Խորհրդարանը քննարկել է Վճռաբեկ դատարանի վարչական պալատի դատավորի թափուր տեղի համար առաջադրված թեկնածուի ընտրության հարցը

Ազգային ժողովը հունիսի 27-ին պատգամավորների նախաձեռնությամբ արտահերթ նստաշրջան է գումարել:

Խորհրդարանը քննարկել է Վճռաբեկ դատարանի վարչական պալատի դատավորի թափուր տեղի համար առաջադրված թեկնածուի ընտրության հարցը: Այդ պաշտոնում ընտրվելու համար Բարձրագույն դատարանի խորհուրդն առաջադրել է Հրաչ Այվազյանի, Արտակ Զեյնալյանի և Լիանա Հակոբյանի թեկնածությունները: Ներկայացված երեք թեկնածուներից Ազգային ժողովը պետք է ընտրի Վճռաբեկ դատարանի վարչական պալատի դատավորի թեկնածու:

Ելույթ ունենալով՝ ԲԴԽ անդամ Դավիթ Խաչատուրյանը պարզաբանել է, որ դատական ոլորտում նախորդ տարի իրականացված բարեփոխումների շրջանակում ավելացվել է Վճռաբեկ դատարանի պալատների թիվը, ուստի այդ պալատների թափուր պաշտոններում դատավորներ նշանակելու անհրաժեշտություն է առաջացել: Զեկուցողի խոսքերով՝ ՀՀ դատական օրենսգրքում արված այս փոփոխությունն ազդելու է մարդու իրավունքների պաշտպանվածության ավելացման վրա, քանի որ այն միտված է խթանելու դատարանների աշխատանքի արդյունավետության բարձրացմանը և նպաստելու է գործերը ողջամիտ ժամկետում քննելուն:

Վճռաբեկ դատարանի վարչական պալատի դատավորի թեկնածու Հրաչ Այվազյանին ներկայացրել է Բարձրագույն դատական խորհրդի անդամ Դավիթ Խաչատուրյանը:

Վճռաբեկ դատարանի վարչական պալատի դատավորի թեկնածու Հրաչ Մարտունի Այվազյանի կենսագրությունը՝ այստեղ:

Ելույթ ունենալով՝ Հրաչ Այվազյանն անդրադարձել է Վճռաբեկ դատարանի դերին ու նշանակությանն արդարադատության համակարգում, նշել առկա խնդիրները: Մասնավորապես, այդ խնդիրներից են դատարանների անհամաչափ ծանրաբեռնվածությունն ու բողոքները քննելու անորոշ ժամկետները: Ըստ նրա՝   թեև դատարանները պատշաճ արդարադատություն են իրականացնում, այնուամենայնիվ, հանրության գնահատականներն իրականացված արդարադատության և դատական իշխանության նկատմամբ երբեմն անբավարար են լինում:

Վճռաբեկ դատարանի վարչական պալատի դատավորի թեկնածու Արտակ Զեյնալյանին ներկայացրել է Բարձրագույն դատական խորհրդի անդամ Դավիթ Խաչատուրյանը:

Վճռաբեկ դատարանի վարչական պալատի դատավորի թեկնածու Արտակ Հայկազի Զեյնալյանի կենսագրությունը՝ այստեղ:

Վճռաբեկ դատարանի վարչական պալատի դատավորի թեկնածու Արտակ Զեյնալյանը նշել է, որ հեղինակել է հարյուրավոր բողոքներ, հայցեր, դիմումներ, որոնք հիմք են հանդիսացել իրավակիրառական պրակտիկայի բարելավմանը: Թեկնածուն արձանագրել է, որ մասնագիտացված վարչական դատարանների հիմնադրումն ու ստեղծումը շրջադարձային նշանակություն ունեցավ Հայաստանի իրավունքի զարգացման գործում: Վճռաբեկ դատարանի վարչական պալատի հիմնադրումը զեկուցողը ևս շրջադարձային է համարել: Նրա խոսքերով՝ արդար դատաքննության իրավունքի մի շարք բաղադրատարրեր, այդ թվում՝ ողջամիտ ժամկետում գործի քննության իրավունքը, ՀՀ-ում ապահովված չեն, կամ բավարար վիճակում չեն: Ըստ Արտակ Զեյնալյանի՝ այստեղ լուրջ անելիքներ ունի թե՛ Վճռաբեկ դատարանը, թե՛ Վճռաբեկ դատարանի նորաստեղծ վարչական պալատը: Նա կարևորել է նաև Փաստաբանների պալատի դերակատարումը, ներկայացրել դատաիրավական բարեփոխումների իր տեսլականը:

Վճռաբեկ դատարանի վարչական պալատի դատավորի թեկնածու Լիանա Հակոբյանին ներկայացրել է Բարձրագույն դատական խորհրդի անդամ Դավիթ Խաչատուրյանը:

Վճռաբեկ դատարանի վարչական պալատի դատավորի թեկնածու Լիանա Օնիկի Հակոբյանի կենսագրությունը՝  այստեղ: 

Լիանա Հակոբյանն ընդգծել է, որ այսօրվա ընտրությունն առանձնահատուկ է նրանով, որ երեք թեկնածուի ընտրությամբ ձևավորվում է Վճռաբեկ դատարանի կառուցվածքային նոր միավոր, ամբողջական է դառնում Վարչական արդարադատության համակարգը: Նրա խոսքերով՝ այսօրվա ընտրությամբ ավարտվում է ՀՀ-ում վարչական արդարադատության մասնագիտացված համակարգի ձևավորումը, որի սկիզբը դրվել է դեռևս 2008 թ. ՀՀ վարչական դատարանի ստեղծմամբ: Վարչական արդարադատության առանձնահատկություններից նա առանձնացրել է պետական կառավարման ամբողջ համակարգի կայունության, կատարելագործման ապահովումը:

Պետական-իրավական հարցերի մշտական հանձնաժողովի նախագահ Վլադիմիր Վարդանյանը նշել է, որ կատարում են դատական իշխանության բնագավառում վերջին շրջանի ամենամեծ ընդլայնումներից մեկը: Նա գնահատել է առաջին եռյակում ընդգրկված թեկնածուների թե՛ մասնագիտական կարողությունները, թե՛ արժեքային համակարգը՝ նշելով, որ նրանցից յուրաքանչյուրը մեծ ներդրում է ունեցել ՀՀ դատաիրավական զարգացման գործում: Հանձնաժողովի նախագահի խոսքերով՝ դատաիրավական բարեփոխումները լինելու են մշտական, զարգանալու և իրականացվելու են պարբերաբար՝ ըստ անհրաժեշտության՝ լավարկելով դատական իշխանության աշխատաոճը: