«Անի» թաղամասում ջրամատակարարման ցանցի նորացման ծրագիրն ավարտվում է․ փողոցների հիմնանորոգումը մնում է հաջորդ տարվա

Ջրամատակարարման և ջրահեռացման ցանցի նորացման ծրագիրը «Անի» թաղամասում ջրաշինարարն ավարտում է, թեև ժամկետների խախտումներով։ Ոչ միայն «Անի» թաղամասի, նաև Շիրակացի փողոցում իրականացվող աշխատանքները գերմանական KFW բանկի ջրամատակարարման և ջրահեռացման ցանցի նորացման ծրագրի երրորդ փուլն են կազմում։ Այս ծրագրի ավարտն «Անի» թաղամասում, ամեն դեպքում, փողոցների հիմնանորոգման լայնածավալ աշխատանքների մեկնարկ չի երաշխավորում։ Խոսքը ՎԶԵԲ-ի փողոցաշինական ծրագրի մասին է։ Այս տարվա ընթացքում, միայն 3-րդ և 11-րդ փողոցները կնորոգվեն, բայց սուբվենցիոն ծրագրի շրջանակներում։ Նշված փողոցներում դեռ աշխատանքները չսկսած հանդիպել են ջրաշինարարի թույլ տված թերացումների։

11 փողոցի սկզբնամասում նորից փորման աշխատանքներ են ու նորից ջրաշինարարի գործ է բացվել։ Նոր անցկացրած ջրագծերով «Դորոժնիկ» ընկերությունը փողոցն արդեն հանձնել էր ճանապարհաշինարարներին, բայց, գործը դեռ չսկսած, պարզել էին, որ փողոցում մեկ դիտահոր պակաս է կառուցվել, որը նախագծով եղել է։ Սա, ըստ ջրաշինարարի , թերացում կամ խախտում չի համարվում։

«Դա թերություն չէ, դիտահորը տեղադրված չէր, թեև նախատեսված էր, որովհետև դեռ այդ տարածք չէինք հասել, բայց մենք արդեն դա տեղադրել ենք ու հանձնել շինարարին»,- նշում է Գյումրիի ենթակառուցվածքների վերականգնման ծրագրի ղեկավար Սուրեն Մամաջանյանը։

Թաղամասի տասնյակ նրբանցքների ու ճանապարհահատվածների հիմնանորոգման մեծ ծրագրից ընդամենը երկու փողոցում է, որ աշխատանքները սկսվել են, երկուսն էլ ընդգրկված են սուբվենցիոն ծրագրում։ Միայն 3-րդ և 11-րդ փողոցների բնակիչները, փաստորեն, մի քանի ամսից կհայտնվեն շահեկան վիճակում, եթե երկու փողոցների հիմնանորոգման աշխատանքները ժամանակին ավարտվեն։ Հիմա Անի թաղամասի բոլոր փողոցներում վիճակն անտանելի է, շոգին դիմանալու չէ փոշուն, անձրևներին էլ՝ ցեխին։

Հիմնանորոգման ենթակա 3-րդը և 11-րդը զուգահեռ փողոցներ են, որոնց երկարությունը չի գերազանցում 1 կմ-ը։ Ամբողջությամբ նորացված են ջրագծերը, բայց կոյուղատար ցանցում ոչինչ չի փոխվել։ Ծրագրով  թաղամասի կոյուղատար համակարգի ամբողջական նորացում նախատեսված չի եղել, բայց եթե որոշակի հատվածներում եղել են վթարներ, խցանումներ կամ մաշված կոյուղագծեր, ջրաշինարարն այդ տեղամասերում աշխատանք կատարել է:

«Հիմա մեր ամենաբարդ աշխատանքները տեղի են ունենում 7-րդ փողոցում, որտեղ ունենք 5,5 մետր խորության կոյուղագիծ, արդեն մեկ շաբաթ է սկսել ենք, թեև տեղանքում աշխատելը բարդ է, բայց դրանք ընթանում են առանց խնդիրների»,- ասում է Գյումրիի ենթակառուցվածքների վերականգնման ծրագրի ղեկավար Սուրեն Մամաջանյանը։

Այժմ, նույն KFW ծրագրով ջրաշինարարն աշխատում է Շիրակացի փողոցում, որտեղ ամբողջությամբ նաև կոյուղատար ցանցն է փոխվել, հիմա հերթը հասել է ջրամատակարարման համակարգի նորացմանը։ Աշխատանքների ընթացքում Շիրակացի փողոցում երթևեկությունը չեն դադարեցնում։

Անի թաղամասում ընդհանուր առմամբ փոխվել է մոտ 20 կմ երկարության ջրագիծ, 5 կմ երկարությամբ էլ ներքին ցանցի միացումներ են արվել։ Նոր խողովակներն անցկացվել են հին ցանցին զուգահեռ, բայց նոր փորված խրամուղիներով։ Այս պահին բնակչի ջրամատակարարումը դեռ հին ցանցով է։ Ըստ շինարարի, մեկ ամսից «Անի» թաղամասը խմելու ջուր կստանա նոր խողովակաշարով։