Պայմանագրով Թեղուտում վաղուց պետք է աշխատանքները դադարեցված լինեին. Արթուր Գրիգորյան

«Իրազեկ քաղաքացիների միավորում» ՀԿ ներկայացուցիչ Արթուր Գրիգորյանն այսօր լրագրողների հետ հանդիպման էր եկել Թեղուտի հանքավայրի վերաբերող մի շարք փաստաթղթերով: Ըստ Գրիգորյանի՝ բնապահպանության նախարարության կողմից ստորագրված պայմանագիրն ասում է, որ Թեղուտում արդյունահանում չպետք է իրականացվեր դեռևս 2016 թվականից: 

«Պայմանագրում նշված է, որ թույլտվությունը տրամադրված է առաջին հերթի շահագործման համար, իսկ առաջին հերթը սկսվում է 2007 թվականի հոկտեմբերի 8-ից և տրամադրված է  8,3 տարով: Այսինքն՝ 2016 թվականի հունվարին այս պայմանագրի ժամկետն ավարտվել է, ավելին, ասվում է, որ մնացած պաշարների շահագործումը կարող է իրականացվել միայն սույն պայմանագրի 3.4.27 կետով սահմանված պայմանների կատարումից հետո: Իսկ  3.4.27  կետում նշվում է, որ պետք է նախքան հանքավայրի շահագործման առաջին փուլի՝ 8,3 տարվա  ժամկետի ավարտը, մշակել և օրենսդրությամբ սահմանված կարգով փորձաքննության ներկայացնել հանքավայրի շահագործման հաջորդ փուլի աշխատանքային նախագիծը: Դա և փորձաքննությունների դրական եզրակացությունները չստանալու դեպքում այդ ժամկետի ավարտին դադարում է սույն պայմանագրի գործողությունը»,- ասել է Գրիգորյանը՝ հավելելով, որ եթե 2007-ի հոկտեմբերին 8-ին գումարում ենք 8.3 տարի, ստանում ենք 2016 թվականի հունվարի 8, այսինքն՝ դեռևս 2016 թվականի հունվարի 8-ից այդ պայմանագրի գործողությունը դադարել է, իսկ ընկերությունը արդյունահանել է առանց թույլտվության:

Գրիգորյանը նաև հիշեցրել է, որ վերջերս բնապահպանության նախարարությունը վերադարձրել է հանքի ընդլայնման նախագիծը: Ստացվում է` եթե անգամ համարենք, որ այն, թեկուզ ուշացումով, ներկայացվել է,  ապա չի հաստատվել:

 «Իրազեկ քաղաքացիների միավորում» ՀԿ ներկայացուցիչը խնդիր է տեսնում նաև Թեղուտի հանքի շահագործման առաջին փուլի համար տրված փորձագիտական եզրակացության մեջ:

«Նշված է պոչամբարի ծավալը` 174 մլն խմ, տարեկան արտադրողականությունը պետք է կազմեր 7մլն խմ, մինչդեռ ընկերությունը 8 մլն է արդյունահանել: Այնուամենայնիվ, ընկերությանն այս փորձաքննությունը տրվել է պայմաններով և միայն այդ պայմանների ապահովման դեպքում է փորձաքննությունն ուժի մեջ: Պայմաններն էին՝ շրջակա միջավայրի փորձաքննություն, հանքարդյունահանման ծրագիր, Թեղուտ գյուղի տարածքում հանգստյան գոտու նախագծային փաստաթղթերը, պոչամբարների կոնսերվացիայի փաստաթղթերը ներկայացնելը: Այնինչ բնապահպանության նախարարությունը դեռ 2014 թվականին տրամադրած փաստաթղթում ասում է, որ  մինչ այսօր ներկայացված չեն հանքավայրի շահագործման, ինչպես նաև պոչամբարների կոնսերվացման փաստաթղթերը: Այսինքն՝ 2006 թվականին տրամադրված պայմանները չեն իրագործվել: Եթե դրանք չեն ներկայացվել, փաստաթղթի ժամկետներն էլ ավարտվել են 2016-ին, այդ դեպքում ո՞ւր են նայել պետական մարմինները: Ի՞նչ իրավունք ունեք շահագործելու, եթե չունեք թույլտվություն»,- հավելել է Գրիգորյանը:

 Ինչ վերաբերում է պոչամբարին, ապա այն, եթե հիմա խնդիր ունի, բանախոսի համոզմամբ, կոռուպցիայի մասին է վկայում:

«Մոտավորապես 25 մլն տոննա հանքաքար է արդյունահանվել: Պոչամբարը, ըստ նախագծի և բնապահպանության նախարարության կողմից հաստատված փորձաքննության, 174 մլն խմ ծավալ ունի, այսինքն՝ այն ծավալը, որն արտահանվել է, ըստ պաշտոնական տվյալների,  որևէ կերպ չէր կարող անգամ ազդեցություն ունենալ պոչամբարի վրա, ուր մնաց, թե մինչև եզրը լցվեր:  Կա՛մ պոչամբարի ծավալներն իրականում շատ փոքր են, և իրենք լցրել են ինչ-որ մի այլ հատված, որը պոչամբարը չէ, կա՛մ արդյունահանման ծավալներն ավելի շատ են եղել, քան հրապարակված թվերը: Ինչ-որ բան ճիշտ չէ»,-  ասել է Արթուր Գրիգորյանը: