամահավաքի մեկնարկ, որով առաջին մասի համար անհարաժեշտ է լինելու 50 մլն դրամ նախնական հաշվարկով գումար, և այն կփոխանցվի ՊՈԱԿ-ի հաշվեհամարին։ Ասեմ, որ արդեն առաջարկ ենք ստացել Տիգրան Համասյանից։ Նա առաջարկել է իր առաջիկա համերգի հասույթը տրամադրել թանգարանի վերանորոգմանը։ Կոչ կանենք նաև մեր հայրենակիցներին՝ թե՛ հայրենիքում, թե՛ դրսում ապրող, միանալ դրամահավաքին և մասնակցել վերանորոգման աշխատանքներին»,- ասել է Լիլիթ Մակունցը։

Հիշեցնենք, որ հուլիսի 9-ին Գյումրի կատարած աշխատանքային այցի ընթացքում մշակույթի նախարար Լիլիթ Մակունցն ասել էր, որ շուտով թանգարանը շենք կունենա, և, ամենայն հավանականությամբ, դա կլինի Գյուլբենկյանի անվան հիվանդանոցի նախկին շենքը:

Այն թանգարանին հատկացնելու՝ Գյումրու ավագանու առաջարկը 2013-ին կառավարությունը մերժել էր ու նշել, որ քաղաքի պատմական միջուկում գտնվող շենքը երկրագիտական թանգարանին հատկացնելն աննպատակահարմար է: Գյումրու քաղաքապետ Սամվել Բալասանյանը ևս դեմ էր շենքը երկրագիտական թանգարանին հանձնելու որոշմանը։ Վերջինս կարծիք էր հայտնել ու ասել, որ շենքը մեծ է թանգարանի համար, ու առաջարկել էր Գյումրու ծայրամասային թաղամասերից մեկում գտնվող վիճակագրական վարչության շենքը։

Շիրակի երկրագիտական թանգարանը 31 տարի է՝ գործում է վթարային շենքում և զուրկ է մոտ 25 հազար նմուշը ցուցադրելու հնարավորությունից: